ប្រតិភូយុវជនតំណាងអាស៊ាន២០រូប ទស្សនា៤កន្លែងក្នុងទីក្រុងភ្នំពេញ ដែលបង្ហាញពីវប្បធម៌ និងប្រវត្តិសាស្ត្ររបស់ខ្មែរ

ប្រតិភូយុវជនសមាជិកអាស៊ាន២០រូបដែលមកពី១០ប្រទេសនៃសមាជិកអាស៊ាន កាលពីសប្តាហ៍មុន បានធ្វើដំណើរទស្សនកិច្ចនៅក្នុងទីក្រុងភ្នំពេញ៤កន្លែងគឺ នៅខាងមុខវិមានឯករាជ្យ និងរូបសំណាក់ព្រះបាទ នរោត្តម សីហនុ និងនៅមុខព្រះបរមរាជវាំង។ ព្រមទាំងហួសទៅសារមន្ទីរ ព្រះឦសានវរ្ម័ន (ស.ស.រ) និងដំណើរទស្សនាផ្សារធំថ្មី។

ដំណើរទស្សនកិច្ចនៅក្នុងទីក្រុងភ្នំពេញ៤កន្លែងខាងលើ ពីសំណាក់ប្រតិភូយុវជនប្រទេសជាសមាជិកអាស៊ានទាំង១០ប្រទេសនេះ បានធ្វើឲ្យពួកគេដឹងពីប្រវត្តិសាស្ត្រ វប្បធម៌ ប្រពៃណី របៀបរបបនៃការរស់នៅរបស់ប្រជាជនមួយចំនួនរបស់កម្ពុជា។ ទាំងអស់នេះក៏បានបង្ហាញ ពីការធ្វើទំនាក់ទំនងល្អ និងយ៉ាងរមួតជាមួយបណ្តាប្រទេសជាសមាជិកអាស៊ានផងដែរ។

តួយ៉ាង ការដើរទស្សនាទាំង៤កន្លែងនេះ ក៏មានមគ្គទេសក៍ សម្រាប់និយាយប្រាប់ពីប្រវត្តិនៃទីកន្លែងនីមួយៗ និងហេតុការណ៍ដែលបានកើតឡើង ព្រមទាំងបានរៀបរាប់ពីពិធីបុណ្យអុំទូក អកអំបុក សំពះព្រះខែ និងពិធីកម្ពុជាទទួលបានឯករាជ្យជាតិ ដែលទើបតែបញ្ចប់ថ្មីៗផងដែរ។ ប្រតិភូយុវជនមកពីបណ្តាប្រទេសជាសមាជិកអាស៊ាន ហាក់មានភាពសប្បាយរីករាយជាខ្លាំងជាមួយនឹងដំណើរទស្សនាមួយនេះ ដែលទទួលបានទស្សនីយភាពប្លែកៗពីកម្ពុជា។

ជាមួយគ្នានោះ កញ្ញា មហៃហ្សែល ជាជនជាតិម៉ាឡេស៊ី និងជាប្រតិភូយុវជនមកពីប្រទេសម៉ាឡេស៊ី បានប្រាប់មកកាន់ “កម្ពុជាថ្មី” ថា រាជរដ្ឋាភិបាលបង្កើតនូវកម្មវិធីជំនួបរវាងយុវជនអាស៊ាននេះឡើងមក គឺជារឿងមួយដែលល្អ ព្រោះពួកគេអាចរាប់អានគ្នា ចែករំលែកពីវប្បធម៌របស់គ្នាទៅវិញទៅមក។ ម្យ៉ាងវិញទៀត យុវជនគឺជាអ្នកបន្តវេនរបស់ប្រទេស ដូច្នេះ ការបង្កើតវេទិកានេះឡើងមក អាចធ្វើឲ្យពួកគេស្វែងយល់ពីភាពជាអ្នកដឹកនាំ និងរៀនពីគ្នាទៅវិញទៅមក។ មិនតែប៉ុណ្ណោះ កញ្ញា មហៃហ្សែល បានកោតសរសើរចំពោះការទទួលស្វាគមន៍យ៉ាងកក់ក្តៅពីប្រជាជនកម្ពុជា ពោលគឺ ប្រជាជនកម្ពុជា បានទុកនាងប្រៀបនឹងគ្រួសារ និងប្រជាជនខ្មែរតែមួយ មានការយកចិត្តទុកដាក់ខ្លាំង។ នាងបានគូសបញ្ជាក់បន្ថែមថា ក្រោយពីវិលត្រឡប់ទៅកាន់ប្រទេសម៉ាឡេស៊ីវិញ កញ្ញា មហៃហ្សែល នឹងពាំនាំនូវវប្បធ៌ ប្រវត្តិសាស្រ្ត និងទិដ្ឋភាពផ្សេងៗដែលខ្លួនបានឃើញ ទៅចែករំលែកដល់ប្រជាជនម៉ាឡេស៊ីឯទៀត។

រីឯ ប្រតិភូយុវជនដែលមកពីប្រទេសថៃ បានលើកឡើងថា កម្មវិធី យុវជនអាស៊ាន ក្នុងឆ្នាំ២០២២ គឺជាកម្មវិធីមួយដែលល្អខ្លាំងណាស់សម្រាប់ការជួបជុំគ្នាឡើងវិញបន្ទាប់ពីវិបត្តិកូវីដ-១៩។ វេទិកានេះ ជាឱកាសមួយសម្រាប់ប្រតិភូយុវជនគ្រប់ប្រទេសជាសមាជិកអាស៊ាន អាចបានជួបពិភាក្សាគ្នាពីបញ្ហាផ្សេងៗ ព្រមទាំងបង្កើតបានជាទំនាក់ទំនងល្អជាមួយគ្នាផងដែរ៕

ដោយ៖ អុន ស្រីមាន