ព័ត៌មានជាតិ

សម្តេចធិបតី៖ ទម្លាប់ខ្ញុំវាយតម្លៃការងារផ្អែកលើលទ្ធផលជាក់ស្តែង មិនមើលតែរបាយការណ៍ល្អៗពីថ្នាក់ក្រោមនោះទេ

បានផុស

៩ នាទី មុន

នៅ

ថ្ងៃព្រហស្បតិ៍ ៤ មិថុនា ២០២៦

ដោយ

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានលើកឡើងពីទម្លាប់ក្នុងការវាយតម្លៃលទ្ធផលការងារ ខណៈការដាក់ចេញផែនការរបស់លោក ត្រូវពិនិត្យលើការអនុវត្តជាក់ស្ដែង ដោយមិនមើលតែរបាយការណ៍ល្អៗផ្ញើពីថ្នាក់ក្រោមនោះទេ។

ក្នុងដំណើរចុះពិនិត្យវឌ្ឍនភាពការអភិវឌ្ឍនៅតំបន់ខ្នងផ្សារ ក៏ដូចជាតំបន់ទឹកពុះក្នុងខេត្តកំពង់ស្ពឺកាលពីពេលថ្មីៗនេះ ដោយមានការអមដំណើរពីរដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងទេសចរណ៍ផងនោះ នាយករដ្ឋមន្ត្រីកម្ពុជាបានគូសបញ្ជាក់ថា ក្នុងដំណើរចុះពិនិត្យផ្ទាល់ដោយមិនព្រាងទុកនេះ គោលបំណងដើម្បីតាមដានត្រួតពិនិត្យទៅលើផែនការអភិវឌ្ឍន៍ដោយផ្ទាល់ភ្នែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធី “សម្ពោធអគារកម្ពស់ ៣ ជាន់ សមិទ្ធផលនានា និងប្រគល់សញ្ញាបត្រគ្រូបង្រៀនកម្រិតមូលដ្ឋាន និងសញ្ញាបត្របរិញ្ញាបត្រអប់រំ ឯកទេសអប់រំកាយ ជូនដល់គរុសិស្ស គរុនិស្សិត នៃវិទ្យាស្ថានជាតិអប់រំកាយនិងកីឡា” កាលពីម្សិលមិញនេះ សម្តេចធិបតីបានបញ្ជាក់យ៉ាងដូច្នេះថា «ទម្លាប់ខ្ញុំ បើខ្ញុំដាក់ផែនការលើកិច្ចការអ្វីមួយគឺខ្ញុំទៅមើល អត់ស្តាប់តែរបាយការណ៍ល្អៗនោះទេ។ ខ្ញុំមិនធ្វើគ្រប់ទេ គឺយកគោលដៅមួយចំនួន»។

សម្តេចបន្តថា នៅក្នុងដំណើរចុះពិនិត្យនោះ សម្តេចក៏បានជួបជាមួយប្រធានសហគមន៍ ដើម្បីស្វែងយល់ពីតម្រូវការជាក់ស្តែង និងបានដាក់គោលការណ៍ទៅថ្នាក់ដឹកនាំពាក់ព័ន្ធ ដើម្បីរៀបចំអភិវឌ្ឍតំបន់នេះឱ្យក្លាយជាសហគមន៍គំរូ។

នៅក្នុងដំណើរចុះពិនិត្យដោយផ្ទាល់ សម្តេចនាយករដ្ឋមន្រ្តីក៏មើលឃើញពីការផ្លាស់ប្តូរដ៏វិជ្ជមានរបស់ប្រជាពលរដ្ឋក្នុងមូលដ្ឋាន ដែលពីមុនធ្លាប់តែពឹងផ្អែកលើការចូលព្រៃកាប់ឈើ និងរកអនុផលព្រៃឈើ។ តែនៅពេលមានទេសចរណ៍ ប្រជាពលរដ្ឋ បានងាកមករកចំណូល តាមរយៈការបម្រើសេវាកម្មទេសចរណ៍វិញ ដូចជាការធ្វើម្ហូប និងធ្វើជាអ្នកជូនភ្ញៀវដើរព្រៃជាដើម។

ដោយមើលឃើញថា តំបន់នេះមានសក្តានុពលទេសចរណ៍ធំធេង និងដើម្បីឆ្លើយតបទៅនឹងក្តីបារម្ភរបស់ប្រជាពលរដ្ឋ រដ្ឋាភិបាល បានធ្វើការដកនិងកែសម្រួលអាជ្ញាប័ណ្ណវិនិយោគឯកជនមួយចំនួននៅទីនោះ។

សម្តេចធិបតីបានបញ្ជាក់ថា ការកែសម្រួលនេះគឺដើម្បីធានាថាការវិនិយោគឯកជន នឹងត្រូវរៀបចំនៅទីតាំងដែលអាចជួយគាំទ្រគ្នាទៅវិញទៅមក ដោយមិនត្រូវទៅដណ្តើមឬធ្វើឱ្យប្រជាសហគមន៍បាត់បង់មុខរបរនោះទេ ពោលគឺត្រូវតែធានារក្សាអាជីព និងប្រភពចំណូលជូនប្រជាពលរដ្ឋមូលដ្ឋានជាដាច់ខាត៕