ព័ត៌មានជាតិ

មន្រ្តីសុខាភិបាលប្រាប់ពីផលរំខានខ្លះៗ ពេលប្រើឱសថចិន Lianhua Qingwen

បានផុស

៣ years មុន

នៅ

ថ្ងៃពុធ ២១ កក្កដា ២០២១

ដោយ

ដោយមិនបញ្ជាក់ថាឱសថចិន Lianhua Qingwen គឺសម្រាប់ព្យាបាលអ្នកឆ្លងកូវីដ ១៩ តែជាប្រភេទឱសថជួយសម្រាលរោគសញ្ញា ទប់កុំឲ្យមានការវិវឌ្ឍទៅរកសភាពធ្ងន់ធ្ងរ អាចឲ្យអ្នកជំងឺវិលត្រឡប់ទៅរកការជាសះស្បើយឆាប់រហ័ស។

លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាលបានលើកឡើងថា ឱសថចិន Lianhua Qingwenឆ្លើយតបសរីរាង្គបានយ៉ាងល្អ កាត់បន្ថយរោគសញ្ញាដូចជាក្តៅខ្លួន ក្អក ឈឺបំពង់កអ្នកជំងឺកូវីដ១៩។ យ៉ាងណាលោកជំទាវបានប្រាប់ពីអាការៈមួយចំនួន ពីផលរំខាននៃការប្រើប្រាស់ឱសថចិននេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវបញ្ជាក់ថា ឱសថណាក៏ដូចឱសថណាដែរ តែងតែមានផលរំខានឬផលប៉ះពាល់មិនថាឱសថចិន ឱសថអាមេរិក ឱសថបារាំង។

ឱសថចិននេះមានផលរំខានដូចជា ធ្វើឲ្យចង់ក្អួត ឈឺពោះ អាចរាករូស ចេញរមាស់ ឬមានភាពធេងធោង ស្ងួតមាត់ឬស្ងួតបំពង់ក។ ឱសថបុរាណចិន Lianhua Qingwen ណែនាំសម្រាប់មនុស្សធំ មិនសម្រាប់កុមារតូចៗនោះទេ។

ឱសថ Lianhua Qingwen ត្រូវបានយកទៅប្រើ នៅពេលប្រទេសចិនផ្ទុះឆ្លងកូវីដទ្រង់ទ្រាយធំ។ មានបណ្តាប្រទេសជាច្រើន បច្ចុប្បន្ននេះក៏ទទួលស្គាល់ឱសថចិន Lianhua Qingwen ដូចជាប្រទេសប្រេស៊ីល ហ្វីលីពីន ឥណ្ឌូណេស៊ី កាណាដា ថៃ សិង្ហបុរី និងប្រទេសមួយចំនួននៅអាហ្វ្រិកក៏មានប្រើឱសថចិននេះដែរ។

លោកជំទាវឱ វណ្ណឌីន បានថ្លែងថា នៅឆ្នាំ ២០០៣ នៅពេលផ្ទុះជំងឺសារ ផ្តាយសាយ H1N1 ប្រទេសចិនបានប្រើប្រាស់ឱសថ Lianhua Qingwen ដើម្បីព្យាបាលអ្នកជំងឺមានបញ្ហារលាកផ្លូវដង្ហើម។

លោកជំទាវបានបញ្ជាក់ពីការប្រើប្រាស់ឱសថចិននេះ ដោយត្រូវលេបម្តង ៤ គ្រាប់ (ព្រឹក ថ្ងៃ ល្ងាច) ក្នុងរយៈពេល ៧ ទៅ ១០ថ្ងៃ។

ខណៈដែលឱសថចិននេះការពារកុំឲ្យវិវឌ្ឍទៅរកភាពធ្ងន់ធ្ងរនៃមេរោគកូវីដ លោកជំទាវ ឱ វណ្ណឌីន ក៏បានបញ្ជាក់ឡើងវិញថា ការប្រើប្រាស់ឱសថនេះសម្រាប់អ្នកមានជំងឺកូវីដកម្រិតស្រាលប៉ុណ្ណោះ ហើយត្រូវមានការប្រុងប្រយ័ត្ន កុំសាកល្បងប្រើប្រាស់ដោយគ្មានវេជ្ជបញ្ជាពីគ្រូពេទ្យ៕

អត្ថបទ៖ ប៊ុណ្ណារ៉ា

Related Topics:

Up Next

ខេត្តកំពង់ចាម មានអ្នកឆ្លងកូវីដ ថ្មីចំនួន៤៨នាក់ និងជាសះស្បើយ១៣៧នាក់

Don't Miss

រដ្ឋមន្ត្រីក្រសួងសង្គមកិច្ច ជំរុញដល់អាជ្ញាធរពីរស្រុកឲ្យយកចិត្តទុកដាក់ខ្ពស់លើបញ្ហាការរីករាលដាលជំងឺកូវីដ