កម្ពុជា-លីទុយអានី យល់ស្របដូចគ្នាចំពោះសារៈសំខាន់នៃច្បាប់អន្តរជាតិ ការមិនប្រើប្រាស់កម្លាំងដោះស្រាយបញ្ហា

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានផ្លាស់ប្តូរទស្សនៈលើបញ្ហាតំបន់ និងសកលលោក ដោយបានបង្ហាញនូវការយល់ស្របគ្នាចំពោះសារៈសំខាន់នៃការគោរពច្បាប់អន្តរជាតិ, ធម្មនុញ្ញអង្គការសហប្រជាជាតិ, ការដោះស្រាយជម្លោះដោយសន្តិវិធី និងការមិនប្រេីប្រាស់កម្លាំង ជាមួយរដ្ឋមន្រ្តីការបរទេសសាធារណរដ្ឋលីទុយអានី Kęstutis Budrys។

ការបង្ហាញនូវការយល់ស្របគ្នានេះ ធ្វើឡើងក្នុងដំណើរទស្សនកិច្ចរបស់រដ្ឋមន្រ្តីការបរទេសលីទុយអានីមកកាន់កម្ពុជានាថ្ងៃទី២៤ ខែមេសា  ស្របពេលនៅឯតាមព្រំដែនកម្ពុជា-ថៃ នៅតែមានភាពតានតឹង បទឈប់បាញ់មានភាពផុយស្រួយ  ខណៈកន្លងទៅថៃលែងគោរពច្បាប់អន្តរជាតិ មិនដោះស្រាយបញ្ហាដោយសន្តិវិធី ប្រើប្រាស់កម្លាំងប្រដាប់អាវុធបើកការវាយប្រហារដោយខុសច្បាប់ និងវាតទី កាន់កាប់ទឹកដីកម្ពុជា បំពានខ្សែរព្រំដែនដែលមានការទទួលស្គាល់ជាអន្តរជាតិ។

សេចក្ដីប្រកាសព័ត៌មានស្ដីពីលទ្ធផលនៃជំនួបសង្កត់ធ្ងន់ថា៖«សម្តេចធិបតីបានសង្កត់ធ្ងន់អំពីការប្តេជ្ញាចិត្ត និងជំហររបស់កម្ពុជាក្នុងការគាំទ្រ និងគោរពយ៉ាងខ្ជាប់ខ្ជួនធម្មនុញ្ញអង្គការសហប្រជាជាតិ, ធម្មនុញ្ញអាស៊ាន និងការដោះស្រាយជម្លោះ ដោយសន្តិវិធី និងអនុលោមតាមច្បាប់អន្តរជាតិ ដែលជំហរនេះក៏ស្របទៅនឹងជំហររបស់សាធារណរដ្ឋលីទុយអានី។»។

ជាការកត់សម្គាល់ ជារឿយៗ កម្ពុជា តែងតែយកវេទិកាអន្តរជាតិ និងជំនួបជាមួយឥស្សរជនជាន់ខ្ពស់នៃបណ្ដាប្រទេសជាមិត្តនានា បញ្ជាក់ពីគោលជំហរគោរពច្បាប់អន្តរជាតិ យន្តការពហុភាគីនិយម ការសន្ទនា ការដោះស្រាយបញ្ហាដោយសន្តិវិធីជៀសវាងការប្រើប្រាស់កម្លាំង តួយ៉ាងដូចជានៅក្នុងជំនួបជាមួយអគ្គលេខាធិការអង្គការសហប្រជាជាតិ ជំនួបជាមួយប្រធានាធិបតីបារាំង និងជាមួយថ្នាក់ដឹកនាំសំខាន់ៗជាច្រើនរូបទៀត៕

ដោយ៖ ង៉ិល ណារ៉ាត់