សម្តេចធិបតី ជម្រាបប្រធានាធិបតីបារាំង ៣ចំណុចសំខាន់ៗដែលថៃកំពុងចូលជ្រៅកាន់កាប់ទឹកដីកម្ពុជាខុសច្បាប់

ក្នុងឱកាសដ៏កម្រនៃជំនួបមេដឹកនាំកំពូលកម្ពុជា-បារាំង នៅថ្ងៃទី ០៨ ខែមេសា ឆ្នាំ ២០២៦ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានជម្រាបជូនប្រធានាធិបតីបារាំង លោក អេម៉ានុយអែល ម៉ាក្រុង ប្រធានាធិបតីបារាំង នូវ៣ចំណុចសំខាន់ៗដែលយោធាថៃបន្តរុលចូលមកជ្រៅកាន់កាប់ទឹកដីកម្ពុជាដោយខុសច្បាប់។ នេះបើតាម លោក តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ថ្លែងនៅក្នុងសន្និសីទព័ត៌មានស្តីពីលទ្ធផលដំណើរនាយករដ្ឋមន្រ្តីកម្ពុជាទៅក្រៅប្រទេស។

នៅក្នុងជំនួបជាមួយលោក ម៉ាក្រុង, សម្តេចធិបតី បានឡើងពីការពិត ដោយឈរលើគោលការណ៍មួយច្បាស់នោះ គឺកម្ពុជាត្រូវតែផ្សព្វផ្សាយលាតត្រដាងស្ថានភាពនៅតាមបណ្តោយព្រំដែនជាមួយថៃ ដោយមិនបំផ្លើសឱ្យហួសការពិត តែទន្ទឹមនឹងនេះដោយមិនបង្រួញឱ្យតូចជាការពិតនោះទេ។ ក្នុងន័យនេះ សម្តេចធិបតី បាន​ប្រាប់ប្រធានាធិបតីបារាំង ៣ចំណុច សំខាន់ៗ ទី ១ ភាពតានតឹងជាមួយថៃកំពុងបន្តគ្របដណ្តប់ទៅលើបណ្តោយព្រំដែនកម្ពុជា-ថៃ។ ការលើក​ឡើងនេះ មូលហេតុមកពីកងទ័ពថៃបានចូលជ្រៅហួសព្រំដែនស្របច្បាប់មកក្នុងទឹកដីកម្ពុជា ហើយកំពុងកាន់កាប់ទឹកដីទាំងអស់នោះ ដោយខុសច្បាប់អន្តរជាតិ។

មិនតែប៉ុណ្ណោះកងទ័ពថៃកម្ទេចផ្ទះសម្បែងរបស់ប្រជាជនខ្មែរ និងរារាំងប្រជាជនខ្មែររាប់ម៉ឺននាក់មិនឱ្យមានលទ្ធភាពត្រឡប់ទៅផ្ទះសម្បែងរបស់ពួកគាត់វិញ។ ព្រមទាំងបានសាងសង់នៅលើដែនដីកាន់កាប់ទាំងអស់នោះ ផ្លូវថ្នល់ និងហេដ្ឋារចនាសម្ព័ន្ធផ្សេងៗនៅទីនោះទៀតផង។

ចំណុចទី២ គឺដាច់ខាតកម្ពុជាមិនទទួលឡើយនូវស្ថានភាព ការកែប្រែខ្សែបន្ទាត់នយោបាយព្រំដែនដោយខុសច្បាប់អន្តរជាតិ។ បានន័យថា ទោះបីជាថៃបានឈ្លានពានយក និងបានកាន់កាប់ដីទាំងអស់នោះមែនពិត ក៏ទឹកដីទាំងនោះតែជាដីកម្មសិទ្ធិស្របច្បាប់ប្រកែកមិនបានរបស់ប្រទេសកម្ពុជា។ ចំណុចទី ៣ សម្តេចធិបតី ជម្រាបលោក ម៉ាក្រុង ថាកម្ពុជានៅតែប្រកាន់ភ្ជាប់ជំហរដោះស្រាយជម្លោះព្រំដែនជាមួយថៃ ដោយសន្តិវិធី និងផ្អែកលើច្បាប់អន្តរជាតិ សន្ធិសញ្ញាដែលមានស្រាប់ និងគ្រប់កិច្ចព្រមព្រៀងដែលថៃ និងកម្ពុជា បានចុះហត្ថលេខា មកទល់ពេលនេះ។

លោក តាន់ ហ្សង់ហ្វ្រង់ស័រ បានពន្យល់ទៀតថា ទោះបីជាបារាំងជាមិត្តរបស់កម្ពុជាយ៉ាងណាក៏ដោយសម្តេចធិបតី មិនបានសុំបារាំងឱ្យកាន់ជើងកម្ពុជានោះទេ តែសម្តេចធិបតី ស្នើសុំឱ្យប្រទេសបារាំង បន្តលើកតម្កើងគោលការណ៍របស់ខ្លួនដែលស៊ីសង្វាក់គ្នាខ្លាំងមែនទែន និងគោលការណ៍នៃប្រទេសកម្ពុជា នោះគឺការគោរពច្បាប់អន្តរជាតិ គោរពអធិបតេយ្យភាព និងបូរណភាពទឹកដីនៃបណ្តាលប្រទេសនានាក្នុងពិភពលោក។

លោក តាន់ ហ្សង់ហ្វ្រង់ស័រ បញ្ជាក់ថា៖«សម្តេចធិបតី មិនសុំការគាំទ្រ ឬការកាន់ជើងកម្ពុជាពីសំណាក់បារាំង ពីព្រោះតាំងពីដើមទីមក មានរួចស្រេចមកហើយ អន្តរាគមន៍របស់អាមេរិក ចិន និងយន្តការរបស់អាស៊ាន ហើយយន្តការទាំងអស់នេះ ថែមទាំងជួយកសាងបាននូវបទឈប់បាញ់២លើក លើកទី១ខែកក្កដា ឆ្នាំ ២០២៥ និងលើកទី២ ខែធ្នូ ឆ្នាំ ២០២៥»៕