អគ្គមេបញ្ជាការកងយោធពលខេមរភូមិន្ទ ទទួលនូវអំណោយសប្បុរសធម៌ពីក្រុមហ៊ុន ជីងហ្គា គង់ហ្គូ

អង្ករចំនួន៥០តោន រួមនឹងថវិកាចំនួន៥ម៉ឺនដុល្លារសហរដ្ឋអាមេរិក ត្រូវបានលោក លី យ៉ែន អគ្គនាយកក្រុមហ៊ុនជីងហ្គាគង់ហ្គូ តាមរយៈបញ្ជាការដ្ឋានអង្គរក្សសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាំយកទៅប្រគល់ជូនលោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នាម្សិលមុិញនៅអគ្គបញ្ជាការដ្ឋានដើម្បីប្រើប្រាស់ក្នុងយុទ្ធនាការប្រឆាំងនឹងជំងឺរាតត្បាតដ៏កាចសាហាវកូវីដ-១៩។

នៅក្នុងឱកាសទទួលអំណោយនោះ លោកនាយឧត្តមសេនីយ៍ វង្ស ពិសេន បានថ្លែងអំណរគុណចំពោះលោក លី យ៉ែន អគ្គនាយកក្រុមហ៊ុន ជីងហ្គា គង់ហ្គូ ដែលបានផ្ដល់អង្ករ និងថវិកានាពេលនេះ សម្រាប់ជាប្រយោជន៍ផ្តល់ជូនប្រជាពល រដ្ឋដែលកំពុងធ្វើចត្តាឡឺស័ក និងត្រូវការជំនួយ។

ជាមួយនេះ តាមរយៈឧត្តមសេនីយ៍ឯក ណុប រ័ត្ននិមល មេបញ្ជាការរងបញ្ជាការដ្ឋានអង្គរក្ស លោកនាយឧត្តមសេនីយ៍ វង្ស ពិសេន ក៏បានថ្លែងអំណរគុណចំពោះ លោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរង និងជាមេបញ្ជាការបញ្ជាការដ្ឋានអង្គរក្សសម្ដេចតេជោ ដែលបានខិតខំស្វែងរកជំនួយពីសប្បុរសជននានា ដើម្បីជួយគាំទ្រដល់រាជរដ្ឋាភិបាល ដែលកំពុងប្រឈមជំងឺរាតត្បាតកូវីដ-១៩៕

អត្ថបទ ៖ វិមាន