ព័ត៌មានអន្ដរជាតិ

ជប៉ុន ព្រមានពីហានិភ័យនៃ មហាគ្រោះរញ្ជួយដី នៅសប្តាហ៍ខាងមុខ

បានផុស

៤ ថ្ងៃ មុន

នៅ

ថ្ងៃអង្គារ ២១ មេសា ២០២៦

ដោយ

ក្រោយគ្រោះរញ្ជួយដីកម្រិតធ្ងន់ ៧.៧រ៉ិចទ័រនិងរលកយក្សស៊ូណាមិ វាយប្រហារភាគខាងជើងប្រទេសជប៉ុនកាលពីថ្ងៃចន្ទ ពេលនេះ ទីភ្នាក់ងារឧតុនិយមជប៉ុន (JMA) បានបង្ហាញក្តីបារម្ភយ៉ាងខ្លាំង និងចេញការព្រមានពិសេសអំពី ហានិភ័យនៃគ្រោះរញ្ជួយដីមហិមា ដែលអាចមានកម្រិត ៨.០រ៉ិចទ័រ ឬលើសពីនេះទៀត ក្នុងរយៈពេលមួយសប្តាហ៍ខាងមុខ។

តាមការព្រមានរបស់ JMA ដែលផ្សាយដោយសារព័ត៌មាន Japan Today នៅថ្ងៃអង្គារទី២១ខែមេសាឆ្នាំ២០២៦ ស្ថានភាពពេលនេះខុសពីមុនហើយ! ដ្បិតលទ្ធភាពនៃការកើតមានគ្រោះរញ្ជួយដីមហិមា ស្ថិតនៅកម្រិតទាបនៅឡើយក៏ដោយ ប៉ុន្តែវាបានកើនលើសស្ថានភាពធម្មតា ១០ដងហើយ។

ជុំវិញរឿងនេះ មន្ត្រីការិយាល័យគណៈរដ្ឋមន្ត្រីជប៉ុន បានថ្លែងតាមកញ្ចក់ទូរទស្សន៍ថា ប្រជាពលរដ្ឋគួរតែចាត់វិធានការត្រៀមលក្ខណៈបង្ការគ្រោះមហន្តរាយ ដោយផ្អែកលើគោលការណ៍ទទួលខុសត្រូវលើសុវត្ថិភាពផ្ទាល់ខ្លួន។

កាលពីឆ្នាំមុន រដ្ឋាភិបាលជប៉ុនបានចេញរបាយការណ៍ ដោយបង្ហាញពីក្ដីបារម្ភយ៉ាងខ្លាំង ចំពោះមហាគ្រោះរញ្ជួយដីដែលអាចកើតមាននៅរណ្ដៅ Nankai ដែលអាចឲ្យជប៉ុនខាតបង់សេដ្ឋកិច្ចរហូតដល់ ១.៨១ទ្រីលានដុល្លារ និងបាត់បង់ជីវិតពលរដ្ឋប្រហែល ៣០០ ០០០នាក់។

រណ្ដៅ Nankai ប្រវែង៩០០គីឡូម៉ែត្រនៅក្រោមបាតសមុទ្រប៉ាស៊ីហ្វិករបស់ប្រទេសជប៉ុន មានប្រវត្តិនៃការរញ្ជួយដីដ៏ធំរៀងរាល់ ១០០ ទៅ ១៥០ឆ្នាំម្តង។ ក្រុមប្រឹក្សារដ្ឋាភិបាល ប៉ាន់ប្រមាណថា មានឱកាសប្រហែល ៨០% នៃការរញ្ជួយដីកម្រិត ៨ ទៅ ៩រ៉ិចទ័រនៅតំបន់នេះក្នុងរយៈពេល ៣០ឆ្នាំខាងមុខ។

នៅក្រោមសេណារីយ៉ូដ៏អាក្រក់បំផុតក្នុងករណីកើតមានការរញ្ជួយដីកម្រិត៩រ៉ិចទ័រ ជប៉ុនទំនងជានឹងមានអ្នកជម្លៀសខ្លួនចំនួន ១.២៣លាននាក់ ឬស្មើនឹង ១០% នៃចំនួនប្រជាជនសរុបរបស់ខ្លួន។ របាយការណ៍បានបង្ហាញថា មនុស្សរហូតដល់ ២៩៨ ០០០នាក់អាចស្លាប់ដោយសាររលកយក្សស៊ូណាមិ និងការដួលរលំអគារ បើការរញ្ជួយដីកើតឡើងនៅពេលយប់អំឡុងរដូវរងារ។

សូមជម្រាបថា ជប៉ុនគឺជាប្រទេសមួយក្នុងចំណោមប្រទេសដែលមានសកម្មភាពរញ្ជួយដីខ្លាំងបំផុតនៅលើពិភពលោក ពីព្រោះស្ថិតនៅក្នុងតំបន់ដែលមានផ្លាកតិចតូនិកដ៏ស្មុគស្មាញបំផុត។ ក្នុងចំណោមផ្លាកតិចតូនិកធំៗរាប់សិបដែលបង្កើតបានជាផ្ទៃផែនដី គឺមានចំនួន ៤ ស្ថិតនៅក្នុងប្រទេសជប៉ុន។

ដោយសារទីតាំងស្ថិតនៅតាម «ខ្សែក្រវាត់ភ្លើងប៉ាស៊ីហ្វិក» ប្រទេសជប៉ុនតែងជួបប្រទះនូវគ្រោះរញ្ជួយដីប្រមាណ ២០% នៃរាល់គ្រោះរញ្ជួយដីដែលមានកម្រិតចាប់ពី ៦ រ៉ិចទ័រឡើងទៅ៕

អត្ថបទ៖ សុខ សុវណ្ណ