ពលរដ្ឋយ៉ាងច្រើនកុះករចូលរួមបោះបាយបិណ្ឌ និងនាំយកចង្ហាន់ប្រគេនព្រះសង្ឃ នៅវត្តទួលខ្សាច់ ហៅវត្តកោះផ្ដៅ  

ក្នុងឱកាសបុណ្យភ្ជុំបិណ្ឌឆ្នាំនេះ នាថ្ងៃទី ២៥ ខែកញ្ញា ប្រជាពលរដ្ឋជាពុទ្ធបរិស័ទ បានអញ្ជើញចូលរួមបោះបាយបិណ្ឌ និងនាំយកចង្ហាន់ និងគ្រឿងទេយ្យទានទៅប្រគេនព្រះសង្ឃយ៉ាងច្រើនកុះករ នៅវត្តទួលខ្សាច់ ហៅវត្តកោះផ្ដៅ ដែលស្ថិតនៅក្នុងភូមិកោះផ្ដៅ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។

នៅក្នុងឱកាសនៃពិធីបុណ្យភ្ជុំបិណ្ឌឆ្នាំនេះ ប្រជាពលរដ្ឋបានបង្ហាញអារម្មណ៍សប្បាយរីករាយ និងមាន ទឹកមុខស្រស់ថ្លា ជាមួយនឹងសម្លៀកបំពាក់ជាប្រពៃណីខ្មែរយ៉ាងស្រស់ស្អាត ក្នុងការទៅធ្វើបុណ្យទានប្រកបដោយចិត្តសទ្ធាជ្រះថ្លា។

ព្រះចៅអធិការវត្ត មានថេរដីថា ប្រជាពលរដ្ឋជាពុទ្ធបរិស័ទយ៉ាងច្រើន បាននាំគ្នាអញ្ជើញមកវត្តទួលខ្សាច់ ហៅវត្តកោះផ្តៅ ដោយនាំយកចង្ហាន់ និងគ្រឿងទេយ្យទានទៅប្រគេនព្រះសង្ឃ ដែលបានគង់នៅទីវត្តអារាមនោះ ដើម្បីឧទ្ទិសកុសលផលបុណ្យទៅដល់បុព្វការីជន ដែលបានចែកឋានទៅ។  

ចំណែកប្រជាពលរដ្ឋវិញ បាននិយាយថា រៀងរាល់ឆ្នាំ នៅពេលដល់ថ្ងៃដែលត្រូវប្រារព្ធពិធីបុណ្យកាន់បិណ្ឌ និងភ្ជុំបិណ្ឌ គ្រប់បងប្អូន កូនចៅ សាច់ញាតិសន្ដានទាំងអស់ តែងតែធ្វើដំណើរទៅស្រុកកំណើត ដើម្បីជួបជុំក្រុមគ្រួសារ ដើម្បីរៀបចំម្ហូបអាហារ បាយនំបង្អែម និងចង្ហាន់យកទៅប្រគេនដល់ព្រះសង្ឃដែលគង់ចាំព្រះវស្សានៅទីវត្តអារាម៕

អត្ថបទ៖ សឹង រ៉ាត់