អតីតយុទ្ធជនទទួលចាក់វ៉ាក់សាំងកូវីដ១៩

បងប្អូនជាសមាជិកសមាគមអតីតយុទ្ធជនកម្ពុជាខេត្ត ក្នុងក្រុងសៀមរាប ចំនួន ៩៣៣នាក់ បានទទួលការចាក់វ៉ាក់សាំង ស៊ីណូវ៉ាក់ បង្ការជំងឺកូវីដ១៩ ស្របពេលដែលដើមខែមេសានេះ ដំណើរការវិភាគចុងក្រោយ របស់អង្គការសុខភាពពិភព​លោក (WHO) បានមើលឃើញថា វ៉ាក់សាំងប្រឆាំងកូវីដ១៩ ផលិតដោយប្រទេសចិន ស៊ីណូវ៉ាក់ និង ស៊ីណូហ្វាម មានប្រសិទ្ធភាពគ្រប់គ្រាន់តាមលក្ខខណ្ឌរបស់ អង្គការសុខភាពពិភពលោក(WHO)។

លោក ទៀ សីហា អភិបាលខេត្តសៀមរាប នៅថ្ងៃទី ១១ ខែមេសា បានអញ្ជើញចុះ ពិនិត្យការចាក់វ៉ាក់សាំង បង្ការជំងឺ​កូវីដ-១៩ (ស៊ីណូវ៉ាក់) ជូនដល់បងប្អូនជាសមាជិកសមាគមអតីតយុទ្ធជនខេត្តសៀមរាបនៅមន្ទីរពេទ្យបង្អែកខេត្ត។

លោកឧត្តមសេនីយ៍ទោ ស៊ិន ភាត់ ប្រធានសមាគមអតីតយុទ្ធជនកម្ពុជាខេត្ត និង ជាមេបញ្ជាការតំបន់ប្រតិបត្តិការសឹក​រងសៀមរាប បានបញ្ជាក់ឱ្យដឹងថា ក្រោមការយកចិត្តទុកដាក់របស់ប្រមុខរាជរដ្ឋាភិបាល និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេស​កកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និង ជាអគ្គលេខាធិការគណៈអចិន្ត្រៃយ៍ នៃសមាគមអតីតយុទ្ធកម្ពុជា ក៏ដូចអាជ្ញាធរខេត្តសៀមរាប ក្នុងការជម្រុញដល់បងប្អូនជា សមាជិកសមាគមអតីតយុទ្ធជនកម្ពុជាខេត្ត បានទទួលការចាក់វ៉ាក់សាំង បង្ការជម្ងឺកូវីដ-១៩ (ស៊ីណូវ៉ាក់) ឱ្យបានគ្រប់ៗគ្នា។

ជាក់ស្តែងថ្ងៃនេះ បងប្អូនសមាជិកសមាគមអតីតយុទ្ធជនកម្ពុជា ក្នុងក្រុងសៀមរាប បានទទួលចាក់នៅមន្ទីរពេទ្យបង្អែកខេត្ត និង បងប្អូននៅតាមបណ្តាស្រុកទាំង១១ ចាក់នៅតាមមន្ទីរពេទ្យបង្អែកស្រុក និង មណ្ឌលសុខភាពមួយចំនួនដែលបានកំណត់ផងដែរ។
លោក ទៀ សីហា ថ្លែងថាការចាក់វ៉ាក់សាំងប្រឆាំងជំងឺកូវីដ១៩ ជូនដល់បងប្អូនជាសមាជិកសមាគមអតីតយុទ្ធជនកម្ពុជាខេត្តនាពេលនេះ តាមគោលការណ៍ស្ម័គ្រចិត្ត មិនគិតកម្រៃ និង មិនប្រកាន់និន្នាការអ្វីនោះឡើយ។

លោកក៏អំពាវ​នាវដល់បងប្អូន ចូលរួមធ្វើការផ្សព្វផ្សាយ អំពីវិធានការរបស់រដ្ឋបាលខេត្តសៀមរាប អំពីបម្រាមគោចរនៅពេលយប់នៅក្រុងសៀមរាប ក៏ដូចតាមបណ្តាស្រុក ចាប់ពីម៉ោង ២០ រហូតដល់ម៉ោង៥ ទាបភ្លឺ ក្នុងគោលដៅ ដើមី្បប្រយុទ្ធប្រឆាំងបង្កាទប់ស្កាត់ ការឆ្លងរីករាលដាលនៃជម្ងឺកូវិដ១៩ នៅក្នុងសហគមន៍៕

អត្ថបទ៖ គឿនវេត