លោក សារិន វណ្ណា ​កំពុង​​​សិក្សា​បញ្ហា​កកស្ទះសេវាដីធ្លី ដោយ​ផ្តោត​លើ​ទុក្ខកង្វល់​របស់​ប្រជាពលរដ្ឋ

លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញ បានឱ្យដឹងថា ក្រុមការងារបរិវត្តកម្មឌីជីថលរបស់មន្ទីរ កំពុងសិក្សាអំពីការផ្តល់សេវាសាធារណៈលើវិស័យដីធ្លី ដែលកំពុងមានការកកស្ទះនៅតាមបណ្តារាជធានី-ខេត្តទូទាំងប្រទេស ដើម្បីស្វែងរកដំណោះស្រាយ និងកាត់បន្ថយទុក្ខលំបាករបស់ប្រជាពលរដ្ឋ។

តាមរយៈបណ្តាញសង្គមផ្លូវការ កាលពីថ្ងៃទី១១ ខែកក្កដា ឆ្នាំ២០២៦ លោក សារិន វណ្ណា បានបញ្ជាក់ថា ក្រុមការងារបរិវត្តកម្មឌីជីថល កំពុងប្រមូលព័ត៌មាន និងមតិយោបល់ពីប្រជាពលរដ្ឋ ដែលកំពុងជួបប្រទះបញ្ហាក្នុងការទទួលសេវាសាធារណៈលើវិស័យដីធ្លី ដើម្បីសិក្សា និងដោះស្រាយបញ្ហាដែលបណ្តាលឱ្យមានការយឺតយ៉ាវ ឬមិនទទួលបានសេវាតាមការរំពឹងទុក។

លោកបានលើកឡើងថា ក្រុមការងារនឹងខិតខំស្វែងរកដំណោះស្រាយជាក់ស្តែង ដើម្បីដោះស្រាយទុក្ខកង្វល់ និងការលំបាករបស់ប្រជាពលរដ្ឋឱ្យមានប្រសិទ្ធភាព។

គួរជម្រាបថា កាលពីថ្ងៃទី១០ ខែកក្កដា ឆ្នាំ២០២៦ លោក សារិន វណ្ណា បានប្រកាសថា លោកនឹងប្រើប្រាស់ឆន្ទានុសិទ្ធិ ដែលទទួលបានពីលោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដើម្បីចាត់វិធានការចំពោះមន្ទីររៀបចំដែនដីរាជធានី-ខេត្តណា ដែលនៅតែបន្តបង្កការលំបាកដល់ប្រជាពលរដ្ឋ ក្នុងការទទួលសេវាសាធារណៈលើវិស័យដីធ្លី។

ក្នុងរយៈពេលថ្មីៗនេះ លោក សារិន វណ្ណា ទទួលបានការគាំទ្រពីសាធារណជន ក្រោយបង្ហាញជំហរយ៉ាងម៉ឺងម៉ាត់ក្នុងការលុបបំបាត់អំពើពុករលួយ និងលើកកម្ពស់ការផ្តល់សេវាសាធារណៈប្រកបដោយតម្លាភាព យុត្តិធម៌ និងអនុលោមតាមនីតិវិធីជាធរមាន។ ទន្ទឹមនឹងនេះ លោកក៏បានផ្សព្វផ្សាយឯកសារមួយចំនួន ពាក់ព័ន្ធនឹងការកែទម្រង់នីតិវិធីផ្តល់សេវាសាធារណៈលើវិស័យដីធ្លីផងដែរ។

គួររំលឹកថា កាលពីថ្ងៃទី២៤ ខែមិថុនា ឆ្នាំ២០២៦ លោកឧបនាយករដ្ឋមន្ត្រី សាយ សំអាល់ បានចេញសេចក្តីសម្រេចប្រគល់ភារកិច្ចជូនលោក សារិន វណ្ណា ឱ្យដឹកនាំក្រុមការងារប្រតិបត្តិនៅតាមបណ្តារាជធានី-ខេត្ត ដើម្បីជួយដល់ក្រុមជនបង្គោលប្រឆាំងអំពើពុករលួយរបស់ក្រសួងរៀបចំដែនដី នគរូបនីយកម្ម និងសំណង់ ក្នុងការពង្រឹងប្រសិទ្ធភាព និងតម្លាភាពនៃការផ្តល់សេវាសាធារណៈ៕