ព័ត៌មានជាតិ

ក្រសួងអភិវឌ្ឍន៍ជនបទ បង្ហាញពីគោលនយោបាយជាតិលើវិស័យអភិវឌ្ឍន៍ជនបទ ដល់មន្ត្រីរាជការខេត្តកោះកុង

បានផុស

៥ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

រដ្ឋលេខាធិការក្រសួងអភិវឌ្ឍន៍ជនបទ បានបង្ហាញពីគោលដៅសំខាន់ៗ គោលនយោបាយជាតិលើវិស័យអភិវឌ្ឍន៍ជនបទរយៈពេល ១០ ឆ្នាំ ជូនដល់អាជ្ញាធរ និងមន្ត្រីរាជការខេត្តកោះកុង សម្រាប់ប្រជាពលរដ្ឋមានជីវភាពសមរម្យ និងមានសេចក្តីថ្លៃថ្នូរ មានសុខភាពមាំមួន ព្រមទាំងការរស់នៅក្នុងបរិស្ថានល្អប្រកបដោយចីរភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទ បានឱ្យដឹងនៅថ្ងៃទី ១០ ខែកុម្ភៈ ឆ្នាំ ២០២៦ នេះថា រាជរដ្ឋាភិបាលកម្ពុជា បានដាក់ចេញនូវគោលនយោបាយជាតិ ស្តីពីការអភិវឌ្ឍជនបទឆ្នាំ ២០២៥-២០៣៥ ក្នុងគោលដៅប្រែក្លាយតំបន់ជនបទឱ្យទៅជាសង្គមដែលមានវិបុលភាព សមធម៌ និងមានភាពធន់នឹងការផ្លាស់ប្តូរនានា។

ក្នុងពិធីផ្សព្វផ្សាយពីគោលនយោបាយជាតិស្តីពីការអភិវឌ្ឍជនបទឆ្នាំ ២០២៥-២០៣៥ ដែលមានរយៈពេល ១០ ឆ្នាំ លោករដ្ឋលេខាធិការក្រសួងអភិវឌ្ឍន៍ជនបទ បានបន្តថា គោលនយោបាយនេះ ត្រូវបានរៀបចំឡើងដោយផ្អែកលើតម្រូវការជាក់ស្តែង នៃតំបន់ភូមិសាស្ត្រផ្សេងៗ គ្នា រួមមាន ៖ តំបន់ទំនាបកណ្តាល តំបន់ជុំវិញបឹងទន្លេសាប តំបន់ឆ្នេរសមុទ្រ និងតំបន់ខ្ពង់រាប និងភ្នំ ដោយការបែងចែកនេះ ដើម្បីធានាបាននូវការអភិវឌ្ឍប្រកបដោយ តុល្យភាព បរិយាបន្ន និងភាពធន់ ទៅតាមសក្ដានុពល នៃតំបន់នីមួយៗ។

រដ្ឋលេខាធិការក្រសួងអភិវឌ្ឍន៍ជនបទ បានបង្ហាញទៀតថា អាទិភាពពិសេសមួយ នៃយុទ្ធសាស្ត្រនេះ គឺការអភិវឌ្ឍតំបន់ជនបទតាមបណ្តោយបន្ទាត់ព្រំដែន ដើម្បីប្រែក្លាយតំបន់ទាំងនោះឱ្យទៅជា “ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ” ដែលជាគ្រឹះដ៏សំខាន់សម្រាប់ស្ថិរភាពជាតិ។ ក្នុងនោះ រាជរដ្ឋាភិបាលបានកំណត់ចក្ខុវិស័យយ៉ាងច្បាស់លាស់ក្នុងការ “កសាងសង្គមជនបទកម្ពុជាឱ្យមានវិបុលភាព” ដោយផ្ដោតលើលទ្ធផលសំខាន់ៗ សម្រាប់ប្រជាពលរដ្ឋមានជីវភាពសមរម្យ និងមានសេចក្តីថ្លៃថ្នូរ មានសុខភាពមាំមួន និងរស់នៅក្នុងបរិស្ថានល្អប្រកបដោយចីរភាព។

ដោយឡែក លោក គិត សុផា អភិបាលរងខេត្តកោះកុង លើកឡើងថា គោលគោលនយោបាយជាតិ ស្តីពីការអភិវឌ្ឍជនបទ ឆ្នាំ ២០២៥-២០៣៥ មានជាតួអង្គចលករមួយយ៉ាងសំខាន់ក្នុងការអនុវត្តដោយសហការជាមួយក្រសួងពាក់ព័ន្ធនានា រដ្ឋបាលថ្នាក់ក្រោមជាតិ សប្បុរសជន អង្គការក្រៅរដ្ឋបាល និងស្ថាប័នពាក់ព័ន្ធ។

លោកអភិបាលរងខេត្ត គូសបញ្ជាក់ថា ប៉ុន្មានឆ្នាំចុងក្រោយនេះ ខេត្តកោះកុង បានទទួលគម្រោងអភិវឌ្ឍន៍ជាច្រើន មិនថាតែផ្លូវបេតុង ផ្លូវកៅស៊ូ ឬផ្លូវក្រួសក្រហមនោះទេ។ ជាក់ស្តែង ការកសាងបណ្តាញប្រភពផ្គត់ផ្គង់ទឹកស្អាតប្រកបដោយភាពធន់ និងបរិយាបន្ន នៅក្នុងមូលដ្ឋាន៕

អត្ថបទ ៖ សិរីវឌ្ឍនៈ