សេដ្ឋកិច្ច

សហគមន៍កសិកម្មទំនើបម្រេចមេមត់ ខេត្តត្បូងឃ្មុំ ទទួលបានជំនួយឥតពីគម្រោង CASDP ១១ ម៉ឺនដុល្លារ

បានផុស

១១ ខែ មុន

នៅ

ថ្ងៃសុក្រ ២២ សីហា ២០២៥

ដោយ

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ឱ្យដឹងនៅព្រឹកថ្ងៃទី២២ ខែសីហា ឆ្នាំ២០២៥ នេះ ថា សហគមន៍កសិកម្មទំនើបម្រេចមេមត់ ខេត្តត្បូងឃ្មុំ ទទួលបានជំនួយឥតពីគម្រោង CASDP នូវទឹកប្រាក់ចំនួន ១១ ម៉ឺនដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានលើកឡើងថា អបអរសាទរទៅដល់ «សហគមន៍កសិកម្មទំនើបម្រេចមេមត់» ខេត្តត្បូងឃ្មុំ សម្រាប់ការបញ្ចប់រដូវកាលផលជុំទីមួយប្រកបដោយលទ្ធផលល្អប្រសើរ និងបានចុះកិច្ចព្រមព្រៀងហិរញ្ញប្បទានបំពេញបន្ថែមជាមួយគម្រោងពិពិធកម្មកសិកម្មកម្ពុជា(CASDP)។

ក្នុងនោះ សហគមន៍កសិកម្មទំនើបម្រេចមេមត់ អាចសម្រេចបានប្រាក់ចំណូលលើសពីការរំពឹងទុកជាង ២២០០ លានរៀល ព្រមទាំងទទួលបានជំនួយឥតពីគម្រោង CASDP ចំនួន ១១ ម៉ឺនដុល្លារ ដោយបន្ថែមសមាជិកថ្មីចំនួន ២៥ គ្រួសារ ក៏ដូចជាការពង្រីកផែនការអាជីវកម្មឆ្នាំថ្មីកើនដល់ទំហំ ១,២ លានដុល្លារ។

បន្ថែមជាមួយគ្នានោះ សហគមន៍ ក៏និងទទួលបានកម្ចីឥណទានការប្រាក់ទាប ១០០% ពីធនាគារដៃគូ ជាមួយនឹងការចុះកុងត្រាលក់ម្រេចសហគមន៍ទុកជាមុនក្នុងតម្លៃលើសពីទីផ្សារ។

បើគិតពីចំនួនសហគមន៍កសិកម្ម និងសហគមន៍កសិកម្មទំនើបទាំងអស់នៅប្រទេសកម្ពុជា គិតត្រឹមខែមិថុនា ឆ្នាំ២០២៥ នេះ មានចំនួនសរុបប្រមាណ ១ ៤៣០សហគមន៍ ដែលមានកសិករសរុបចំនួន ១៩៣ ៨៨៩ នាក់ ដែលក្នុងនោះ មានសមាជិកនារីចំនួន ១១៤ ០៣០ នាក់ និងមានដើមទុនសរុបចំនួនប្រមាណ ១០៦ ៨៦៩ ០៤៤ ៨៩៥ រៀល។

ជាក់ស្តែង យោងតាមសំណើរបស់ក្រសួងកសិកម្ម រុក្ខាប្រមាញ់ និងនេសាទ ដើម្បីជួយគាមទ្រទុនបង្វិលដល់សហគមន៍កសិកម្មទំនើប រាជរដ្ឋាភិបាលកម្ពុជា បានសម្រេចជាគោលការណ៍ផ្តល់ឥណទានចំនួន ៥៥ ០០០ ០០០ ដុល្លារថ្មី សម្រាប់ផ្តល់ឥណទានដល់សហគមន៍កសិកម្មទំនើបសម្រាប់រយៈពេល ៣ ឆ្នាំ គឺ ឆ្នាំ២០២៥-២០២៧៕

ដោយ៖ ឌិន ថារី