មកស្គាល់កន្លែងចាក់ខ្ចៅដ៏ពេញនិយម នៅភ្នំពេញ

ខ្ចៅស្ងោរ ជាអាហារដ៏ពេញនិយមសម្រាប់មនុស្សទូទៅ ហើយអាចរកទទួលទានបាននៅគ្រប់រដូវ ប៉ុន្តែសម្រាប់ខ្ចៅទន្លេ ដែលជាប្រភេទអាហារពេញនិយមសម្រាប់អ្នកចូលចិត្តទទួលទាន​នោះ គឺសម្បូរខ្លាំងក្នុងអំឡុងរដូវមានភ្លៀង ពិសេសក្នុង​ខែ​មិថុនា និង​ខែកក្កដា ដោយសារតែកម្ពស់ទឹកមិនសូវខ្ពស់ខ្លាំង។ កម្ពុជាថ្មី សូមណែនាំកន្លែងចាក់ខ្ចៅពេញនិយម ជាកន្លែងដែលគេមិនដែលរំលង ពិសេសយុវវ័យ។

១. ខ្ចៅសាងស្នេហ៍
ទីតាំងកន្លែងលក់ខ្ចៅមួយនេះ បានដំណើរការអាជីវកម្មលក់ខ្ចៅរបស់ខ្លួនយូរឆ្នាំណាស់មកហើយ លើសពី១០ឆ្នាំទៅហើយ ហើយ​មក​ទល់​នឹង​ពេល​នេះ កន្លែងមួយនេះនៅតែជាទីចាក់ខ្ចៅដ៏ពេញនិយមសម្រាប់អតិថិជនចាស់ថ្មីរបស់ខ្លួន ដែល​មាន​ទីតាំង​ក្រោយ​សាលា​បឋម​សិក្សា​បាក់ទូក។

២. ខ្ចៅស្រីភ្លោះ​ (សាខាទួលទំពូង-សាខាបឹងកេងកង)
យុវវ័យភាគច្រើនប្រហែលជាស្គាល់ច្បាស់ណាស់ ហើយអាចជាអតិថិជនប្រចាំហាងមួយនេះទៀត ក៏ព្រោះតែទីនេះ បើកលក់ជាច្រើនឆ្នាំមកហើយ បើនិយាយពីអាយុកាល អាចប្រហាក់ប្រហែលគ្នានឹងទីតាំងខាងលើ។ ក្រៅពីខ្ចៅ នៅទីនេះ មានមុខម្ហូបច្រើនផ្សេងទៀត។

៣. សួនក្តាន់ពីរ
ថ្វីបើទីនេះពុំមែនជាហាង ប៉ុន្តែកន្លែងមួយនេះ ជាទីសាធារណមួយដែលយុវវ័យហាត់ប្រាណ អង្គុយលេង ទទួលទានអាហារ​តាម​ចិញ្ចើមផ្លូវ ចាក់ខ្ចៅអីជាដើម ក៏ព្រោះតែទីនេះ​សម្បូរ​គេ​លក់​ខ្ចៅ​តាមរទេះ​ខ្លាំង​ណាស់។​

៤. ត្រើយម្ខាង
មិនខុសគ្នាពីទីតាំងខាងលើទេ នៅតាមបណ្តាយច្រាំងទន្លេប៉ែកខាងកើត ក៏ជាប្លុកលក់ខ្ចៅតាមរទេះដ៏ពេញនិយមផងដែរ។ បើ​ជា​អ្នក​ចូលចិត្តទទួលទាន​អាហារ​មួយ​ប្រភេទ​នេះ គឺមិនពិបាករកទិញឡើយ ហើយថែមទាំង​អាច​អង្គុយ​កម្សាន្តអារម្មណ៍ សប្បាយដៃចាក់ខ្ចៅជាមួយ អ្នកយល់ចិត្ត ដល់ថ្មារណាក៏បាន៕