ព័ត៌មានជាតិ

ជីម៉ាក់ ក្រើនរំលឹកដល់ថៅកែរោងចក្រឲ្យការពារកម្មករនិយោជិតកុំឲ្យឆ្លងជំងឺកូវីដ១៩

បានផុស

៦ years មុន

នៅ

ថ្ងៃពុធ ២ ធ្នូ ២០២០

ដោយ

ភ្នំពេញ ៖ សមាគមរោងចក្រកាត់ដេរនៅកម្ពុជា ដែលហៅកាត់ថាជីម៉ាក់បានក្រើនរំលឹកជាសាជាថ្មីដល់ថៅកែរោងចក្រដែលជាសមាជិករបស់ខ្លួនទាំងអស់អនុវត្តនូវវិធានការអនាម័យរបស់ក្រសួងសុខាភិបាលឲ្យបានខ្ជាប់ខ្ជួនដើម្បីការពារកម្មករនិយោជិតកុំឲ្យឆ្លងជំងឺកូវីដ១៩។

តាមរយៈសេចក្តីណែនាំរបស់ខ្លួនដល់សមាជិកជីម៉ាក់បានសរសេរថាការផ្ទុះឡើងនៃវីរុសកូវីដ១៩ (COVID-19) នៅតែបន្តជាក្តីបារម្ភនៅក្នុងឧស្សាហកម្មរបស់យើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមបានបន្តថាសមាគមសូមធ្វើណែនាំជាថ្មីបន្ថែមទៀតដល់សមាជិកទាំងអស់ឲ្យអនុវត្តន៍នូវវិធានការទប់ស្កាត់មួយចំនួនដូចជាប្រសិនបើរោងចក្រលោក លោកស្រីមាននិយោជិតដែលទើបតែត្រឡប់មកពីក្រៅប្រទេស សូមចូលរួមសហការជាមួយអាជ្ញាធរមានសមត្ថកិច្ច និងអនុវត្តឲ្យបានខ្ជាប់ខ្ជួននូវវិធានការការពារដែលដាក់ចេញដោយក្រសួងសុខាភិបាល។ត្រូវរៀបចំឲ្យមានឧបករណ៍វ៉ាស់កំដៅ និងធ្វើការវ៉ាស់កំដៅដល់កម្មករនិយោជិតនៅតាមច្រកចេញ-ចូល ឲ្យបានទៀងទាត់ និងមានប្រសិទ្ធភាព។

ត្រូវរៀបចំផ្តល់ម៉ាស់សុវត្ថិភាព និងត្រូវមានទឹកអាកុលឬសាប៊ូសម្រាប់លាងដៃ សម្រាប់កម្មករនិយោជិត និងភ្ញៀវដែលចេញចូលនៅក្នុងបរិវេណរោងចក្រ។ត្រូវធ្វើការផ្សព្វផ្សាយ និងណែនាំដល់កម្មករនិយោជិតនូវរបៀបប្រើប្រាស់សម្ភារៈការពារសុវត្ថិភាព (PPE) និងវិធានការសុវត្ថិភាព ក៏ដូចជាលើកទឹកចិត្តដល់កម្មករនិយោជិតធ្វើការលាងដៃជាមួយនឹងសាប៊ូឲ្យបានញឹកញាប់ រៀងរាល់ពេលដែលចូលក្នុងរោងចក្រនៅពេលព្រឹក និងក្រោយពេលបរិភោគបាយថ្ងៃត្រង់។

សមាគមសូមកោតសរសើរចំពោះសមាជិកទាំងអស់ ដែលបានយកចិត្តទុកដាក់ និងអនុវត្តន៍យ៉ាងសកម្មនូវវិធានការការពារសុវត្ថិភាពកម្មករនិយោជិតនាពេលកន្លងមក និងសូមលើកទឹកចិត្តដល់សមាជិកទាំងអស់ឲ្យបន្តអនុវត្តន៍វិធានការការពារសុវត្ថិភាពនេះ រហូតដល់មានការណែនាំថ្មីពីរាជរដ្ឋាភិបាលកម្ពុជា។

គួរបញ្ជាក់ថា រហូតមកដល់ពេលនេះប្រទេសកម្ពុជានៅមិនទាន់មានកម្មករនិយោជិតណាម្នាក់ក្នុងវិស័យកាត់ដេរសំលៀកបំពាក់ ផលិតស្បែកជើងនិងផលិតផ លធ្វើដំណើរបានឆ្លងជំងឺកូវីដ១៩នៅឡើយទេ៕
ដោយ ៖ សំអឿន