ព័ត៌មានជាតិ

ស្ពានបេឡេឆ្លងកាត់ទន្លេចាម-ឡុកធីញ គ្រោងជួសជុលឆាប់ៗនេះ

បានផុស

៥ ខែ មុន

នៅ

ថ្ងៃចន្ទ ៥ មិថុនា ២០២៣

ដោយ

កាលពីថ្មីៗនេះ នៅប៉ុស្តិ៍កងទ័ពការពារព្រំដែនឡុកធីញ គណៈប្រតិភូខេត្តត្បូងឃ្មុំ និងខេត្តប៊ិញភឿក បានប្រជុំឯកភាពវាយតម្លៃស្ថានភាពស្ពានឆ្លងកាត់ទន្លេចាម.ឡុកធីញ មានទទឹង ៤ ម៉ែត្រ និងបណ្ដោយប្រវែង ៤៨ ម៉ែត្រ ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ ដែលរងការខូចខាតមួយចំនួនធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោងជួសជុលដាក់ឲ្យប្រើប្រាស់ជាផ្លូវការក្នុងពេលឆាប់ៗហើយ ដើម្បីធានានូវការធ្វើចរាចរណ៍ចេញចូលរបស់ប្រជាជន នៃខេត្តទាំងពីរ។

គណៈប្រតិភូតំណាងខេត្តត្បូងឃ្មុំ មានសមាសភាពចំនួន ១៤ នាក់ ដឹកនាំដោយលោក ណុប ឡងឌី អភិបាលរងខេត្ត និងគណៈប្រតិភូខេត្តប៊ិញភឿក ប្រធានមន្ទីរការបរទេសខេត្តប៊ិញភឿក មានសមាសភាព ៧ នាក់ ដឹកនាំដោយលោកស្រី ផាម ធីអាញ់ធឺ អនុប្រធានគណៈកម្មការអចិន្ត្រៃយ៍ នៃគណៈកម្មការដឹកនាំកិច្ចការព្រំដែនខេត្ត ប្រធានមន្ទីរកិច្ចការបរទេស សរុបប្រតិភូមាន ២១ រូប។

យោងតាមស្មារតីប្រជុំរបស់ភាគីខេត្តទាំងពីរ ជាលទ្ធផល នៃការចុះពិនិត្យស្ថានភាពខូចខាត សសរគ្រឹះ នៅមានសភាពធម្មតា។ ដោយឡែកដែកកម្រាលស្ពានមានសភាពទ្រុឌទ្រោមខ្លាំង ,ដែកកម្រាលខូចខាត ៦៤ ផ្ទាំង ក្នុងនោះខូចខាតធ្ងន់ធ្ងរ ៩ ផ្ទាំង និងធ្នឹមស្ពានខូចខាតដូចជា បាត់បូឡុង និងកោង។

លោកស្រី ផាម ធីអាញ់ធឺ អនុប្រធានគណៈកម្មការអចិន្ត្រៃយ៍ នៃគណៈកម្មការដឹកនាំកិច្ចការព្រំដែនខេត្ត ប្រធានមន្ទីរកិច្ចការបរទេស បានថ្លែងថា ខេត្តប៊ិញភឿក លើកគម្រោងថវិកាសម្រាប់ជួសជុលស្ពាន ផ្ញើជូនភាគីខេត្តត្បូងឃ្មុំ ឲ្យបានមុនថ្ងៃ ១៥ ខែមិថុនា ឆ្នាំ ២០២៣ (ក្រោយមន្ទីរគមនាគមន៍ និងដឹកជញ្ជូនខេត្តប៊ិញភឿក បានសិក្សារួចរាល់)។ គម្រោងជួសជុលភាគីទាំងពីរ នឹងរៀបចំរបាយការណ៍ជូនថ្នាក់ដឹកនាំខេត្តទាំងពីរ ដើម្បីសុំការអនុញ្ញាត និងរាយការណ៍ជូនថ្នាក់ជាតិ នៃប្រទេសទាំងពីរ។ ក្រោយពីបានឯកភាពពីថ្នាក់ដឹកនាំខេត្តទាំងពីរ នឹងជូនដំណឹងគ្នាទៅវិញទៅមក ដើម្បីសហការអនុវត្ត។ ថវិកាជួសជុល ភាគីទាំងពីរ ព្រមទទួលខុសត្រូវលើការចំណាយស្មើគ្នា៕

អត្ថបទ ៖ សាន វិឡែម