ឆ្នាំ២០២១៖ កម្ពុជា​ទទួល​បាន​ភ្ញៀវ​ទេសចរអន្តរជាតិ​ជិត២០​ម៉ឺន​នាក់ថយ​ចុះ៨៥%

យោងតាមរបាយការណ៍របស់ក្រសួងទេសចរណ៍បានឱ្យដឹងថា នៅក្នុងឆ្នាំ២០២១ ប្រទេសកម្ពុជាទទួលបានភ្ញៀវទេសចរអន្តរជាតិប្រមាណជិត ២០ម៉ឺននាក់ ថយចុះដល់ទៅ៨៥%បើធៀបនឹងឆ្នាំ២០២០កន្លងទៅ។

របាយការណ៍បានបន្តថានៅឆ្នាំ២០២១ មានភ្ញៀវទេសចរអន្តរជាតិចូលមកប្រទេសកម្ពុជាចំនួន១៩៦,៤៩៥នាក់ ថយចុះ៨៥% ប្រសិនបើធៀបនឹងឆ្នាំ២០២០ដែលមានចំនួនរហូតដល់ទៅ១៣០៦១៤៣នាក់។

ក្នុងចំណោមភ្ញៀវអន្តរជាតិជិត ២០ម៉ឺន នាក់នោះ អ្នកមកតាមផ្លូវអាកាសមានចំនួន៩៩,៨២៩នាក់ ថយចុះ៨៦.៨% និងអ្នកមកតាមផ្លូវគោកមានចំនួន៩៦,៦៦៦នាក់ ថយចុះ៨២.៤% ។រីឯភ្ញៀវទេសចរដែលចូលមកតាមផ្លូវទឹកវិញនោះ គឺគ្មានឡើយនៅក្នុងឆ្នាំ២០២១។

របាយការណ៍ដដែលបានបន្តទៀតថា នៅក្នុងឆ្នាំ២០២១ ភ្ញៀវទេសចរកម្ពុជាដែលបានធ្វើដំណើរចេញក្រៅប្រទេស គឺមានចំនួន៣០,៥១៧នាក់ ថយចុះ៩០.៦% បើធៀបនឹងឆ្នាំ២០២០ដែលមានចំនួន៣២៦១៩៩នាក់។ ជាមួយគ្នានោះ ក៏មានភ្ញៀវបរទេសដែលចេញពីកម្ពុជា១៨៣,៦០៨នាក់ថយចុះ៨៦.៦%ផងដែរបើធៀបនឹងឆ្នាំ២០២០មានចំនួន១៣៦៧២៥៣នាក់។

ចំណែកភ្ញៀវទេសចរជាតិវិញមានចំនួន៤,៦៦៣,០៨២នាក់ ថយចុះ៣៥.៥% និងភ្ញៀវអន្តរជាតិដែលស្នាក់នៅកម្ពុជាមានចំនួន២៧៩,២៧៨នាក់ ថយចុះ៨៤.៦% បើធៀបនឹងឆ្នាំ២០២០កន្លងទៅ។

ចំនួនភ្ញៀវទេសចរនៅកម្ពុជាបានធ្លាក់ចុះយ៉ាងគំហុកនេះដោយសារប្រទេសកម្ពុជា ក៏ដូចជាតំបន់ និងពិភពលោកនៅមិនទាន់ធូរស្រាលពីវិបត្តិនៃការរីករាលដាលជំងឺកូវី១៩នៅឡើយ។ មិនតែប៉ុណ្ណោះ ជំងឺដ៏កាចសាហាវនេះក៏មានការបំប្លែងខ្លួនថ្មីជាបន្តបន្ទាប់ ដូចជា ប្រភេទជំងឺកូវីដ១៩បម្លែងខ្លួនថ្មីអូមីក្រុង៕

អត្ថបទ៖ សំអឿន