ព័ត៌មានជាតិ

សម្តេចពិជ័យសេនា ទៀ បាញ់ ៖ ការធ្វើទំនើបកម្ម ការចាត់ចែងមូលដ្ឋានទ័ពរាម ជាសមត្ថកិច្ចរបស់កម្ពុជា

បានផុស

៤ years មុន

នៅ

ថ្ងៃពុធ ៨ មិថុនា ២០២២

ដោយ

ការលើកឡើងរបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា នៅក្នុងពិធីបញ្ចុះបឋមសិលា និងបើកការដា្ឋនសាងសង់រោងជាងជួសជុលនាវា ផែសំចត និងស្ដារឃ្លង នៅមូលដ្ឋានសមុទ្ររាម ខេត្តព្រះសីហនុ នៅថ្ងៃទី០៨ ខែមិថុនា ឆ្នាំ២០២២នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចពិជ័យសេនា ទៀ បាញ់ មានប្រសាសន៍ប្រាប់អ្នកសារព័ត៌មានក្រោយពីពិធីសម្ពោធនោះថា ការចោទប្រកាន់រឿងដែនសមុទ្ររាមនេះគឺជារឿងដ៏ដែលៗគ្មានអ្វីចម្លែកនោះទេ ហើយការផ្សាយរបស់បណ្ដាញព័ត៌មានបរទេសទាំងនោះ វាហាក់ដូចជាការជប់រឿងឡើងតែម្ដង ពីព្រោះវាអត់មានរឿងអ្វីទាល់តែសោះ។

បើតាមសម្តេចពិជ័យសេនា ទៀ បាញ់ ការចាត់ចែង ការរៀបចំ ការប្រើប្រាស់ ការអភិវឌ្ឍនានា គឺជាសមត្ថកិច្ច ជាដែនអធិបតេយ្យភាពរបស់ព្រះរាជាណាចក្រកម្ពុជា។ លោកថា ការធ្វើទំនើបកម្មនេះ គឺជាជំនួយអភិវឌ្ឍរបស់ចិន ក្នុងការអភិវឌ្ឍដែនសមុទ្ររាមនេះ ដើម្បីធ្វើឱ្យកងយោពលខេមរភូមិនមានសមត្ថភាព និងការការពារដែនអធិបតេយ្យភាពរបស់ខ្លួន ការពារដែនដីរបស់ខ្លួន ដូច្នេះគ្មានអ្វីចម្លែកទេ ហើយការអភិវឌ្ឍនេះទៀតសោត គឺជាការចាំបាច់ណាស់។ យើងកំពុងមានការខ្វះខាត ដូច្នេះយើងចាំបាច់ត្រូវតែធ្វើការអភិវឌ្ឍ។

បើតាមសម្តេចពិជ័យសេនា ទៀ បាញ់ ការធ្វើទំនើបកម្មលើមូលដ្ឋានទ័ពរាម គឺជាការចាំបាច់បំផុត ហើយបន្ទាប់ពីមានការផ្ដល់ជំនួយពីរដ្ឋាភិបាលចិននេះ សម្ដេចមានក្តីសប្បាយរីករាយជាខ្លាំង។ សម្តេចពិជ័យសេនាបញ្ជាក់ទៀតថា ការអភិវឌ្ឍបែបនេះ ពិតណាស់ថា វានឹងធ្វើឲ្យប្រទេសមួយចំនួនគេមិនសប្បាយចិត្ត ហើយករណីនេះមានពីរឿង គឺទី១, កម្ពុជាមានការអភិវឌ្ឍ ក៏ធ្វើឲ្យគេមិនសប្បាយចិត្តដែរ ទី២, ការធ្វើទំនើបកម្មនឹងធ្វើឲ្យគេមានការថមថយឥទ្ធិពល ដែលគេចង់ដាក់ការត្រួតត្រាណាមួយមកលើកម្ពុជា ដូច្នេះគេនៅតែបង្ករឿង បង្កហេតុមិនឈប់ឈរ។

ឆ្លើយតបសំណួរអ្នកសារព័ត៌មានទាក់ទងទៅនឹងការដាក់ទណ្ឌកម្ម ពីរដ្ឋាភិបាលអាមេរិក ផ្ដើមចេញពីការអភិវឌ្ឍដែនសមុទ្ររាមនេះ សម្ដេចពិជ័យសេនា ទៀ បាញ់ បានលើកឡើងថា ការដាក់ទណ្ឌកម្មណាមួយ យើងមិនអាចឃាត់គេបានទេ ស្រេចតែគេ។ គេចង់ដាក់លើអ្នកណា ដែលមិនបម្រើផលប្រយោជន៍ឲ្យគេ ហើយមិនថា តែកម្ពុជា ឬមន្ត្រីជាន់ខ្ពស់កម្ពុជាទេ។ ពាសពេញពិភពលោក គឺគេតែងតែដាក់ទណ្ឌកម្មជាបន្តបន្ទាប់ ហើយនេះ គឺជាអាវុធរបស់គេ ដែលគេតែងតែធ្វើជាបន្តបន្ទាប់ ដូច្នេះសម្តេចមិនមានកង្វល់អ្វីទេ បើយើងទៅហាមគេ ក៏ប្រហែលជាមិនបានដែរ…។

សម្ដេចពិជ័យសេនា ទៀ បាញ់ បញ្ជាក់ទៀតថា កម្ពុជាក៏បានប្រឆាំងចំពោះការដាក់ទណ្ឌកម្មនេះដែរ ពីព្រោះការដាក់ទណ្ឌកម្មនេះ គ្មាននាំមកនូវការរីកចម្រើនទេ ទាំងអ្នកដាក់ទណ្ឌកម្ម ទាំងអ្នករងទណ្ឌកម្ម គឺគ្មានការរីកចម្រើនអីទេ មានតែនាំមកនូវការលំបាកដូចតែគ្នា៕

ដោយ ៖ កោះកែវ