ព័ត៌មានជាតិ

កងអនុសេនាធំរាជអាវុធហត្ថលេខ៧៣៩ ចំនួន៧៣នាក់ ចេញបេសកកម្មទៅស៊ូដង់ខាងត្បូង

បានផុស

៣ years មុន

នៅ

ថ្ងៃពុធ ១៧ វិច្ឆិកា ២០២១

ដោយ

កងអនុសេនាធំរាជអាវុធហត្ថលេខ១៨៦ គឺជាកងទី៩ ដែលមានកម្លាំងសរុប ៧៣នាក់ ក្នុងនោះមាននារីចំនួន ២៨នាក់ បានវិលត្រឡប់មកមាតុភូមិកម្ពុជាវិញ នៅល្ងាចថ្ងៃទី១៦ ខែវិច្ឆិកា ឆ្នាំ២០២១នេះ ក្រោយបញ្ចប់បេសកកម្មមនុស្សធម៌រក្សាសន្តិភាពអស់រយៈពេល១ឆ្នាំប្រកបដោយជោគជ័យ នៅសាធារណរដ្ឋស៊ូដង់ខាងត្បូង ហើយកងដែលត្រូវធ្វើការប្តូរវេន គឺកងអនុសេនាធំរាជអាវុធហត្ថលេខ ៧៣៩ ជាកងទី១០ ដែលមានកម្លាំង សរុបចំនួន៧៣នាក់ (នារី៣៤នាក់) ក៏ត្រូវបានបញ្ជូនទៅជំនួស នាល្ងាចថ្ងៃដដែលនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនោះបានធ្វើឡើងក្រោមវត្តមាន នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម ព្រមទាំងថ្នាក់ដឹកនាំកងទ័ពមួកខៀវមួយចំនួន នៅព្រលានយន្តហោះ VIP។

នាឱកាសនោះ នាយឧត្តមសេនីយ៍ សែម សុវណ្ណនី បានពាំនាំនូវប្រសាសន៍ផ្តាំផ្ញើសួរសុខទុក្ខ និងស្វាគមន៍ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា, សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួង ការពារជាតិ និងឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងជាប្រធានគណៈកម្មាធិការជាតិ។

គិតចាប់ពីឆ្នាំ២០០៦ រហូតមកដល់បច្ចុប្បន្ន ព្រះរាជាណាចក្រកម្ពុជា បានបញ្ជូនកងកម្លាំងមួកខៀវចូលរួមបេសកកម្មរក្សាសន្តិភាពរបស់អង្គការសហប្រជាជាតិ ចំនួន ៧,៨៩៩នាក់ ក្នុងនោះមាននារី ៥២៨នាក់។ បច្ចុប្បន្ន កងកម្លាំងមួកខៀវកំពុងបំពេញបេសកកម្មក្នុងបេសកកម្មរបស់អង្គការសហប្រជាជាតិ មានចំនួន ៧៨៧នាក់ ក្នុងនោះនារី ១១១នាក់។

សម្រាប់ឆ្នាំ២០២១ គឺជាឆ្នាំទី១០ នៃការចូលរួមបេសកកម្មរក្សាសន្តិភាពនៅសាធារណរដ្ឋស៊ូដង់ខាងត្បូង (UNMISS) ដែលមានចំនួនសរុប ៧៣០នាក់ (នារី១២៤នាក់)។

នេះសបញ្ជាក់ឱ្យឃើញថា កម្លាំងមួកខៀវកម្ពុជា ពិតជាបានធ្វើនវានុវត្តចំណេះជំនាញក្នុងបរិបទនៃការ រស់នៅថ្មី និងសាមគ្គីភាព សហប្រតិបត្តិការ គោរពវិន័យល្អ និងភាពអង់អាច ក្លាហានក្នុងការអនុវត្តតួនាទីរបស់ខ្លួនគ្រប់ពេលវេលា និងគ្រប់ទីកន្លែង នៃតំបន់ដែលខ្លួនបានចូលរួម ពិសេសការអនុវត្តនូវវិធានការនៃការពារមេរោគកូវីដ-១៩៕

អត្ថបទ៖ កោះកែវ

Related Topics:ប្រទេស ស៊ូដង់ខាងត្បូង