ខេត្តបាត់ដំបង រៀបចំព្រឹត្តិការណ៍ផ្លែឈើរយៈពេល១០ថ្ងៃ ខណៈក្បួនរឺម៉ក់កង់ នឹងដឹកផ្លែឈើគ្រប់មុខដើម្បីបង្ហាញភ្ញៀវទេសចរ

នៅក្នុងព្រឹត្តិការណ៍ផ្លែឈើបាត់ដំបង ដែលបានរៀបចំឡើងដោយរដ្ឋបាលខេត្តបាត់ដំបង និងមានរយៈពេល ១០ថ្ងៃ គិតចាប់ពីថ្ងៃទី១០ ដល់ថ្ងៃទី១៩ ខែកក្កដា ឆ្នាំ២០២៦ នៅកណ្ដាលក្រុងបាត់ដំបង ដោយមានរៀបចំផ្លែឈើគ្រប់មុខដែលបានដឹកនាំយកមកតាំងពិរពណ៌។ នៅក្នុងព្រឹត្តិការណ៍ផ្លែឈើនេះពីបណ្ដាស្រុកនានា ព្រមទាំងមានប៊ូហ្វេផ្លែទុរេនរយៈពេល ៣ថ្ងៃផងដែរ។

នៅរសៀលនេះ ក្រុមក្បួនរ៉ឺម៉កកង់ ដែលបាត់មុខជាច្រើនទសវត្សរ៍មកហើយនោះ បានលេចចេញជារូបរាងមកវិញជាច្រើនគ្រឿង ដោយបានត្រៀមរៀបចំដឹកផល្លានុផល សុទ្ធសឹងជាផ្លែឈើធម្មជាតិនៅក្នុងខេត្តបាត់ដំបងផ្ទាល់តែម្ដងត្រៀមរៀបចំដង្ហែរជុំវិញក្រុងបាត់ដំបងដើម្បីបង្ហាញអំពីផ្លែឈើសំខាន់ៗជាច្រើនមុខឲ្យប្រជាពលរដ្ឋ ពិសេសគឺបណ្ដាភ្ញៀវទេសចរ ទស្សនាកំសាន្តហើយក៏អាចទិញយកទៅបរិភោគបានដោយសេរី។

នៅក្នុងចំណោមរុឺម៉កកង់ទាំងអស់ដែលមករៀបចំនៅខាងមុខទីធ្លារសាលាខេត្តបាត់ដំបងនាពេលនេះ គឺត្រៀមដឹកផ្លែឈើដែលមកពី ១៤ ក្រុងស្រុក ក្នុងនោះដូងខ្ទិះក្នុងភូមិសាស្ត្រខេត្តបាត់ដំបង សាវម៉ាវ និងទុរេនមកពីស្រុកសំឡូត ផ្លែមៀនមកពីស្រុករតនាមណ្ឌល ក្រូចពោធិ៍សាត់មកពីស្រុកសង្កែ ផ្លែម្នាស់មកពីស្រុករុក្ខគីរី ផ្លែលម៉ើមកពីស្រុកសំពៅលូន និងមានផ្លែឈើចម្រុះជាច្រើនមកទៀត ដូចជាខ្នុរ ត្របែក និងត្នោត ដែលភាគច្រើនមកពីឃុំតាគ្រាម ស្រុកបាណន់ ដែលត្រូវរៀបចំដាក់លើរ៉ឺម៉កក្នុងពិធីដង្ហែរ ក្នុងព្រឹត្តិការណ៍ពិព័រណ៍ផ្លែឈើបាត់ដំបង នាពេលនេះ។

នៅក្នុងពិធីនេះផងដែរក៏មានវត្តមានរដ្ឋមន្ត្រីក្រសួងទេសចរណ៍បានអញ្ជើញចូលរួមក្នុងពិធីបើកព្រឹត្តិការណ៍ពិរពណ៌ផ្លែឈើបាត់ដំបង នេះ រួមជាមួយនឹងលោក សុខ លូ អភិបាលនៃការអភិបាលខេត្តផងដែរ។ ហើយរយៈពេល ៣ ថ្ងៃដំបូងក៏មានការរៀបចំ ប៊ូហ្វេទុរេនរៀងរាល់ល្ងាចដោយមានកំណត់ពេលវេលា និងតម្រូវតម្លៃទៅតាមក្មេង និងមនុស្សចាស់ដោយយើងមានសិទ្ធិបរិភោគដោយសេរី។ ក្រៅពីនោះក៏មានការរៀបចំជាស្តង់លក់ផលិតផលនានាយ៉ាងច្រើនកុះករ ជុំវិញបរិវេណនាគសន្តិភាពផងដែរ ដែលប្រជាពលរដ្ឋជិតឆ្ងាយអាចអញ្ជើញមកកម្សាន្តសប្បាយរីករាយជាមួយកម្មវិធីនេះ ៕

អត្ថបទ៖ សោ និយមរ័ត្ន