ថ្ងៃបុណ្យភ្ជុំបិណ្ឌ មានករណីគ្រោះថ្នាក់ចរាចរណ៍កើតឡើង ១៣លើក បណ្ដាលឲ្យមនុស្សស្លាប់ ១១នាក់ និងរងរបួស ១៩នាក់ 

ថ្ងៃទី ២៥ ខែកញ្ញា ឆ្នាំ ២០២២ ដែលចំថ្ងៃបុណ្យភ្ជុំបិណ្ឌ មានករណីគ្រោះថ្នាក់ចរាចរណ៍កើតឡើង ១៣លើក បណ្ដាលឲ្យមនុស្សស្លាប់ ១១នាក់ និងរងរបួស ១៩នាក់។ នេះបើយោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ។

របាយការណ៍ ដែលផ្សព្វផ្សាយនៅថ្ងៃច័ន្ទនេះ បានឲ្យដឹងថា កាលពីថ្ងៃទី ២៥ ខែកញ្ញា ឆ្នាំ ២០២២ មានករណីគ្រោះថ្នាក់ចរាចរណ៍ផ្លូវគោក ទូទាំងប្រទេសកើតឡើងចំនួន ១៣លើក (យប់ ៦លើក) បណ្តាលឲ្យមនុស្សស្លាប់ចំនួន ១១នាក់ (ស្រី ៣នាក់) រងរបួសសរុបចំនួន ១៩នាក់(ស្រី ២នាក់) រងរបួសធ្ងន់ ១២នាក់ (ស្រី ១នាក់) រងរបួសស្រាល ៧នាក់ (ស្រី ១នាក់) មិនពាក់មួកសុវត្ថិភាព ២១នាក់ (យប់ ១២នាក់)។

របាយការណ៍ដដែល បានបញ្ជាក់ទៀតថា មូលហេតុបណ្តាលឲ្យកើតគ្រោះថ្នាក់ចរាចរណ៍នេះ រួមមាន៖ ល្មើសល្បឿន ៤ករណី, មិនគោរពសិទ្ធិ ៤ករណី, មិនប្រកាន់ស្តាំ ១ករណី, ប្រជែងគ្រោះថ្នាក់ ២ករណី, ស្រវឹង ១ករណី, សុខភាព/ងងុយ ១ករណី៕