មកស្គាល់ស្ត្រី៦រូបដែលកាន់ជាអភិបាលក្រុង-ស្រុក-ខណ្ឌ នៅកម្ពុជា

ក្នុងវិស័យមុខងារសាធារណៈ ស្ត្រីបានកើនឡើងពី៣២% ក្នុងឆ្នាំ២០០៧ ដល់៤២% ក្នុង២០២១ ខណៈស្ត្រីក្នុងតួនាទីធ្វើសេចក្ដីសម្រេចបានកើនឡើងដល់២៦%។ ក្នុងនោះ នៅរដ្ឋបាលថ្នាក់ក្រោមជាតិ គឺមានស្ត្រីចំនួន២រូបកំពុងកាន់តួនាទីជាអភិបាលខេត្ត និងស្រ្តីចំនួន៦រូបកំពុងមានតួនាទីជាអភិបាលក្រុង-ស្រុក-ខណ្ឌ។

ស្ត្រីដែលជាអភិបាលខេត្តទាំង២រូប គឺលោកស្រី មិថុនា ភូថង ជាអភិបាលខេត្តកោះកុង និងលោកស្រី បាន ស្រីមុំ ជាអភិបាលខេត្តប៉ៃលិន។ ដោយឡែក ស្ត្រីដែលកំពុងធ្វើជាអភិបាលក្រុង-ស្រុក-ខណ្ឌ ទាំង៦ គឺរួមមាន៖

១) លោកស្រី គឹម ញឹប

លោកស្រី គឹម ញឹម គឺជាអភិបាលខណ្ឌដង្កោ រាជធានីភ្នំពេញ ដែលបានប្រកាសតែងតាំងជាអភិបាលខណ្ឌកាលពីអំឡុងខែធ្នូ ឆ្នាំ២០១៩ ជំនួសលោក នុត ពុធដារ៉ា។ មុនឡើងជាអភិបាលខណ្ឌ លោកស្រី គឹម ញឹប មានតួនាទីជាអភិបាលរងខណ្ឌ។

២) លោកស្រី ងិន ផលរ័ត្ន

លោកស្រី ងិន ផលរ័ត្ន ជាស្ត្រីដំបូងដែលបានប្រកាសតែងតាំងជាអភិបាលក្រុងបូកគោ ខេត្តកំពត ក្រោយក្រុងនេះបង្កើតឡើងកាលពីឆ្នាំ២០២១។ ដំបូងឡើយ លោកស្រី ងិន ផលរ័ត្ន គឺជាមន្ត្រីនៃក្របខណ្ឌមន្ត្រីគ្រប់គ្រងរដ្ឋបាលនៃទីស្តីការគណៈរដ្ឋមន្ត្រី ដែលធ្លាប់ធ្វើជាប្រធានលេខាធិការដ្ឋានក្រុមប្រឹក្សាបណ្ណសារ និងជាអគ្គនាយិកានៃអគ្គនាយដ្ឋានរាជកិច្ច និងតម្កល់ឯកសារជាតិ។

៣) លោកស្រី ប៊ិន បូឡែន

លោកស្រី ប៊ិន បូឡែន ជាអភិបាលស្រុករុក្ខគិរី នៃខេត្តបាត់ដំបង ដែលបានប្រកាសតែងតាំងកាលពីអំឡុងខែវិច្ឆិកា ឆ្នាំ២០២០។

៤) លោកស្រី សេង ទៀង

លោក សេង ទៀង ជាស្ត្រីដំបូងដែលកាន់ជាអភិបាលស្រុកពាមរក៍ នៃខេត្តព្រៃវែង ដែលត្រូវបានប្រកាសតែងតាំងកាលពីឆ្នាំ២០១៧។

៥) លោកស្រី ទួត ហាទីម៉ា

លោកស្រី ទួត ហាទីម៉ា ដែលជាអតីតអភិបាលរងស្រុកស្រែអំបិល ត្រូវបានប្រកាសតែងតាំងជាអភិបាលស្រុកថ្មបាំង នៃខេត្តកោះកុង កាលពីខែកញ្ញា ឆ្នាំ២០២២។

៦) លោកស្រី គង់ លឹមហូ

កាលពីថ្ងៃទី២៩ ខែសីហា ឆ្នាំ២០២២ លោកស្រី គង់ លឹមហូ ដែលជាអតីតអភិបាលរងស្រុកឆ្លូង ត្រូវបានប្រកាសតែងតាំងអភិបាលស្រុកឆ្លូង ខេត្តក្រចេះ៕

ដោយ៖ ធឿន វ៉ាន់សុង