ព័ត៌មានជាតិ

សមត្ថកិច្ចកំពុងស្វែងរកកជនសង្ស័យ៣នាក់ ក្លែងបន្លំ សញ្ញាបត្រវេជ្ជបណ្ឌិត

បានផុស

៥ years មុន

នៅ

ថ្ងៃព្រហស្បតិ៍ ៧ មករា ២០២១

ដោយ

ជនសង្ស័យ៣នាក់ ក្លែងបន្លំសញ្ញាបត្រវេជ្ជបណ្ឌិត ដែលបានយកទម្រង់តាមសញ្ញាបត្ររបស់សាកលវិទ្យាល័យវិទ្យាសាស្ត្រសុខាភិបាល ត្រូវបានក្រុមប្រឹក្សាគណៈគ្រូពេទ្យជាតិស្នើសុំការផ្ទៀងផ្ទាត់ពីសាកលវិទ្យាល័យវិទ្យាសាស្ត្រសុខាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យទាំង៣នាក់ដែលក្លែងបន្លំនោះ ទី១មានឈ្មោះ សាយ សុវណ្ណ ទី២ឈ្មោះ ម៉ក់សុខជា និង ទី៣ឈ្មោះ ខា វ៉េងហួត។

បើតាមប្រភពព័ត៌មានបានឲ្យដឹងថា យោងតាមលិខិតរបស់លោកសាស្ត្រាចារ្យវេជ្ជបណ្ឌិត ធា គ្រុយ ប្រធានក្រុមប្រឹក្សាគណៈគ្រូពេទ្យជាតិ ជម្រាបមក លោកប្រធានក្រុមប្រឹក្សាគណៈគ្រូពេទ្យខេត្តកំពង់ស្ពឺ កាលពីថ្ងៃទី៣១ ខែធ្នូ ឆ្នាំ២០២០ កន្លងទៅនេះបានឲ្យដឹងថា ក្រោយពីមានការសង្ស័យចំពោះ «សញ្ញាបត្រវេជ្ជបណ្ឌិត» របស់ឈ្មោះ សាយ សុវណ្ណ ម៉ក់សុខជា និង ខា វ៉េងហួត ដែលបានយកទម្រង់តាមសញ្ញាបត្ររបស់សាកលវិទ្យាល័យវិទ្យាសាស្ត្រសុខាភិបាល , ក្រុមប្រឹក្សាគណៈគ្រូពេទ្យជាតិ បានស្នើសុំការផ្ទៀងផ្ទាត់ពីសាកលវិទ្យាល័យវិទ្យាសាស្ត្រសុខាភិបាល នៅថ្ងៃទី៣ ខែវិច្ឆិកា ឆ្នាំ២០២០ ដោយសាកលវិទ្យាល័យវិទ្យាសាស្ត្រសុខាភិបាល បានចេញលិខិតបញ្ជាក់ថា សញ្ញាបត្រវេជ្ជបណ្ឌិតរបស់អ្នកទាំង៣នេះ ពុំមែនជាសញ្ញាបត្រដែលចេញដោយសាកលវិទ្យាល័យវិទ្យាសាស្ត្រសុខាភិបាល ទេ។

ក្នុងនោះ លោកសាស្ត្រាចារ្យវេជ្ជបណ្ឌិត ធា គ្រុយ ប្រធានក្រុមប្រឹក្សាគណៈគ្រូពេទ្យជាតិ សូមឲ្យលោកប្រធានក្រុមប្រឹក្សាគណៈគ្រូពេទ្យខេត្តកំពង់ស្ពឺ មានវិធានការទៅលើជនសង្ស័យទាំង៣នាក់ខាងលើនេះ ដោយទី១-ដកហូតសញ្ញាបត្រដើមរបស់ សាយ សុវណ្ណ ម៉ក់សុខជា និង ខា វ៉េងហួត។ ២-ធ្វើលិខិតជូនមន្ទីរសុខាភិបាលខេត្តកំពង់ស្ពឺ ដើម្បីចាត់វិធានការតាមផ្លូវច្បាប់ដែលមានចែងក្នុងក្រមព្រហ្មទណ្ឌ ស្តីពីការក្លែងបន្លំឯកសារ។ ៣-ជូនដំណឹងទៅគណៈគិលានុបដ្ឋាក និង គណៈវិជ្ជាជីវៈសុខាភិបាលដទៃទៀត ដែរ បើមានភាពចាំបាច់ ដោយពួកគាត់ភាគច្រើនជាគិលានុបដ្ឋាក ហើយរមែងបានចុះបញ្ជីជាមួយគណៈគិលានុបដ្ឋាក។ ៤-ក្រោយមានវិធានការទាំងអស់ហើយ សូមលោកប្រធានរៀបចំឲ្យមានរបាយការណ៍ត្រឡប់មកថ្នាក់ជាតិវិញ ដើម្បីគណៈគ្រូពេទ្យជាតិរៀបចំផ្សព្វផ្សាយតាមគេហទំព័រ និង Facebook Page របស់គណៈគ្រូពេទ្យជាតិ៕