សម្ដេចតេជោ ហ៊ុន សែន សម្រេចបញ្ចប់មុខតំណែងអគ្គនាយករងនៅអាកាសចរស៊ីវិលម្នាក់ ក្រោយដកកាំភ្លើងភ្ជង់អ្នកដទៃ  

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញអនុក្រឹត្យបញ្ចប់មុខតំណែងអគ្គនាយករងរដ្ឋបាល និងកិច្ចការទូទៅម្នាក់ នៃរដ្ឋលេខាធិការដ្ឋានអាកាសចរស៊ីវិល ក្រោយដកកាំភ្លើងភ្ជង់អ្នកដទៃ ព្រោះរឿងស៊ីប្លេរថយន្ត ហើយសម្ដេចបញ្ជាក់ថា នេះជាសារព្រមានចំពោះមន្ត្រីទាំងអស់ សូមកុំអាងអំណាចធ្វើបាបអ្នកទន់ខ្សោយ។

តាមរយៈអនុក្រឹត្យនៅថ្ងៃទី ១១ ខែមេសា ឆ្នាំ ២០២៣ សម្ដេចតេជោ ហ៊ុន សែន បានសម្រេចបញ្ចប់មុខតំណែងលោក បែល វ៉ាន់ដែត ពីអគ្គនាយករង នៃអគ្គនាយកដ្ឋានរដ្ឋបាល និងកិច្ចការទូទៅ នៃរដ្ឋលេ​ខាធិការដ្ឋានអាកាសចរស៊ីវិល។

សម្ដេចតេជោ ហ៊ុន សែន បានបញ្ជាក់នៅក្នុងបណ្ដាញសង្គមតេលេក្រាមថា បើតុលាការមិនចាត់ការតាមផ្លូវច្បាប់ទេ ទុកឲ្យសម្ដេចដាក់វិន័យតាមផ្លូវរដ្ឋសិន ចំពោះមន្ត្រីរូបនេះដែលអាងមានអំណាច ប្រើប្រាស់អាវុធគំរាមអ្នកទន់ខ្សោយ។ ប្រមុខរាជរដ្ឋាភិបាល បានបញ្ជាក់ទៀតថា នេះជាសារព្រមានចំពោះមន្ត្រីទាំងអស់ សូមកុំអាងអំណាចធ្វើបាបអ្នកទន់ខ្សោយ ជាពិសេសសូមកុំប្រើប្រាស់អាវុធខុសច្បាប់។

ជាមួយគ្នានេះ សម្ដេចតេជោ ហ៊ុន សែន បានណែនាំឲ្យលោក កើត រិទ្ធ រដ្ឋមន្ត្រីក្រសួងយុត្តិធម៌ ធ្វើការជាមួយតុលាការកុំឲ្យជនល្មើសប្រើប្រាស់អាវុធខុសច្បាប់បាននៅក្រៅឃុំមុនពេលកាត់ទោស ដែលជននោះអាចតាមគំរាមកំហែងដល់អ្នកផ្សេងទៀត។

គួររំលឹកថា កាលពីថ្ងៃទី ២៩ ខែមីនា ឆ្នាំ ២០២៣កន្លងទៅនេះ ជនរងគ្រោះឈ្មោះ ឆែ វណ្ណម៉ូលីវ័ន្ត មានមុខរបរជានិស្សិត បានបើករថយន្តទៅផ្ទះនៅក្រុមទី ៣ ភូមិខ ២ សង្កាត់ច្រាំងចំរេះទី ២ ខណ្ឌឫស្សីកែវ។ នៅពេលទៅដល់ខ្លោង ទ្វារច្រកចូលបុរី ស្រាប់តែលោក បែល វ៉ាន់ដែត មានមុខរបរជាអគ្គនាយករង នៃអគ្គនាយកដ្ឋានរដ្ឋបាល និងកិច្ចការទូទៅ នៃរដ្ឋលេខាធិការដ្ឋានអាកាសចរស៊ីវិល បានឈប់រថយន្តនៅពីមុខមិនព្រមទៅមុខ។

នៅក្នុងហេតុការណ៍នេះ ជនរងគ្រោះឈ្មោះ ឆែ វណ្ណម៉ូលីវ័ន្ត បានរង់ចាំប្រហែល ៥នាទី ទើបដាច់ចិត្តស៊ីប្លេរថយន្តមួយ ដង និងបើកភ្លើងហ្វាជាច្រើនដង ហើយក៏បានវ៉ារថយន្តជនសង្ស័យទៅមុន។ ស្រាប់​តែភ្លាមនោះ លោក បែល វ៉ាន់ដែត បានបើកដេញតាមពីក្រោយរថយន្តជនរងគ្រោះ ដល់ចំណុចកើតហេតុ ហើយក៏បានដកកាំភ្លើងខ្លីភ្ជង់ទៅលើជនរងគ្រោះពីក្នុងរថយន្ត ដោយនិយាយថា «មុនហ្នឹងស៊ីប្លេដាក់នរណា»? រួចក៏បានបើករថយន្តចេញបាត់ទៅ។ បន្ទាប់ពីកើតហេតុ ការណ៍ កម្លាំងនគរបាលបានឃាត់ខ្លួន លោក បែល វ៉ាន់ដែត និងបានបញ្ជូនទៅកាន់តុលាការចាត់ការបន្ត កាលពីរសៀលថ្ងៃទី ៣០ ខែមីនា ឆ្នាំ ២០២៣កន្លងទៅនេះ៕