សម្ដេចធិបតី ហ៊ុន ម៉ាណែត ៖ អ្នកវិភាគ និងបុគ្គលមួយចំនួន គួរតែមានស្មារតីជាតិនិយមខ្លះផង

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឲ្យអ្នកវិភាគ និងបុគ្គលមួយចំនួន គួរតែមានស្មារតីជាតិនិយមខ្លះផង ដោយគួរចេះអបអរសាទរ និងទទួលស្គាល់នូវអ្វី ដែលជាផលប្រយោជន៍សម្រាប់ជាតិ និងប្រជាជនខ្លះ ផង។ ការស្នើនេះ គ្រាដែលសម្តេចធិបតី ហ៊ុន ម៉ាណែត បានអញ្ជើញជួបសំណេះសំណាលជាមួយកម្មករ-និយោជិតជិត ២ម៉ឺននាក់ នៅក្នុងស្រុកបាទី ខេត្តតាកែវ នាព្រឹកថ្ងៃទី ១៩ ខែកញ្ញា​ ឆ្នាំ ២០២៣នេះ។

សម្ដេចនាយករដ្ឋមន្ត្រី មានប្រសាសន៍បែបនេះថា «ហ្នឹងហើយ ខ្ញុំសុំឲ្យបងប្អូនខ្លះ អ្នកវិភាគ សិទ្ធិក៏សិទ្ធិចុះ ប៉ុន្តែសុំឲ្យមានស្មារតីជាតិនិយមខ្លះផង វាយប្រហាររដ្ឋាភិបាល ចំណុចខ្សោយវាយទៅ ប៉ុន្តែគួរគិតពីអ្វី ទទួលស្គាល់នូវអ្វីដែលផ្ដល់ផលប្រយោជន៍ ឲ្យប្រជាជនរបស់យើងផ្ទាល់ សុំលើកសរសើរខ្លះផង»។

នៅក្នុងឱកាសនេះ សម្ដេចធិបតី ហ៊ុន ម៉ាណែត បានកោតសរសើរដល់ក្រសួងពាណិជ្ជកម្ម និងក្រសួង-ស្ថាប័នពាក់ព័ន្ធ ព្រមទាំងវិស័យឯកជន ដែលបានខិតខំរៀបចំនូវការតាំងពិព័រណ៍ និងពន្លាជាតិកម្ពុជា ក្នុងព្រឹត្តការណ៍ពិព័រណ៍ចិន-អាស៊ាន លើកទី ២០ ចាប់ពីថ្ងៃទី ១៦ ដល់ថ្ងៃទី ១៩ ខែកញ្ញា ឆ្នាំ ២០២៣ នៅទីក្រុងណាននីង តំបន់ស្វយ័តជាំងក្វាងស៊ី ប្រទេសចិន។ កម្ពុជា ទទួលបានពានរង្វាន់ចំនួន ៤ នៅក្នុងការរៀបចំការតាំងពិព័រណ៍ និងពន្លាជាតិកម្ពុជា ក្នុងព្រឹត្តការណ៍ពិព័រណ៍ចិន-អាស៊ានលើកទី ២០ នៅក្នុងទីក្រុងណាននីង ប្រទេសចិននេះ។

សម្ដេចធិបតី ហ៊ុន ម៉ាណែត បានបន្ថែមថា «របាយការណ៍លោកជំទាវ ចម និមល យើងបានបញ្ចប់វាយតម្លៃល្ងាចមិញ យើងបានពាន ៤ នៅក្នុងការរៀបចំនេះ សម្រាប់មោទនភាព យើងមិនត្រឹមតែចូលទេ ការខិតខំរបស់យើងបានឲ្យអ្នកដែលចូលរួមជាបរទេស ទាំងចិន ទាំងបរទេស ព្រោះនៅទីនោះមិនមែនតែចិនទេ មានបរទេសច្រើនប្រទេសណាស់ទៅ បានឲ្យពិន្ទុយើងជាប់ពានរង្វាន់ ៤ នៅក្នុងការតាំងនេះ ជាមោទនភាពជាតិរបស់យើង សូមអបអរសាទរ»។

សម្ដេចនាយករដ្ឋមន្ត្រី បានថ្លែងទៀតថា អ្នកវិភាគ និងបុគ្គលមួយចំនួន បើថា វាយប្រហាររាជរដ្ឋាភិបាល ឬសម្ដេច ក៏វាយប្រហារចុះ តែអ្វីដែលជាមោទនភាពជាតិទាំងមូល គួរតែចេះអបអរសាទរ និងផ្សព្វ​ផ្សាយឲ្យបានច្រើនផង៕