ព័ត៌មានជាតិ

នាយករដ្ឋមន្ត្រីជំរុញការអនុវត្តច្បាប់ដើម្បីពង្រឹងប្រសិទ្ធភាពក្នុងការប្រមូលពន្ធដារ

បានផុស

២ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

នាយករដ្ឋមន្ត្រីកម្ពុជាបានជំរុញទៅអាជ្ញាធរមូលដ្ឋាន និងតុលាការចូលរួមជាអគ្គនាយកដ្ឋានពន្ធដារ ក្នុងការពង្រឹងការអនុវត្តច្បាប់ ចាត់វិធានការសមស្របឱ្យទាន់ពេលវេលាដើម្បីគាំទ្រដល់ការប្រមូលពន្ធ និងលើកកម្ពស់វប្បធម៌នៃការបង់ពន្ធនៅកម្ពុជា។ សម្ដេចបានលើកឡើងថា គ្មានពន្ធដារប្រទេសណាស្រួលជាងកម្ពុជានោះទេ ដែលអាចនិយាយយោគយល់គ្នាបាន តែថាការយោគយល់នេះគឺស្ថិតក្នុងដំណាក់កាលអន្តរកាលប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីសម្ពោធអាគារស្នាក់ការកណ្ដាលអគ្គនាយកដ្ឋានពន្ធដារនៅរាជធានីភ្នំពេញ ព្រឹកថ្ងៃទី២១ ខែឧសភា ឆ្នាំ២០២៦ សម្ដេចធិបតី ហ៊ុន ម៉ាណែត បានថ្លែងថា ការប្រមូលពន្ធដារគឺការអនុវត្តតាមគោលការណ៍ស្មើភាព ហើយអ្នកបង់ពន្ធ និងមន្ត្រីពន្ធដារយល់ពីកាតព្វកិច្ច តួនាទីរៀងៗខ្លួន។ សម្ដេចក៏បានបន្ថែមទៀតថា ប្រសិទ្ធភាពនៃការប្រមូលពន្ធគយ និងពន្ធដារគឺជាការលើកកម្ពស់ការវិនិយោគនៅកម្ពុជា ហើយភាពមិនច្បាស់លាស់ និងមិនអាចប៉ាន់ប្រមាណបានរបស់ពន្ធដារគឺជាការរារាំងដល់ការប្រកួតប្រជែងរបស់កម្ពុជា។

សម្ដេចបានជំរុញយ៉ាងដូច្នេះថា៖ «បើសិនជាយើងមិនមានការប្រមូលចំណូលនេះទេយើងនៅតែពឹងចំណូលពីខាងក្រៅ ពីជំនួយអត់កើតទេ គឺត្រូវតែផ្ទៃក្នុងម្ចាស់ការលើខ្លួនឯង»។

សម្ដេចបានផ្ដល់អនុសាសន៍ឱ្យអគ្គនាយកដ្ឋានពន្ធដារបន្តក្នុងការធ្វើកំណែទម្រង់ ខិតខំបំពេញកាតព្វកិច្ចប្រមូលពន្ធ ពង្រឹងធនធានមនុស្សវិជ្ជាជីវៈ និងធ្វើទំនើបកម្មបន្ថែមទាន់សម័យកាលដើម្បីផ្ដល់ភាពងាយស្រួលដល់អ្នកជាប់ពន្ធអនុវត្តកាតព្វកិច្ចរបស់ខ្លួន។ ជាមួយគ្នានេះសម្ដេចបានណែនាំដល់អាជ្ញាធរពាក់ព័ន្ធ អាជ្ញាធរមូលដ្ឋាន និងតុលាការ សហការជាមួយអគ្គនាយកដ្ឋានពន្ធដារក្នុងការពង្រឹងការអនុវត្តច្បាប់ ធានាដល់ប្រសិទ្ធភាពនៃការប្រមូលពន្ធផងដែរ។

សម្ដេចថា៖ «ខ្ញុំស្នើដល់ក្រសួងស្ថាប័នពាក់ព័ន្ធ ជាអាថ៌អាជ្ញាធរមូលដ្ឋានគ្រប់ខេត្តក្រុង និងតុលាការចូលរួមគាំទ្រដល់ការអនុវត្តការងាររបស់អគ្គនាយកដ្ឋានពន្ធដារក្នុងការប្រមូលពន្ធ ដោយហេតុថាការប្រមូលចំណូលពន្ធគឺពិតជាមិនងាយស្រួលទេប្រសិនជាគ្មានការចូលរួមពីអាជ្ញាធរមូលដ្ឋាន និងស្ថាប័នពាក់ព័ន្ធនោះ»។

អគ្គនាយកដ្ឋានពន្ធដារគឺជាស្ថាប័នសាធារណៈរបស់រដ្ឋដែលមានតួនាទីក្នុងការប្រមូលចំណូលពន្ធផ្ទៃក្នុងគ្រប់ប្រភេទ បង់ចូលថវិកាជាតិដើម្បីជំរុញកំណើនសេដ្ឋកិច្ច និងការអភិវឌ្ឍជាតិ។ ស្ថាប័ននេះត្រូវបានតំឡើងកម្រិតពីនាយកដ្ឋាន មកជាអគ្គនាយកដ្ឋានពន្ធដារនៅខែកញ្ញា ឆ្នាំ២០០៨។ តាំងពីតំឡើងកម្រិតមកអង្គភាពនេះ បានប្រមូលចំណូលពន្ធកើនឡើងជាបន្តបន្ទាប់។ តាមការបញ្ជាក់របស់រដ្ឋមន្ត្រីសេដ្ឋកិច្ច ឧបនាយករដ្ឋមន្ត្រី អូន ព័ន្ធមុនីរ័ត្ន ថាចំណូលពន្ធដារបានកើនឡើងពី ៧៣៨លានដុល្លារអាមេរិកក្នុងឆ្នាំ២០១២ រហូតដល់ជាង ៣ ៥៧៧លានដុល្លារក្នុងឆ្នាំ២០២៥កន្លងទៅដែលមានការកើនឡើងជិត៤ដង៕

អត្ថបទដោយ ហ៊ុន សិរីវឌ្ឍន៍