​រដ្ឋាភិបាលបង្កើនទំហំដីឧទ្យានជាតិភ្នំបូកគោជាង ១ ពាន់ហិកតា​

ឧទ្យានជាតិព្រះមុនីវង្សភ្នំបូកគោ ស្ថិតក្នុងស្រុកទឹកឈូ ខេត្តកំពតត្រូវបានរាជរដ្ឋាភិបាលសម្រេចបង្កើនទំហំផ្ទៃដីជាង ១ ពាន់ហិកតា (១ ៦៥៨) បន្ថែមទៀត ដើម្បីធានាដល់ការថែរក្សា ការពារសោភ័ណភាពធម្មជាតិ និងទេសភាព និងជីវៈ​ចម្រុះ​។

​អនុក្រឹត្យស្ដីពីការកែប្រែឧទ្យានជាតិព្រះមុនីវង្សបូកគោចុះថ្ងៃទី ១៧ ខែកក្កដា ឆ្នាំ ២០២៣ សម្រេច កែប្រែឧទ្យានជាតិព្រះមុនីវង្សបូក​គោ​ពីផ្ទៃ​ដីទំហំ ១៥៤ ៤៥៨ ហិកតា ទៅផ្ទៃដីទំហំ ១៥៦ ១១៦ ហិកតា ស្ថិតក្នុងភូមិសាស្ត្រ ខេត្តកំពត ខេត្តកំពង់ស្ពឺ និងខេត្តព្រះសីហនុ។

​យោងតាមអនុក្រឹត្យការកែប្រែនេះ ក៏ដើម្បីលើកកម្ពស់តួនាទីសកក្កដានុពល នៃប្រព័ន្ធអេកូឡូស៊ីឆ្លើយ​តបនឹង​គោលដៅអភិវឌ្ឍដោយចីរភាព ព្រមទាំងរក្សាលំនឹងបរិស្ថាន និងរួមចំ​ណែកការកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយ។

ឧទ្យានជាតិភ្នំបូកគោ គឺជាឧទ្យានមួយក្នុងចំណោមឧទ្យានជាតិដ៏ស្រស់ស្អាតរបស់ប្រទេសកម្ពុជា។ ភ្នំបូកគោ ល្បីឈ្មោះដោយសារតែអាកាសធាតុត្រជាក់ពេញមួយឆ្នាំ ព្រមទាំងមានព្រៃព្រឹក្សាធម្មជាតិដ៏ខៀវស្រងាត់និងស្រស់បំព្រង។ ភ្ញៀវទេសចរអាចគយគន់ទិដ្ឋភាពពិចពិលរមិលមើលពីលើកំពូលភ្នំទៅកាន់ទីរួមខេត្តកំពត ឆ្នេរសមុទ្រ និងកោះជាច្រើនដែលនៅខាងក្រោមយ៉ាងសប្បាយរីករាយ៕