ឆ្នាំ២០២១ ក្រសួងការងារ បានផ្សះផ្សាវិវាទការងារបានជិត៨៥០ករណី

នៅក្នុងឆ្នាំ២០២១កន្លងទៅនេះ ក្រសួងការងារ និងបណ្តុះបណ្តាលវិជ្ជាជីវៈ បានផ្សះផ្សាវិវាទការងារបានចំនួន៨៤៩ករណី ក្នុងនោះ បានទទួលបានលទ្ធផលផ្សះផ្សាបានចំនួន៥៥៣ករណី មិនផ្សះផ្សាបានចំនួន២៣០ករណី និងមោឃៈចំនួន៦៦ករណី។ នេះ បើយោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈដែលទើបចេញផ្សាយកាលពីល្ងាចថ្ងៃទី២៥ ខែកុម្ភៈ។

របាយការណ៍ដដែល បានឱ្យដឹងថា ក្នុងចំណោមវិវាទការងារទាំងនោះ មានវិវាទការងាររួមចំនួន១៥៤ករណី និងបញ្ជួនសំណុំរឿងទៅក្រុមប្រឹក្សាអាជ្ញាកណ្តាលចំនួន៤៣ករណី ក្នុងនោះ បានចេញសេចក្តីបង្គាប់ចំនួន៣៥ករណី ផ្សះផ្សាបានដោយក្រុមប្រឹក្សាអាជ្ញាកណ្តាលចំនួន០៥ករណី និងផ្សះផ្សាបានដោយភាគីទាំងពីរចំនួន៣ករណី។ ជាមួយគ្នានេះ ឆ្នាំ២០២១ក្រសួងការងារ បានអន្តរាគមន៍ដោះស្រាយបញ្ហាកូដកម្មចំនួន៦២ករណី ក្នុងនោះ ៩៣,៥៥ភាគរយ ត្រូវបានដោះស្រាយ និងបានអន្តរាគមន៍ដោះស្រាយបញ្ហាបាតុកម្មចំនួន១៣ករណី ដោយបានដោះស្រាយបាន ១០០ភាគរយ។

នៅក្នុងពិធីបិទសន្និបាតសមិទ្ធផលការងារសម្រេចបានក្នុងឆ្នាំ២០២១ និងទិសដៅត្រូវអនុវត្តបន្តសម្រាប់ឆ្នាំ២០២២ដែលធ្វើឡើងតាមរយៈប្រព័ន្ធវីឌីអូខនហ្វឺរិន (ZOOM) កាលពីរសៀលថ្ងៃទី២៥ ខែកុម្ភៈ ឆ្នាំ២០២២ លោកបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងពីការបន្តពង្រឹងយន្តការដោះស្រាយវិវាទការងារឱ្យទទួលបានអត្រាផ្សះផ្សាបានឱ្យកាន់តែខ្ពស់ សំដៅឆ្លើយតបនឹងតម្រូវការភាគីវិវាទ និងដាក់ឱ្យដំណើរការសាកល្បងការដោះស្រាយវិវាទបុគ្គល ដោយក្រុមប្រឹក្សាអាជ្ញាកណ្តាលព្រមទាំងពង្រឹងការអនុវត្តសេរីភាពអង្គការវិជ្ជាជីវៈឱ្យបានត្រឹមត្រូវស្របតាមលិខិតបទដ្ឋានគតិយុត្តជាតិជាធរមាន និងអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ន។

ទន្ទឹមនឹងនេះ លោករដ្ឋមន្ត្រី ក៏បានបន្តពង្រឹងអគ្គលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្ម បាតុកម្ម នៅតាមគ្រប់ មុខសញ្ញា សំដៅអនុវត្តឱ្យទទួលបានប្រសិទ្ធភាពខ្ពស់តាមសារាចរណែនាំរបស់រាជរដ្ឋាភិបាល បទបញ្ជារបស់រាជរដ្ឋាភិបាល និងផែនការស្តីពីការដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញាសម្រាប់ ឆ្នាំ២០២០- ២០២៤ ដើម្បីធានាសន្តិភាព ស្ថិរភាពនយោបាយ និងសុខដុមនីយកម្មទំនាក់ទំនងវិជ្ជាជីវៈ៕

ដោយ ៖ សំអឿន