បារាំងពិនិត្យលទ្ធភាពក្នុងការកែលម្អអាកាសយានដ្ឋានខេត្តបាត់ដំបង

បារាំង ចាប់អារម្មណ៍ការកែលម្អ ទៅលើគម្រោងដាក់ឱ្យដំណើរការឡើងវិញ អាកាសយានដ្ឋានបាត់ដំបង ដើម្បីរួមចំណែកលើកស្ទួយវិស័យដឹកជញ្ជូន និងទេសចរ។

លោក សុខ លូ អភិបាលខេត្តបាត់ដំបងរាជរដ្ឋាភិបាល បានឯកភាពជាគោលការណ៍ដល់អាការចរណ៍ស៊ីវិលកែលម្អ អាកាសយានដ្ឋាបាត់ដំបង ឱ្យក្លាយទៅជាអាកាសយានដ្ឋាន ប្រភេទ4C ដែលមានកម្រិតស្មើនឹងខេត្តសៀមរាប ហើយបច្ចុប្បន្នក្រុមការងារកំពុងតែរៀបចំលើគម្រោងមួយនេះ។

លោក ហ្សាក់ ប៉ឺឡេ (Jacques Pellet) ឯកអគ្គរដ្ឋទូតបារាំងប្រចាំប្រទេសកម្ពុជា ចាប់អារម្មណ៍ទៅលើគម្រោង​ដាក់ឱ្យដំណើរការឡើងវិញអាកាសយានដ្ឋានបាត់ដំបង ដែលនេះគឺជាផ្លូវមួយឈានទៅ​រកការដឹកជញ្ជូនកាន់តែមាន​ភាពងាយស្រួល និងរួមចំណែកលើកស្ទួយនៅក្នុងវិស័យដឹកជញ្ជូននៅខេត្តបាត់ដំបង ឱ្យកាន់តែមានការរីកចម្រើន។

លោក ហ្សាក់ ប៉ឺឡេ ប្រទេសបារាំងនឹងបន្តពង្រឹងកិច្ចសហប្រតិបត្តិការជាមួយកម្ពូជា ក្នុងន័យ អភិវឌ្ឍឱ្យកាន់តែមាន​ការរីកចម្រើន និងបន្តផ្សព្វផ្សាយដល់ភ្ញៀវទេសចរ និងអ្នកវិនិយោគ ឱ្យមកខេត្តបាត់ដំបងកាន់តែច្រើនថែមទៀត។

ឯកអគ្គរដ្ឋទូតបារាំងប្រចាំប្រទេសកម្ពុជា ថ្លែងចំណាប់អារម្មណ៍បែបនេះ នៅក្នុងជំនួបសម្តែងការគួរសម និងពិភាក្សាការ​ងារជាមួយអភិបាលខេត្តបាត់ដំបង នាពេលថ្មីៗនេះ។

ការស្ដារឡើងវិញនូវអាកាសយានដ្ឋាននេះ នឹងអភិវឌ្ឍពីអាកាសយានដ្ឋានប្រភេទ3C ទៅជាអាកា​ស​យានដ្ឋានប្រភេទ4C ដោយផ្អែកទៅតាមតម្រូវការ និងធ្វើឱ្យមានភាពងាយស្រួល ដល់ក្រុមហ៊ុនអាកាសចរក្នុងស្រុក ដែលមានយន្តហោះ​ប្រភេទ Airbus ឬ Boeing អាចបើកជើងយន្តហោះមកទីរួមខេត្តបាត់ដំបងបាន ជាពិសេសអាចមានជើង​ហោះហើរ​ទៅក្រៅស្រុកបានផងដែរ។

សូមបញ្ជាក់ថា ព្រលានយន្តហោះខេត្តបាត់ដំបង បានចាប់ផ្តើមបើកដំណើរការដំបូងនាអំឡុងឆ្នាំ១៩៦៧ ដោយមានជើង​ហោះ​ហើរ​រវាងភ្នំពេញ-បាត់ដំបង ហើយត្រូវបិទដំណើរការទាំងស្រុងត្រឹមឆ្នាំ១៩៧៥ ខណៈរបបខ្មែរក្រហម កាន់កាប់​អំណាច។ ក្រោយរបបនេះបានដួលរលំ ព្រលានយន្តហោះខេត្តបាត់ដំបងក៏ត្រូវបើកដំណើរការឡើងវិញ ប៉ុន្តែបម្រើ​ឱ្យតែវិស័យអាកាសចរណ៍យោធាប៉ុណ្ណោះ ក្រោយមកទៀតនាអំឡុងឆ្នាំ១៩៩១ ចំណតអាកាសយានដ្ឋាននេះ​ត្រូវបិទដំណើរការ​រហូតដល់បច្ចុប្បន្ន។ អាកាសយានដ្ឋាននេះ បានសាងសង់លើផ្ទៃដីជិត​១ម៉ឺនហិកតា៕