អាកាសធាតុរដូវប្រាំងឆ្នាំនេះ មិនក្ដៅខ្លាំងដូចឆ្នាំមុនៗ

មន្ត្រីជាន់ខ្ពស់ក្រសួងធនធានទឹក និងឧតុនិយមបានឱ្យដឹងថា សីតុណ្ហភាពនៅឆ្នាំ ២០២២នេះ មិនកើនឡើងខ្ពស់ខ្លាំងនោះទេ ដោយសារតែកម្ពុជាបន្តទទួលបាតុភូតឡានីញ៉ា។

លោក ចាន់ យុត្ថា​ រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម​បានឱ្យដឹងថា ដោយសារតែកម្ពុជាបន្តទទួលបាតុភូតឡានីញ៉ា ដូច្នេះនៅរដូវប្រាំងឆ្នាំនេះ សីតុណ្ហភាពមិនកើន​ខ្ពស់ខ្លាំង ដូចពេលដែលកម្ពុជាទទួលឥទ្ធិពលបាតុភូត ​El Nino ទេ ប៉ុន្តែជាទូទៅខែចែត្រនេះគឺ ជាខែមួយដែលសីតុណ្ហភាពខ្ពស់បំផុតនៅអំឡុងពេលចូលឆ្នាំខ្មែរ។

នៅឆ្នាំមុនៗ សីតុណ្ហភាព បានឡើងកម្ដៅពី ៣៧ ទៅ ៤០ អង្សា ដោយសារតែបាតុភូត ​El Nino។

លោក ចាន់ យត្ថា បញ្ជាក់ថា ឆ្នាំនេះ គឺជាឆ្នាំទី១ដែល កម្ពុជាទទួលរងឥទ្ធិពលឡានីញ៉ា និងភ្លៀង​កក់ខែ​បន្តធ្លាក់រាយប៉ាយជាបន្តបន្ទាប់ ដូច្នេះសីតុណ្ហភាព នៅក្នុងខែមេសានេះ មិនខ្ពស់ខ្លាំង នោះទេ៕