ព័ត៌មានជាតិ
ការស្នើធ្វើតេស្តលើសាច់ក្របីឡើងវិញពីក្រុមហ៊ុន និងទូតឥណ្ឌា ធ្វើឱ្យអាក់ខានដល់ការដុតបំផ្លាញ
ក្រុមហ៊ុននាំចូលសាច់ក្របី និងស្ថានទូតឥណ្ឌាប្រចាំប្រទេសកម្ពុជា នៅតែមិនអស់ចិត្តចំពោះការរកឃើញវីរុសកូវីដ-១៩ នៅលើសាច់ក្របី ដែលនាំចូលពីប្រទេសឥណ្ឌា ដោយសំអាងថា សាច់ក្របីនេះ ត្រូវបានត្រួតពិនិត្យពីមន្ទីពិសោធន៍ឥណ្ឌា ស្របតាមស្ដង់ដារ ISO ត្រឹមត្រូវ មុននឹងនាំចូលមកប្រទេសកម្ពុជា ហើយក្រុមហ៊ុន អើស្ការី អ៊ិនវេសម៉ិន & ខនស្ត្រាក់សិន ឯ.ក. នាំចូលចំនួន៣ ទូ ពីរោងចក្រតែមួយ និងមានការវេចខ្ចប់តែមួយ តែជាលទ្ធផលអវិជ្ជមានមួយទូ និង២ទូទៀតវិជ្ជមានកូវីដ-១៩។ នេះបើយោងតាមលិខិតចំនួន២ផ្សេងគ្នា ដែល “កម្ពុជាថ្មី” ទទួលបាននៅព្រឹកថ្ងៃទី២៨ ខែកក្កដា នេះ។
សំណើរបស់ស្ថានទូតឥណ្ឌា ក៏ដូចជាក្រុមហ៊ុនបានធ្វើឡើងបន្ទាប់ពីអាជ្ញាធរមានសមត្ថកិច្ចរបស់កម្ពុជា គ្រោងយកសាច់ក្របីដែលរកឃើញផ្ទុកមេរោគកូវីដ-១៩ ទៅដុតបំផ្លាញចោលនៅស្រុកឱរ៉ាល់ ខេត្តកំពង់ស្ពឺកាលពីម្សិលមិញ ថ្ងៃទី២៧ ខែកក្កដា។
លិខិតរបស់ស្ថានទូតជាភាសាអង់គ្លេសបានលើកឡើងថា សាច់ក្របីដែលកម្ពុជារកឃើញមេរោគកូវីដ-១៩ នេះ មានការត្រួតពិនិត្យមន្ទីរពិសោធន៍របស់ឥណ្ឌាតាមស្តង់ដារ ISO ត្រឹមត្រូវ ហើយនៅក្នុងលទ្ធផលតេស្តផ្ទុយគ្នារវាងកម្ពុជា និងឥណ្ឌានេះ អ្នកជំនាញឥណ្ឌា តាមរយៈស្ថានទូតឥណ្ឌាប្រចាំនៅកម្ពុជា និងអ្នកនាំចូលសាច់ក្របីមកកម្ពុជា បានស្នើសុំឱ្យក្រសួងសុខាភិបាល និងគណៈកម្មការប្រយុទ្ធប្រឆាំងជំងឺកូវីដ-១៩ ធ្វើតេស្តលើកុងតឺន័រតែមួយ ដើម្បីបញ្ជាក់លទ្ធផល។ ស្ថានទូតបានបញ្ជាក់ទៀតថា សាច់ក្របីនេះ ត្រូវបាននាំចេញពីប្រទេសឥណ្ឌាតាំងពីខែមេសា ហើយមកដល់កម្ពុជានៅខែកក្កដា ដូច្នេះគ្មានភស្តុតាងវិទ្យាសាស្ត្រណាមួយបង្ហាញថា វីរុសកូវីដ-១៩ អាចរស់នៅលើសម្ពាធវេចខ្ចប់អាហារ និងចំណីអាហារ ក្នុងរយៈពេលជិត៣ខែនោះទេ។
