ពលរដ្ឋនៅក្រុងបាត់ដំបងសម្រុកចាក់សាំងឡានម៉ូតូ ស្ទើរគ្រប់ស្ថានីយ

ប៉ុន្មានថ្ងៃចុងក្រោយនេះ គេសង្កេតឃើញនៅតាមស្ថានីយប្រេងឥន្ធនៈមួយចំនួនមានប្រជាពលរដ្ឋចូលចាក់សាំងជាបន្តបន្ទាប់ដែលតាមស្ថានីយខ្លះស្ទើរតែស្ទះចរាចរណ៍នៅពេលព្រលប់ដោយសារតែប្រជាពលរដ្ឋដែលបើកបរម៉ូតូ និងរថយន្ត បានបន្តកន្ទុយគ្នាចូលចាក់សាំងតាមស្ថានីយនានា ក្នុងក្រុងបាត់ដំបង ដែលក្នុងនោះស្ថានីយមួយចំនួនតូចបានបិទទ្វារ។

ដោយឡែកសម្រាប់តម្លៃប្រេងសាំងនៅក្នុងក្រុងបាត់ដំបងគឺតម្លៃមិនទាន់ប្រែប្រួលនៅឡើយទេ ដោយសាំងធម្មតាក្នុងមួយលីត្រត្រឹមតែ ៣៨៥០រៀលប៉ុណ្ណោះ ដោយស្ថានីយខ្លះនៅបំពាក់តម្លៃជាធម្មតា ប៉ុន្តែនៅតាមស្ថានីយខ្លះទៀត ដែលនៅតាមបណ្ដាស្រុកឆ្ងាយៗពីក្រុងបាត់ដំបង គឺគេបានដោះតម្លៃចេញពីលើស្លាកយីហោ និងមានស្ថានីយមួយចំនួនតូចបានបិទទ្វារ និងសរសេរថា “អស់សាំង ម៉ាស៊ូតលក់”។

ថ្មីៗនេះមន្ត្រីជំនាញនៃមន្ទីរពាណិជ្ជកម្មក៏បានចេញសេចក្តីណែនាំដល់ម្ចាស់ស្ថានីយ និងម្ចាស់យានយន្ត ត្រូវបង្កើននូវការប្រុងប្រយ័ត្ន ដោយមិនអនុញ្ញាតលក់សាំងទៅឲ្យអតិថិជនជាប៊ីដុង កាន ដើម្បីយកទៅស្តុកទុកនោះឡើយ ព្រោះវាអាចបង្កជាហានិភ័យនៅតាមលំនៅដ្ឋានដូចជាការឆាបឆេះជាអគ្គិភ័យកើតឡើង ហើយក្រសួងក៏បានណែនាំឲ្យម្ចាស់ស្ថានីយមិនត្រូវកេងប្រវ័ញ្ចយកចំណេញខ្ពស់នៅពេលដែលសភាពការណ៍កំពុងវឹកវរបែបនេះនោះឡើយ។

កាលពីថ្ងៃទី៧ ខែមីនាម្សិលមិញនេះ មន្ត្រីជំនាញបានដើរបិទលិខិតផ្សព្វផ្សាយ និងជូនដំណឹងតាមបណ្ដាស្ថានីយប្រេងឥន្ធនៈដោយកំណត់តម្លៃនៃការលក់ទៅឲ្យអតិថិជន​ គឺក្នុងតម្លៃមិនលើសពី ៤០០០រៀលក្នុងមួយលីត្រប៉ុណ្ណោះតម្លៃនេះគឺជាតម្លៃសាំង និងម៉ាស៊ូត បើស្ថានីយណាមួយលក់លើសពីតម្លៃនេះមន្ទីរជំនាញមានសិទ្ធិបិទស្ថានីយនោះតែម្ដង ព្រមទាំងអនុវត្តទៅតាមផ្លូវច្បាប់៕

អត្ថបទ៖ សោ និយមរ័ត្ន