បាត់ដំបង៖ សមាជិកសមាជិកាចំនួន៤៧នាក់ បានសម្រេចចិត្តចាកចេញពីគណបក្សចំនួន២មកសុំរួមរស់ជាមួយ​គណបក្សប្រជាជនកម្ពុជា ដែលក្នុងនោះមានមកពី គណបក្សខ្មែរស្រឡាញ់ជាតិ និងគណបក្សហ្វុនស៊ិនប៉ិច។ ពិធីប្រកាសបញ្ចូលជាសមាជិកថ្មី បានធ្វើឡើង នៅភូមិថ្មី ក្នុងស្រុកថ្មគោល កាលពីថ្ងៃទី១៨ខែ មីនា ម្សិលមិ ក្រោមអធិបតីភាពលោក ជា សម្បត្តិ ជាអភិបាលស្រុកថ្មគោល។

លោក ជា សម្បត្តិ អភិបាលនៃគណៈអភិបាលស្រុកថ្មគោល និងជាប្រធានគណកម្មាធិការ​គណបក្សស្រុកថ្មគោល​បានឲ្យដឹងថា ការចុះចូលរួមរស់ជាមួយគណបក្សប្រជាជនកម្ពុជារបស់សមាជិក​សមាជិកាទាំង៤៧នាក់​មកពីគណបក្សចំនួន២ខាងលើនេះ បានធ្វើឡើងដោយចិត្តស្មោះគ្មានការបង្ខិតបង្ខំតាមរូបភាពណាមួយនោះទេ។ លោកបន្តថា សមាជិកសមាជិការដែលបានស្ម័គ្រចិត្តលាលែងពីគណបក្សទាំងពីរខាងលើនេះ មានចំនួន៤៧នាក់​ក្នុងនោះស្ត្រី៨រូប ។

សមាជិកថ្មី បានលើកឡើងថា តាំងពីដើមរហូតដល់បច្ចុប្បន្នសង្គមជាតិកាន់តែមានការអភិវឌ្ឍន៍ជាបន្តបន្ទាប់​ជាពិសេសនៅតាមមូលដ្ឋានសហគមន៍ ក៏មានការចុះជួយជ្រុមជ្រែងពីមន្ត្រីគណបក្សប្រជាជន ដោយស្មើភាព​គ្នាស្របតាមការរស់នៅរបស់ពួកគាត់ជាប្រជាពលរដ្ឋប្រកបដោយសិទ្ធិសេរីភាពគ្មានការគំរាមហែង និងរស់នៅ​ក្រោមដំបូលសន្តិភាពតែមួយ ទើបពួកគាត់ស្ម័គ្រចិត្តមករស់នៅនិងគាំទ្រគណបក្សប្រជាជនតែម្តង៕

អត្ថបទ៖ សៅ សារិទ្ធ