ជាមួយគ្នានេះ ស្ថានទូតឥណ្ឌាបានព្យាយាមពន្យល់ទៀតថា កូវីដ-១៩ គឺជាជំងឺផ្លូវដង្ហើមដែលឆ្លងតាមរយៈការធ្វើទំនាក់ទំនងពីមនុស្សម្នាក់ទៅមនុស្សម្នាក់ទៀត ហើយក៏មិនមានភស្តុតាងណាមួយ ដែលបញ្ជាក់ថា វាអាចចម្លងតាមរយៈការវេចខ្ចប់អាហារ ឬចំណីអាហារនោះដែរ។ រហូតមកដល់ពេលនេះ ក៏មិនមានប្រទេសណាមួយធ្លាប់បានរាយការណ៍ទាក់ទងទៅនឹងវីរុសកូរ៉ូណា ឬកូវីដ-១៩ នៅក្នុងអាហារក្លាស្សេ ឬអាហារវេចខ្ចប់ ឬផ្ទៃលើនៃសំបកវេចខ្ចប់ឡើយ។
ដោយឡែកលិខិតដែលក្រុមហ៊ុន អើស្ការី អ៊ិនវេសម៉ិន & ខនស្ត្រាក់សិន ឯ.ក. ដែលបានស្នើទៅលោកបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ក៏បានស្នើធ្វើតេស្តទៅលើសាច់ក្របីនោះម្ដងទៀតផងដែរ ដោយបញ្ជាក់ថា ក្រុមហ៊ុនមិនមានការជំទាស់ ហើយរីករាយ នឹងចូលរួមសហការជានិច្ចក្នុងយុទ្ធនាការប្រឆាំងនឹងជំងឺកូវីដ-១៩ ក៏ប៉ុន្តែក្រុមហ៊ុនសំណូមពរពិចារណា និងអនុគ្រោះ ដើម្បីយកសំណាក និងធ្វើតេស្តជាលើកចុងក្រោយ ដើម្បីឱ្យដឹងការពិតច្បាស់លាស់មួយកម្រិតទៀត។
បើតាមក្រុមហ៊ុន អើស្ការី ក្រុមហ៊ុនបាននាំចូលជាមួយគ្នាចំនួន៣ ទូ ពីក្រុមហ៊ុន HMA AGRO Industries LTD ពីរោងចក្រតែមួយ និងមានការវេចខ្ចប់តែមួយ ហើយជាលទ្ធផលអវិជ្ជមាន១ទូ និង២ទូទៀត វិជ្ជមាន។
សូមបញ្ជាក់ថា អគ្គនាយកដ្ឋានគយ និងរដ្ឋាករកម្ពុជា បានប្រកាសរកឃើញសាច់ក្របីបង្កកចំនួន៥ កុងតឺន័រនាំចូលពីប្រទេសឥណ្ឌា ហើយក្នុងនោះមានចំនួន៣ កុងតឺន័រ ត្រូវបានរកឃើញថា មានផ្ទុកវីរុសកូវីដ-១៩។ យោងតាមតារាងលទ្ធផលវិភាគលើសាច់ក្របីបង្កកចំនួន៥កុងតឺន័រ របស់ក្រសួងសុខាភិបាលបានបញ្ជាក់ថា បានរកឃើញវិជ្ជមានជំងឺកូវីដ-១៩ ចំនួន៣កុងតឺន័រ ដោយកុងតឺន័រទី១ ជារបស់ក្រុមហ៊ុន បូវីនី ហ្វូដ ឯ.ក និងកុងតឺន័រទី២ និងទី៣ ជារបស់ក្រុមហ៊ុន អើស្ការី អ៊ិនវេសម៉ិន & ខនស្ត្រាក់សិន ឯ.ក។
ក្រោយពីរកឃើញនេះ អគ្គនាយកដ្ឋានគយ និងរដ្ឋាករកម្ពុជា ព្រមទាំងសមត្ថកិច្ចពាក់ព័ន្ធ គ្រោងយកសាច់ក្របី ដែលរកឃើញផ្ទុកមេរោគកូវីដ-១៩ ទៅដុតបំផ្លាញចោលនៅស្រុកឱរ៉ាល់ ខេត្តកំពង់ស្ពឺ កាលពីថ្ងៃទី២៧ ខែកក្កដា ឆ្នាំ២០២១ ប៉ុន្តែត្ររូវបានអាក់ខានទៅវិញ ដោយសាតែមានសំណើនេះ៕
អត្ថបទ៖ កោះកែវ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
កីឡា២ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត