រយៈពេល៣ថ្ងៃនៃពិធីបុណ្យអុំទូក ភ្ញៀវទេសចរជិត២មុឺននាក់មកលេងកម្សាន្ដនៅខេត្តរតនគិរី

លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានឲ្យដឹងថា រយៈពេល៣ថ្ងៃនៃពិធីបុណ្យអុំទូក(៧.៨.៩ខែវិច្ឆិកាឆ្នាំ២០២២) ភ្ញៀវទេសចរជាច្រើនបានមកលេងកម្សាន្តនៅតាមរមណីយដ្ឋាននានាក្នុងខេត្តរតនគីរី។ ចំនួនភ្ញៀវកើនទ្បើងគួរឲ្យកត់សម្គាល់ ពោលគឺរយៈពេល៣ថ្ងៃនេះមានភ្ញៀវសរុបចំនួន១៩,១២៨នាក់ ក្មុងនោះភ្ញៀវទេសចរជាតិមានចំនួនមានចំនួន១៩,០៧៥នាក់ ភ្ញៀវទេសចរអន្តរជាតិចំនួន៥៣នាក់ ដែលចំនួននេះមានការកើនឡើង៦.៣៩%ក្នុងនោះភ្ញៀវជាតិកើនឡើង៦.៣៧% ភ្ញៀវអន្តរជាតិកើនឡើង១២.៧៧% បើប្រៀបធៀបទៅនឹងឆ្នាំ២០២១ ភ្ញៀវជាតិមានត្រឹមតែចំនួនតែ​១៧,៩៧៩។

លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានសម្តែងនូវមោទនភាពនៃការកើនឡើងភ្ញៀវទេសចរឆ្នាំនេះ ដោយការកើនឡើងនេះ គឺកើតចេញពីការគិតគូរយកចិត្តទុកដាក់ពីសំណាក់លោក ញ៉ែម សំអឿន អភិបាលខេត្ត។ ជាក់ស្តែងដើម្បីទទួលភ្ញៀវទេសចរជាតិ – អន្តរជាតិ ក្នុងអំឡុង ពេលព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុករយៈពេល៣ថ្ងៃនេះ ( ថ្ងៃទី ៧.៨.៩ ខែវិច្ឆិកា ឆ្នាំ២០២២) លោកបានធ្វើការណែនាំឲ្យមន្ត្រីរាជការសម្អាតតាមមន្ទីរអង្គភាពសម្អាតតាមទីសាធារណៈ និងតាមតំបន់រមណីយដ្ឋាននានា។

ដោយឡែកសោភ័ណភាពលម្អតាមដងផ្លូវក្នុងក្រុងបានលុង បានរំលេចទៅដោយភ្លើងពណ៍ចម្រុះគ្រប់ទីកន្លែង មើលទៅគួរឲ្យចង់គយគន់ និងទាក់ទាញមែនទែន។ ទន្ទឹមហ្នឹងនោះ លោកក៏បានធ្វើការណែនាំដល់អាជ្ញាធរក្រុង,ស្រុក ទាំង៩ត្រូវការពារសុវត្ថិភាព និងបង្កលក្ខណៈងាយស្រួលឲ្យប្រជាពលរដ្ឋ អុំទូក អកអំបុកតាមមូលដ្ឋានរៀងៗខ្លួនផងដែរ៕

អត្ថបទ៖ វុទ្ធឦសាន