កម្ពុជាអភិវឌ្ឍ​តំបន់ឆ្នេរ​សមុទ្រ​ឱ្យកាន់​តែស្រស់ស្អាត​ថែមទៀត​ ដើម្បី​ទាក់ទាញ​ភ្ញៀវទេសចរ

លោក ថោង ខុន ​រដ្ឋមន្ត្រីក្រសួងទេសចរណ៍​មានប្រសាសន៍ថា​ រាជរដ្ឋាភិបាលកម្ពុជា​បានទាញ​យក​ឱកាសដែលពិភពលោកក៏ដូចជាកម្ពុជា​កំពុងជួបវិបត្តិ​ការរាតត្បាតជំងឺកូវីដ១៩​ ប្រែក្លាយទៅជាឱកាស​អភិវឌ្ឍតំបន់ឆ្នេរសមុទ្រកម្ពុជា​ ដើម្បីបង្កើនភាពភាពទាក់ទាញភ្ញៀវទេសចរ​ជាតិ និង​អន្តរជាតិ​អញ្ជើញ​ទៅទស្សនា​ឱ្យកាន់តែច្រើន​បន្ថែមទៀត​បន្ទាប់ពីស្ថានការណ៍កូវីដ១៩​បានធូរស្រាល​ឡើង​វិញ។

​ថ្លែងបើកសិក្ខាសាលាផ្សព្វផ្សាយ ​ស្តីពីបទដ្ឋានគតិយុត្តនានាក្នុងការគ្រប់គ្រង​ និងអភិវឌ្ឍន៍តំបន់ឆ្នេរ​សមុទ្រកម្ពុជា នៅសាលាខេត្តកែប ថ្ងៃទី ៣០ ខែឧសភា ២០២២នេះ លោក ថោង ខុន ​រដ្ឋមន្ត្រីក្រសួងទេសចរណ៍ និងជា​អនុប្រធាន​​អចិន្ត្រៃយ៍គណៈកម្មាធិការជាតិគ្រប់គ្រង​ និងអភិវឌ្ឍន៍តំបន់ឆ្នេរ​សមុទ្រកម្ពុជា​បញ្ជាក់ថា ​បន្ទាប់ពីឆ្នេរសមុទ្រកម្ពុជា​ ដូចជា​ ឆ្នេរសមុទ្រនៅខេត្តកែប​ កំពត​ ព្រះសីហនុ​ និងខេត្តកោះកុង​ បាន​ដាក់បញ្ចូលសមាជិកក្លឹបឆ្នេរសមុទ្រ​ដែលស្អាតជាង​គេបំផុត​លើ​ពិភព​លោក នៅថ្ងៃទី ២៥ ខែឧសភា ឆ្នាំ២០១១​ មក បណ្តាឆ្នេរសមុទ្រកម្ពុជានៅតាម​បណ្តាខេត្ត​ទាំងនេះ​ គឺទទួលបាន​ការអភិវឌ្ឍតំបន់​ឆ្នេរសមុទ្រជា​បន្តបន្ទាប់​ដើម្បីបង្កើនភាពទាក់​ទាញ​ភ្ញៀវទេសចរជាតិអន្តរជាតិ​ទៅទស្សនាកម្សាន្ត។

​លោករដ្ឋមន្ត្រីបានបន្តទៀតថា ក្នុងនោះខេត្តកែប​ទទួលបានការអនុវត្ត​គម្រោងម្រោងឆ្នេរខ្សាច់​​កម្សាន្តកម្រិតខ្ពស់ប្រវែង ២.៧០០ ម៉ែត្រ​ ដែលបានគិតគូរយ៉ាងខ្លាំង​ទៅលើការបង្កើតឆ្នេរខ្សាច់​កម្សាន្ត​របស់រដ្ឋ​ឱ្យ​មានទេសភាព​ស្រស់ស្អាត ​បែបប្រណិត ​ដើម្បីអភិវឌ្ឍន៍ផលិត​ផលទេសចរណ៍ ​និង​ការបង្កើនភាពទាក់ទាញភ្ញៀវទេសចរ​មកទស្សនាខេត្តកែប​។

​លោក សោម ពិសិដ្ឋ អភិបាល​ នៃគណៈអភិបាលខេត្តកែប​មានប្រសាសន៍​ថា​ កន្លង​មកថ្មីៗនេះ​គណៈកម្មាធិការជាតិគ្រប់គ្រង​ និងអភិវឌ្ឍតំបន់ឆ្នេរសមុទ្រកម្ពុជា​ បាន​ជួយឧបត្ថម្ភ​គ្រឿងចក្រ​សម្អាតឆ្នេរជួយលើការកែលម្អឆ្នេរខ្សាច់កម្សាន្ត​សម្រាប់ការប្រឡង​ប្រណាំង​ឆ្នេរស្អាត​ និងការផ្តល់នូវគម្រោងឆ្នេរខ្សាច់​កម្សាន្ត​កម្រិតខ្ពស់​ប្រវែង ​២.៧០០ម៉ែត្រ ​ស្ថិត​នៅ​ភូមិថ្មី ​សង្កាត់ព្រៃធំ ក្រុងកែប ដែលគម្រោងនេះ បានជះឥទ្ធិពលយ៉ាងធំធេងដល់រដ្ឋបាលខេត្ត លើវិស័យ​ទេសចរណ៍ និងបានជួយទាក់ទាញវិនិយោគិនមកទំនាក់ទំនងលើគម្រោងអភិវឌ្ឍ​នានាមានទីក្រុងរណប​ គម្រោងអភិវឌ្ឍតាមបណ្ដាកោះ ​និងតាមបណ្ដោយឆ្នេរជាដើម។

ស្ថិតិក្រសួងទេសចរណ៍បង្ហាញថា ក្នុងរយៈពេល៤ខែ ដើមឆ្នាំ២០២២ ​តំបន់ឆ្នេរសមុទ្រ​កម្ពុជា ទទួលបាន​ទេសចរអន្តរជាតិមក កម្សាន្តមានចំនួនសរុប ១៨០,៦៥២ នាក់ កើនឡើង ៣១០.៥%​ បើធៀបនឹងឆ្នាំ២០២១ ​ហើយទេសចរជាតិមក​ កម្សាន្តមានចំនួនសរុប​ ១,៩៤៥,៤០៩ នាក់ កើនឡើង ១១៤.៦%បើធៀប​នឹងឆ្នាំ២០២១ មាន​ចំនួនសរុប ៩០៦,៣៧២​នាក់។ ដោយឡែក ខេត្តកែប សម្រាប់​៥ខែដើមឆ្នាំ២០២២ទទួលបានភ្ញៀវទេសចរមកទស្សនាសរុប ៧,៧៥៩ នាក់ កើន​ឡើង ៣៨១%៕

អត្ថបទ៖ សំអឿន