ព័ត៌មានជាតិ
រដូវបុណ្យភ្ជុំបិណ្ឌមកដល់ កូនខ្មែរធ្វើបុណ្យតែកុំភ្លេចព្រះរស់នៅផ្ទះ
ការធ្វើបុណ្យ គឺត្រូវធ្វើដោយចិត្តបរិសុទ្ធ និងជ្រះថ្លា ហាមដាច់ខាតកុំឱ្យមានកំហឹងមួម៉ៅក្នុងខ្លួន អាចនាំឲ្យបុណ្យកុសលដែលអ្នកបានធ្វើ កំពប់ទៅតាមចិត្តមិនបរិសុទ្ធដូចគ្នា។ រឿងដែលសំខាន់នោះគឺ ធ្វើបុណ្យនៅទីវត្តអារាមជិតក្តី ឆ្ងាយក្តី មុននឹងចេញពីផ្ទះ គួរគប្បីគោរពសំពះឳពុកម្តាយនៅផ្ទះឱ្យបានល្អ មុននឹងចេញទៅធ្វើបុណ្យនៅឯវត្ត។
រដូវកាលបុណ្យភ្ជុំបិណ្ឌឈានចូលមកដល់ ប្រជាជនខ្មែរគ្រប់រូបបាននាំគ្នាទៅវត្ត ធ្វើបុណ្យជូនញាតិកាទាំង៧សន្តាន ដែលបានចែកឋានទៅ យ៉ាងច្រើនកុះកររយៈពេលប៉ុន្មានថ្ងៃកន្លងមកនេះ។ ក្នុងនោះ ក៏មានប្រជាជនមួយចំនួនបានទៅវត្តជួបជុំជាមួយក្រុមគ្រួសារ ក្រុមការងារ ឬក្រុមមិត្តភក្តិរបស់ពួកគេ។ ទន្ទឹមជាមួយនឹងការទៅវត្ត ធ្វើបុណ្យសន្សំកុសលនេះ ពុទ្ធបរិស័ទគ្រប់រូប គួរគួប្បីកុំភ្លេច ជូនបាយទឹក ម្ហូបអាហារ ក៏ដូចជាភេសជ្ជៈផ្សេងៗ ដល់លោកអ្នកមានគុណនៅផ្ទះជាមុនសិន មុននឹងយកចង្ហាន់ទៅប្រគេនដល់ព្រះសង្ឃនៅវត្ត ព្រោះថាលោកទាំងពីរ ជាអ្នកមានគុណខ្លាំងបំផុតក្នុងជីវិតមនុស្សម្នាក់ៗ។
គុណឳពុកម្តាយ គឺធំធេងណាស់គ្មានអ្វីអាចកាត់ថ្លៃលើគុណលោកទាំងពីរបានឡើយ លោកបានបង្កើតបុត្រមក ចិញ្ចឹមបីបាច់ថែរក្សា ថ្នាក់ថ្នមកូនដោយក្តីស្រលាញ់ អប់រំកូនដោយ ដំបូន្មានល្អៗ និងជាអ្នកស្រលាញ់ជាងនរណាទាំងអស់។ ដូច្នេះមុននឹងធ្វើអ្វីមួយ អ្នកគួរនឹកដល់លោកទាំងពីរមុនគេ មិនថាទៅធ្វើបុណ្យនៅវត្ត ឬ ទៅទីកន្លែងណាក៏ដោយ។
មិនថាពេលបុណ្យទាន ឬ ជាថ្ងៃធម្មតាឡើយ កូនគ្រប់រូបមិនគួរប្រើសម្តីសោះអង្គើយ ទ្រគោះបោះបោកចំពោះលោកទាំងពីរទេ។ ផ្ទុយទៅវិញ កូនគ្រប់រូបទាំងអស់ គួរគោរពប្រតិបត្តិឳពុកម្តាយឲ្យបានល្អ ផ្តល់ជូនលោកនូវពាក្យសម្តីពីរោះពិសា ការគោរព ជាមួយនឹងក្តីស្រលាញ់ និងការដឹងគុណចំពោះលោកទាំងទ្វេ។
ព្រះតេជគុណ អឿន រិទ្ធិ គង់នៅវត្ត្តចង្រ្កានតាព្រហ្មស្ទឹងមានជ័យ មានថេរដីការដល់ប្រជាជនកម្ពុជាគ្រប់រូបថា មុននឹងបំពេញនូវបុណ្យកុសលណាមួយ ពុទ្ធបរិស័ទគ្រប់រូប កុំភ្លេចឱ្យសោះព្រះរស់ ឬ ព្រះកន្លោងដែលនៅក្នុងផ្ទះ។ ព្រះតេជគុណ អឿន រិទ្ធិ មានថេរដីការថា៖ “មាតាបិតា គឺជាព្រះរស់ ដែលមនុស្សប្រុសស្រី គួរតែគោរពបូជា ឱនលំទោន អញ្ចឹងមុននឹងយើងបំពេញបុណ្យកុសលអ្វីមួយ យើងកុំភ្លេចឱ្យសោះព្រះរស់។ មុននឹងយើងបំពេញបុណ្យកុសលនៅខាងក្រៅ យើងគួរតែធ្វើបុណ្យ ធ្វើកុសលជាមួយនឹងព្រះរស់យើងសិន។ បុណ្យហ្នឹងហើយ ជាបុណ្យដែលព្រះពុទ្ធសាសនាយើង ឱ្យតម្លៃបំផុត កាលដែលយើងចេះដឹងគុណអ្នកមានគុណរបស់យើង មាតាបិតា ហ្នឹងឯង”។
យ៉ាងណាមិញ ព្រះពុទ្ធបានប្រៀនប្រដៅពីតួនាទីរបស់កូនប្រុសស្រីគ្រប់រូបថា កូនគ្រប់រូបជាអ្នកគោរពកាតព្វកិច្ចល្អ មើលថែអ្នកមានគុណ នៅពេលដែលខ្លួនធំដឹងក្តីឡើងមក។ ឳពុកម្តាយ ធ្លាប់ចិញ្ចឹមកូនបែបណា កូនត្រូវគោរព ចិញ្ចឹមលោកទាំងពីរវិញបែបនោះដូចគ្នា៕
ដោយ៖ អុន ស្រីមាន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៤ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