អ្នកជំនាញរថយន្ត ប្រាប់មូលហេតុដែលធ្វើឱ្យយកឡានចូលជាងជាញឹកញាប់

ករណីរថយន្តខូចញឹកញាប់ ថ្វីបើភាគច្រើន ជាប់ទាក់ទងនឹងអាយុកាលរបស់រថយន្ត តែក្នុងនោះ ក៏មានករណីឡានខ្លះ ត្រូវចូលជាងញឹក ដោយសារតែបញ្ហាផ្សេងៗ កើតចេញពីទម្លាប់បើកបរប្រចាំថ្ងៃ របស់ម្ចាស់រថយន្ត។ នេះបើតាមការបញ្ជាក់ឱ្យដឹងពី លោក លីម សេង ម្ចាស់យានដ្ឋានជួសជុលរថយន្ត ME Garage នៅសង្កាត់អូរបែកក្អម បញ្ជាក់ប្រាប់កម្ពុជាថ្មី ។

តាមបទពិសោធជួសជុលជិត ១០ឆ្នាំ ម្ចាស់យានដ្ឋានរូបនេះពន្យល់ថា ករណីរថយន្តខូចញឹកញាប់ ថ្វីបើភាគច្រើន ជាប់ទាក់ទងនឹងអាយុកាលរបស់រថយន្ត តែអាយុកាលរបស់រថយន្ត មិនសុទ្ធតែកំណត់ ពីស្ថានភាពគ្រឿងម៉ាសុីនឡើយ។ លោកថា វាក៏អាស្រ័យលើការថែទាំរបស់ម្ចាស់រថយន្តផងដែរ ពិសេសទាក់ទងនឹងការប្រើប្រាស់តែម្តង ដែលទូទៅបំផុត គឺផ្តើមចេញពីកត្តា ៤ខាងក្រោម៖

១. ម្ចាស់ឡានមានតម្រូវការបើកបរផ្លូវឆ្ងាយជាប្រចាំ តែមិនស័ក្តិសមនឹងកម្លាំងម៉ាសុីនរថយន្ត។
២. បើកបរក្នុងរដូវវស្សា ជៀសមិនផុតពីការជិះកាត់ទឹក ឬកាត់ដីភក់ បើសិនជាមិនមានការលាងសម្អាតដី ពីបាតក្រោមបានល្អទេ នោះវានឹងកាន់ស្នឹមលើគ្រឿងក្រោម ហើយងាយច្រេសចាប់។
៣. ម្ចាស់ឡានខ្លះ មានទម្លាប់ខ្ជិលក្នុងការផ្លាស់ប្តូរប្រេងម៉ាសុីន ហើយនៅតែបន្តបើកបររហូត ឡានចាប់ផ្តើម មានសញ្ញាព្រមាន ទើបចូលជាង (ជាអ្វីដែលលោកជួបផ្ទាល់ពីម្ចាស់ឡានប្រភេទ Toyota Pruis 2006)។
៤. “ទុកឡានចោល យូរៗបើកម្តង” ករណីនេះ បើទោះបីមិនប៉ះពាល់ដល់កម្លាំងអាគុយ ឬម៉ាសុីន ក៏អាចសត្វចង្រៃចូលទៅកាត់ខ្សែ កន្លែងណាមួយ ដោយយើងពុំបានដឹងក៏ថាបាន។ ហើយរឿងនេះ វាសឹងតែទូទៅតែម្តងដែលលោកជួប។

លោកបន្តថា “ភាគច្រើន ម្ចាស់ឡានដែលមកជួសជុលនៅយានដ្ឋានរបស់លោក ច្រើនតែមានបញ្ហាតម្រង (DPF) បញ្ហាប្រេងម៉ាស៊ីន ការឡើងកំដៅម៉ាស៊ីន និងអាគុយជាដើម ព្រោះតែឡានអាយុលើសពី ១០ឆ្នាំទៅហើយ ខណៈអ្នកបើកបរវិញ ក៏ពុំសូវយល់ដឹងពីសារៈសំខាន់នៃការថែទាំថែមទៀត ជាហេតុធ្វើឱ្យជួប បញ្ហាដដែលៗ និងចូលជាងញឹក ជួនអាច ១ខែលើស ២ដងក៏មាន។

បើខូចញឹកបែបនេះ គួរប្តូរថ្មី ឬយ៉ាងណា?
ត្រង់ចំណុចនេះ លោកលើកឡើងថា វាអាស្រ័យទៅលើការសម្រេចចិត្តរបស់បុគ្គលផ្ទាល់ ហើយមានតម្រូវការ បែបណា។ តែយ៉ាងណា លោកក៏ណែនាំឱ្យយកចិត្តទុកឱ្យខ្លាំងលើការថែទាំរថយន្តផងដែរ ដោយគូសបញ្ជាក់ថា បើទោះបីជាប្តូរឡានថ្មីក៏ដោយ ក៏ប្រហែលជាមិនអាចបើកបរបានយូរឆ្នាំ ដូចឡានគេមួយទឹកក៏ថាបាន បើម្ចាស់រថយន្ត បើកបរហើយមិនខ្វល់ពីការថែទាំដិលដល់ ឬជ្រើសប្រភេទរថយន្តឱ្យស័ក្តិសមនឹង ប្រភេទផ្លូវនោះ (ឧទា៖ ផ្លូវឧបសគ្គ និងឡើងចំណោទច្រើន គួរជ្រើប្រភេទរថយន្តណាដែលគេផលិតតម្រូវ)។

យ៉ាងណាមិញ លោក លីម សេង ណែនាំដែរថា បើរថយន្តដែលចាស់ឆ្នាំ ហើយតែងមានបញ្ហា គ្រឿងម៉ាសុីនជាញឹកញយនោះ ក៏គួរតែពិចារណាប្តូរថ្មីហើយដែរ បើមិនចង់ចំណាយថវិកាច្រើនដើម្បីជួសជុល៕