អ្នក​ល្មើស​បម្រាម ០៤ នាក់ មាន​ទាំងស្រ្តី​មានផ្ទៃពោះម្នាក់ ធ្វើ​ដំណើរ​មក​ខេត្តព្រៃវែង​រកឃើញ​ឆ្លង​កូវីដ​ ១៩ ទាំងអស់

អាជ្ញាធរខេត្តព្រៃវែងបានឲ្យដឹងថ្ងៃនេះអ្នកល្មើសបម្រាមចំនួន៤នាក់ ដែលបានដាក់អោយធ្វើចត្តាឡីស័កនិងបានយកសំណាកទៅពិនិត្យរកកូវីដ១៩នោះ លទ្ធផលមានវិជ្ជមានកូវីដ-១៩ទាំងអស់។

អ្នកទាំង៤នាក់នោះទី១ឈ្មោះ ឆេង សុចាន់ភេទស្រី នៅស្រុកពាមរក៌ ទី២ ឈ្មោះឈឿន បុប្ផា ភេទស្រី ទី៣ឈ្មោះឆាន់ដាលីន ភេទស្រី និងទី៤ឈ្មោះសឿន ធា ភេទប្រុស។

អ្នកទាំង៤នាក់​នេះ​ មន្ត្រី​នគរបាល​យុត្តិធម៌​ស្រុកកំពុងតែបន្តនិតិវិធី​ពិន័យអន្តរការណ៍តាម​វិធានការ​រដ្ឋបាល​ហើយ។

លោក ជា សុមេធី អភិបាលខេត្តព្រៃវែងតាមរយៈផេកហ្វេប៊ុកជាផ្លូវការរបស់រដ្ឋបាលខេត្តបានសំណូមពរ ដល់ប្រជាពលរដ្ឋខេត្តព្រៃវែង ជាពិសេសអ្នកដែលមានសាច់ញាតិ ធ្វើការនៅរាជធានី ខេត្តក្រុងផ្សេងៗ ក៏ដូចជាចំណាកស្រុកនៅប្រទេសថៃជាដើម បើគ្រាន់តែចង់មកលេងសប្បាយជួបជុំគ្រួសារនោះទេ គួរកុំទាន់មកលេងអី ដើម្បីចូលរួមទប់ស្កាត់ការរីករាលដាលនូវជំងឺកូវីដ-១៩នេះ»។

លោកអភិបាលខេត្តបានសូមបងប្អូននៅមូលដ្ឋានចូលរួមសហការដោយរាយការណ៍ជាបន្ទាន់មកអាជ្ញាធរអំពីជនសង្ស័យដែលធ្វើការចល័តទីមកពីកន្លែងផ្សេងៗ ល្មើសបម្រាមរបស់រាជរដ្ឋាភិបាល និងការណែនាំរបស់ក្រសួងសុខាភិបាល ដើម្បីអោយសមត្ថកិច្ចអន្តរាគមន៍ចាត់ការតាមវិធានការច្បាប់ដែលឈានដល់ការទទួលទណ្ឌកម្មព្រហ្មទណ្ឌ៕

អត្ថបទ៖ សំអឿន