ស្វែងយល់! តើកិច្ចប្រជុំគណៈរដ្ឋមន្រ្តីប្រព្រឹត្តទៅយ៉ាងដូចម្តេច?

នៅព្រឹកថ្ងៃព្រហស្បតិ៍នេះ គណៈរដ្ឋមន្រ្តីថ្មីកំពុងបើកកិច្ចប្រជុំពេញអង្គជាលើកដំបូង ក្រោមការដឹកនាំប្រជុំផ្ទាល់ដោយនាយករដ្ឋមន្ត្រីកម្ពុជា ឯកឧត្ដមបណ្ឌិត ហ៊ុន ម៉ាណែត។ ថ្ងៃនេះ«កម្ពុជាថ្មី» សូមណែនាំលោកអ្នកនាងទៅស្វែងយល់ថា តើកិច្ចប្រជុំគណៈរដ្ឋមន្រ្តីនេះប្រព្រឹត្តទៅយ៉ាងដូចម្តេច?

ច្បាប់ស្ដីពីការរៀបចំ និងប្រព្រឹត្តទៅនៃគណៈរដ្ឋមន្ត្រី បានចែងថា នាយករដ្ឋមន្ត្រី គឺជាអ្នកកោះប្រជុំ និងជាអធិបតីនៃអង្គប្រជុំរបស់គណៈរដ្ឋមន្ត្រី ដែលអង្គប្រជុំរបស់គណៈរដ្ឋមន្ត្រីត្រូវបែងចែកជាអង្គប្រជុំធំ និងអង្គប្រជុំពិនិត្យស្រាវជ្រាវ។ ចំពោះរាល់អង្គប្រជុំរបស់គណៈរដ្ឋមន្ត្រី គឺត្រូវមានកំណត់ហេតុ។

អង្គប្រជុំធំ គឺជាកិច្ចប្រជុំពេញអង្គគណៈរដ្ឋមន្ត្រី ដើម្បីពិនិត្យ និងសម្រេចដោះស្រាយរាល់កិច្ចការទូទៅ    រាជរដ្ឋាភិបាល ដែលអង្គប្រជុំធំនេះ ត្រូវដឹកនាំដោយនាយករដ្ឋមន្ត្រី។ ប៉ុន្តែ នាយករដ្ឋមន្ត្រី ក៏អាចប្រគល់ភារកិច្ចជូនឧបនាយករដ្ឋមន្ត្រីដឹកនាំអង្គប្រជុំពិនិត្យស្រាវជ្រាវបានដែរ។ យ៉ាងណាក៏ដោយ ប្រសិនមានការចាំបាច់ នាយករដ្ឋមន្ត្រី អាចអញ្ជើញអ្នកពាក់ព័ន្ធនានាចូលរួមក្នុងកិច្ចប្រជុំគណៈរដ្ឋមន្ត្រីបានថែមទៀត។

ជាការកត់សម្គាល់ កំឡុងពេលសម្ដេចតេជោ ហ៊ុន សែន នៅជានាយករដ្ឋមន្ត្រី សម្ដេចបានប្រកាសសម្រេចជ្រើសរើសយកថ្ងៃសុក្រ ជាថ្ងៃប្រជុំគណៈរដ្ឋមន្ត្រី។ ដោយឡែក ក្រោមការដឹកនាំរបស់ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត គេនៅមិនទាន់ដឹងថា ឯកឧត្តមសម្រេចយកថ្ងៃណាមួយ ដើម្បីប្រជុំគណៈរដ្ឋមន្ត្រីនៅឡើយ។​ ក៏ប៉ុន្តែ ប្រជុំគណៈរដ្ឋមន្រ្តីលើកដំបូងនេះ គឺប្រព្រឹត្តទៅនៅថ្ងៃព្រហស្បតិ៍៕

ដោយ៖ ង៉ិល ណារ៉ាត់