ពេញ១ខែមករា កម្ពុជាទទួលបានភ្ញៀវទេសចរជាង ៣លាននាក់

រយៈពេលពេញមួយខែមករា ឆ្នាំ២០២២ មានភ្ញៀវទេសចរប្រមាណ ៣,១៥៨,៥៣៧នាក់ ដែលបានដើរកម្សាន្ត នៅតាមគោលដៅទេសចរណ៍នានាទូទាំងប្រទេស ដោយបូកបញ្ចូលទាំងបុណ្យឆ្លងឆ្នាំសកលផង។

ក្រសួងទេសចរណ៍បានបង្ហាញរបាយការណ៍ថា ភ្ញៀវទេសចរផ្ទៃក្នុងនៅចុងសប្តាហ៍ ចាប់ពីថ្ងៃទី២៩ ដល់ថ្ងៃទី៣០ ខែមករា ឆ្នាំ២០២២ សរុបចំនួន ២១៤,៦៣៣នាក់ ក្នុងនោះភ្ញៀវជាតិមានចំនួន ២០២,៧០៤ នាក់ និងភ្ញៀវបរទេសផ្ទៃក្នុង១១,៩២៩នាក់។

រដ្ឋមន្រ្តីក្រសួងទេសចរណ៍​លោក ថោង ខុន បានលើកឡើងថា ការចេញដើរកម្សាន្តរបស់ពលរដ្ឋនេះ  ជាសញ្ញាវិជ្ជមាននៃការងើបឡើងវិញ នៃវិស័យទេសចរណ៍ផ្ទៃក្នុងសម្រាប់ឆ្នាំ២០២២នេះ។

បើតាមក្រសួងទេសចរណ៍ តំបន់គោលដៅទេសចរណ៍សំខាន់ៗ របស់កម្ពុជា រួមមានខេត្តព្រះសីហនុ ទទួលបានភ្ញៀវទេសចរប្រមាណ ៥៧,៨២៣ នាក់ , រាជធានីភ្នំពេញមាន ៣៤,០៦៥ នាក់, ខេត្តពោធិ៍សាត់ ២០,០១៤ នាក់,  ខេត្តបាត់ដំបង ១៦,៧៨៣ នាក់ ,ខេត្តសៀមរាប ១៦,៥៤៦ នាក់,  ខេត្តកំពត ១៣,៧០៨ នាក់។

ក្រសួងទេសចរណ៍ បានបន្តណែនាំឲ្យមន្ទីរទេសចរណ៍ ប្រតិបត្តិករទេសចរណ៍ និងវិស័យឯកជន បន្តពង្រឹងការអនុវត្តវិធានសុវត្ថិភាព ទេសចរណ៍ និង SOP ឲ្យបានគ្រប់មូលដ្ឋានអាជីវកម្មទេសចរណ៍ ពិសេសនាឱកាសចូលឆ្នាំប្រពៃណីចិននេះ ដែលអាចមានភ្ញៀវទេសចរចេញដើរកម្សាន្តតាមគោលដៅទេសចរណ៍នានានៅទូទាំងប្រទេស៕ អត្ថបទ៖ ទួន សុផល