អ្នកនាំពាក្យ៖ ករណីមន្ត្រី PM បាញ់កុក អនុវត្តតាមច្បាប់ មិនមែនធ្វើតាមមតិក្នុងបណ្ដាញសង្គមឡើយ

ករណីឃាត់ខ្លួនមន្ត្រីកងរាជអាវុធហត្ថម្នាក់ ដែលបានបាញ់សម្លាប់សត្វកុក ត្រូវបានអ្នកនាំពាក្យកងរាជអាវុធហត្ថលើផ្ទៃប្រទេស អះអាងថា គឺជាការអនុវត្តតាមនីតិវិធីច្បាប់ មិនមែនធ្វើឡើងតាមអារម្មណ៍ ឬតាមការបញ្ចេញមតិក្នុងបណ្ដាញព័ត៌មានសង្គមឡើយ។

កាលពីថ្ងៃទី៣០ ខែមករា ឆ្នាំ២០២៤ តាមរយៈវីដេអូឃ្លីបមួយ បានបង្ហាញពីសកម្មភាពរបស់បុរសម្នាក់ ដែលគេស្គាល់ថា ជាមន្ត្រីកងរាជអាវុធហត្ថស្រុកចិត្របុរី ឈ្មោះ កង សុផាណារ័ត្ន ពាក់សក្តិ១ បានបាញ់សម្លាប់សត្វកុកមួយក្បាល ដោយប្រើកាំភ្លើងខ្យល់។ ក្រោយប្រព្រឹត្តសកម្មភាពនេះ មន្ត្រីកងរាជអាវុធហត្ថរូបនេះ ក៏ត្រូវបានសមត្ថកិច្ចឃាត់ខ្លួនប្រគល់ឱ្យជំនាញរដ្ឋបាលព្រៃឈើ នៅថ្ងៃដដែលនោះ ដើម្បីបន្តកសាងនីតិវិធីបញ្ជូនទៅអយ្យការអមសាលាដំបូងខេត្តក្រចេះ។

តាមរយៈសេចក្ដីប្រកាសព័ត៌មាន នាថ្ងៃទី៣១ ខែមករា ឆ្នាំ២០២៤ លោកឧត្តមសេនីយត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានអះអាងដូច្នេះថា៖ «ការឃាត់ខ្លួនឈ្មោះ កង សុផាណារ័ត្ន ប្រគល់ជូនមន្ត្រីរដ្ឋបាលព្រៃឈើ គឺកងរាជអាវុធហត្ថអនុវត្តទៅតាមនីតិវិធីដែលមានចែងក្នុងច្បាប់ និងក្រមនីតិវិធីព្រហ្មទណ្ឌ មិនមែនធ្វើតាមអារម្មណ៍ ឬធ្វើតាមការបញ្ចេញមតិក្នុងប្រព័ន្ធព័ត៌មានសង្គម ឬខ្លាចដោយមិនមានការទទួលខុសត្រូវនោះទេ»។ បើតាមឧត្តមសេនីយ៍ត្រី អេង ហ៊ី ជុំវិញការប្រគល់មន្ត្រីរាជអាវុធហត្ថរូបនេះឱ្យទៅរដ្ឋបាលព្រៃឈើ គឺដោយសាររដ្ឋបាលព្រៃឈើ មានសមត្ថកិច្ច​ ជាមន្ត្រីនគរបាលយុត្តិធម៌ ក្នុងការស៊ើបអង្កេតបទល្មើសព្រៃឈើ និងចងក្រងសំណុំរឿងបញ្ជូនទៅតុលាការ ដូចមានចែងក្នុងច្បាប់ស្តីពីព្រៃឈើ។

ឧត្តមសេនីយត្រី អេង ហ៊ី បានគូសបញ្ជាក់ថា កងរាជអាវុធហត្ថ ក្រោមការដឹកនាំរបស់លោកនាយឧត្តមសេនីយ៍ សៅ សុខា បានដាក់ចេញនូវទិសស្លោកជាត្រីវិស័យក្នុងការអនុវត្តតួនាទីភារកិច្ច គឺ«ចំពោះប្រទេសជាតិត្រូវតែការពារ ចំពោះប្រជាជនត្រូវតែបម្រើ ច្បាប់ត្រូវតែគោរព និងបទល្មើសត្រូវតែបង្ក្រាប»។ ឧត្តមសេនីយ៍ត្រី បន្តថា យោធិននៃកងរាជអាវុធហត្ថគ្រប់រូប ត្រូវបានអប់រំបណ្ដុះបណ្តាល ហ្វឹកហ្វឺន ជាពិសេសការអប់រំចិត្តសាស្ត្រជាប្រចាំ ឱ្យគោរពច្បាប់ គោរពវិន័យកងទ័ព ប្រកាន់ខ្ជាប់ខ្ជួននូវក្រមសីលធម៌ វិជ្ជាជីវៈ ដោយលោក សង្កត់ធ្ងន់ថា «កុំថាឡើយបាញ់សត្វកុក សូម្បីតែសត្វចាបក៏មិនត្រូវបាញ់ទេ ព្រោះយើងជាមន្ត្រីប្រតិបត្តិច្បាប់»។

ក្នុងន័យនេះ លោកឧត្តមសេនីយ៍ត្រី អេង ហ៊ី បានលើកឡើងថា ក្នុងនាមជាមន្ត្រីប្រតិបត្តិច្បាប់ ត្រូវតែជាគំរូក្នុងការគោរពច្បាប់ បើប្រព្រឹត្តអំពើល្មើសត្រូវតែអនុវត្តតាមច្បាប់៕