ព័ត៌មានជាតិ

នាយកសាលាប្រាប់ហេតុការណ៍ មុនប្រទះគ្រាប់រាប់ពាន់គ្រាប់ក្នុងវិទ្យាល័យ

បានផុស

៣ ខែ មុន

នៅ

ថ្ងៃចន្ទ ១៤ សីហា ២០២៣

ដោយ

ហេតុការណ៍មួយកើតឡើងនៅវិទ្យាល័យព្រះមហាក្សត្រិយានីកុសុមៈ ដែលស្ថិតនៅទីរួមខេត្តក្រុងក្រចេះ ក្រោយប្រទះឃើញគ្រាប់មិនទាន់ផ្ទុះជាច្រើនពាន់គ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេ ប៊ុនឈី នាយកវិទ្យាល័យ ព្រះមហាក្សត្រិយានីកុសុមៈ បានបញ្ចាក់ប្រាប់កម្ពុជាថ្មីឲ្យដឹងថា មុនពេលរកឃើញគ្រាប់ទាំងអស់នេះ សាលាបានទទួលគម្រោងពីធនាគាពិភពលោកលើការជួសជុលអគារ និងអគារពិសោធន៏ចំនួន ៣ អគារនៅក្នុងបរិវេណវិទ្យាល័យ។

លោក ហេ ប៊ុនឈី នាយកវិទ្យាល័យ ព្រះមហាក្សត្រិយានីកុសុមៈ

នៅពេលកម្មករជីកកាយដីក៏ប្រទះឃើញគ្រាប់មិនទាន់ផ្ទុះ ១ គ្រាប់ ហើយក៏បានរាយការណ៏ជូនសមត្ថកិច្ច។ ក្រោយមកក្រុមកម្មករក៏បានជីកដាក់ថ្មបុកគ្រឹះនៅពេលជីកក៏ឃើញ ២ គ្រាប់ទៀត រួចក៏រាយការណ៏ជូនសមត្ថកិច្ច និងរាយការណ៍បន្តទៅអង្គការស៊ីម៉ាក់។ បន្តបន្ទាប់ក៏កកាយឃើញរណ្តៅគ្រាប់ជាច្រើនទៀត។

ចំពោះគ្រាប់ដែលរកឃើញមានចំនួន ៥ ប្រភេទ មាន M79 ចំនួន 2033 គ្រាប់, DK75 ចំនួន 63 គ្រាប់, ក្បាលគ្រាប់ផ្លោង M48 ចំនួន 18 គ្រាប់, H107 ចំនួន 1 គ្រាប់ និង B40 ចំនួន 1 គ្រាប់។ សរុបចំនួនបីថ្ងៃរកឃើញ ២១១៦ គ្រាប់។

លោកនាយកវិទ្យាល័យបន្តទៀតថា នៅក្នុងរុនរណ្តៅនៅមានគ្រាប់បន្តទៀតដែលក្រុមស៊ីម៉ាក់កំពុងរុករកបន្ត។ ចំពោះការសិក្សារបស់សិស្សវិញ លោកបានពិភាក្សាជាមួយប្រធានមន្ទីរផ្អាកតែ ២ ទៅ ៣ ថ្ងៃ ប៉ុណ្ណោះ ដោយបានឲ្យសិស្សទៅរៀននៅអាគារផ្សេងទៀត។

ដោយឡែកនៅទីតាំងដែលរកឃើញរណ្តៅគ្រាប់ ក្រុមស៊ីម៉ាក់បានដាក់ខ្សែឡោមព័ទ្ធមិនឲ្យសិស្សមកក្បែរឡើយ៕