មេអាវុធហត្ថផ្ទៃប្រទេស ឱ្យចុះធ្វើអធិការកិច្ច រកភាពមិនប្រក្រតីលើមេអាវុធហត្ថខេត្តក្រចេះ

មេបញ្ជាការកងរាជអាវុធហត្ថលើផ្ទៃប្រទេស នាយឧត្ដមសេនីយ៍ សៅ សុខា នៅថ្ងៃទី២៧ ខែវិច្ឆិកា បង្កើតក្រុមការងារចំពោះកិច្ចមួយដែលមានសមាសភាព៨រូប ដឹកនាំដោយមេបញ្ជាការរងអាវុធហត្ថលើផ្ទៃប្រទេស ចុះធ្វើអធិការកិច្ច និងត្រួតពិនិត្យនូវសកម្មភាពមិនប្រក្រតីនៃការប្រតិបត្តិតួនាទី-ភារកិច្ច របស់មេបញ្ជាការកងរាជអាវុធហត្ថខេត្តក្រចេះ ឧត្តមសេនីយ៍ត្រី សាក់ សារ៉ាង។

តាមរយៈសេចក្តីសម្រេចរបស់មេបញ្ជាការអាវុធហត្ថលើផ្ទៃ ប្រទេស ផ្ដល់សិទ្ធិឱ្យក្រុមការងារចំពោះកិច្ចអាជួបពិភាក្សាជាមួយអាជ្ញាធរ ស្ថាប័ន និងអង្គភាពដែលមានការពាក់ព័ន្ធ, ចេញលិខិតអញ្ជើញនាយទាហាន នាយទាហានរង និងពលទាហាននៃកងរាជអាវុធហត្ថ ព្រមទាំង អ្នកដែលមានការពាក់ព័ន្ធមកធ្វើការសាកសួរ-បំភ្លឺ ដើម្បីស្រាវជ្រាវរកឱ្យឃើញការពិតជាក់ស្តែង។ បូកសរុបលទ្ធផលការងារ ធ្វើរបាយការណ៍ជូនមេបញ្ជាការកងរាជអាវុធហត្ថលើផ្ទៃប្រទេស ដើម្បីពិនិត្យ-សម្រេច។

វិធានការរបស់មេអាវុធហត្ថលើផ្ទៃប្រទេស សៅ សុខា កើតឡើង បន្ទាប់ពីកាលពីថ្ងៃទី២៦ ខែវិច្ឆិកា ប្រធានសមាគមយុវជនស្រឡាញ់ធម្មជាតិ  តាន់ គីមសួរ ស្វែងរកអន្តរាគមន៍ឲ្យជួយបង្ក្រាបបទល្មើសព្រៃឈើពីមេបញ្ជាការអាវុធហត្ថខេត្តក្រចេះ ប៉ុន្តែមេអាវុធហត្ថខេត្តក្រចេះរូបមិនសហការ ប៉ុន្តែបញ្ជាឲ្យកូនចៅសួររកលិខិតបេសកកម្មពី លោក តាន់ គីមសួរ វិញ។

កាលថ្ងៃទី២៦ ខែវិច្ឆិកា ដដែល នាយឧត្ដមសេនីយ៍ សៅ សុខា ក៏បានណែនាំភ្លាមទៅកាន់មេបញ្ជាការកងរាជអាវុធហត្ថខេត្តក្រចេះ ត្រូវចូលរួមសហការបង្ក្រាបបទល្មើសព្រៃឈើ។ បន្ទាប់មក កម្លាំងជំនាញព័ត៌មានសន្តិសុខ នៃកងរាជអាវុធហត្ថលើផ្ទៃប្រទេស ក៏បានចុះទៅសហការ ដើម្បីទប់ស្កាត់និងបង្ក្រាបបទល្មើសព្រៃឈើតំបន់នោះដែលលោក តាន់ គីមសួរ រាយការណ៍។

កាលពីចុងខែឧសភា ឆ្នាំ២០២៥ ប្រធានសមាគមយុវជនស្រឡាញ់ធម្មជាតិ តាន់ គីមសួរ ក៏ធ្លាប់បានប្ដឹងទៅកាន់អង្គភាពប្រឆាំងអំពើពុករលួយឱ្យបើកការស៊ើបអង្កេតលើមេបញ្ជាការកងរាជអាវុធហត្ថខេត្តក្រចេះ និងឈានឆ្ពោះទៅចាត់វិធានការច្បាប់។ លោក តាន់ គីមសួរ ដាក់ពាក្យបណ្ដឹង ព្រោះសន្និដ្ឋានថា មេអាវុធហត្ថខេត្តក្រចេះ មានទំនាក់ទំំនងជាមួយឈ្មួញឈើដុះស្នឹមដ៏ល្បីឈ្មោះ ហើយថែមទាំងសហការគ្នាចរាចរផលអនុផលព្រៃឈើខុសច្បាប់៕

ដោយ៖ ង៉ិល ណារ៉ាត់​