កម្ពុជា ចូលរួមកិច្ចពិភាក្សាតុមូល នៃសន្និសីទថ្នាក់តំបន់ស្តីពីការអភិវឌ្ឍកុមារតូច ឆ្នាំ២០២៤

នារសៀលថ្ងៃទី២៩ ខែឧសភា ឆ្នាំ២០២៤ នេះ លោកស្រី គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា និងជា អនុប្រធានប្រចាំការគណៈកម្មាធិការជាតិគាំពារ និងអភិវឌ្ឍន៍កុមារតូច បានចូលរួម កិច្ចពិភាក្សាតុមូល ដែលជាសកម្មភាពមួយ នៃសន្និសីទថ្នាក់តំបន់ ស្តីពី ការអភិវឌ្ឍកុមារតូច ឆ្នាំ២០២៤ ស្តីពី វឌ្ឍនភាពការអភិវឌ្ឍកុមារតូច បញ្ហាប្រឈម និងពិភាក្សាពីឱកាសក្នុងការលើកកម្ពស់ការអភិវឌ្ឍកុមារនៅក្នុងតំបន់។

កិច្ចពិភាក្សានេះ មានអ្នកចូលរួមពីសំណាក់រដ្ឋមន្ត្រី អនុរដ្ឋមន្ត្រី មន្ត្រីជាន់ខ្ពស់ និងតំណាងអង្គការគន្លឹះពាក់ព័ន្ធ សរុបចំនួន ៥៤ នៅទីក្រុងប៉េណាំង ប្រទេសម៉ាឡេស៊ី។

កិច្ចពិភាក្សាតុមូល ដឹកនាំដោយ លោកស្រី YB Madam Syerleena binti Abdul Rashid សមាជិករដ្ឋសភានៃប្រទេសម៉ាឡេស៊ី ជាប្រធានអង្គប្រជុំ និង លោកបណ្ឌិត Myo-Zin Nyunt អនុប្រធាន អង្គការយូនីសេហ្វតំបន់អាស៊ី-ប៉ាស៊ីហ្វិក ជាសហប្រធាន។

ក្នុងឱកាសនោះលោកស្រី គឹម សេដ្ឋានី រដ្ឋលេខាធិការប្រចាំការ បានចែករំលែកដល់អ្នកចូលរួមក្នុងកិច្ចពិភាក្សាតុមូល ដោយផ្តោតលើ៖

– វឌ្ឍនភាពនៃកម្មវិធីគាំពារ និងអភិវឌ្ឍកុមារតូច ឆ្លើយតបការប្តេជ្ញាចិត្តនៃសេចក្តីថ្លែងការទីក្រុងតាស្កេន និងការប្តេជ្ញាចិត្តនៃសេចក្តីថ្លែងការរបស់មេដឹកនាំអាស៊ាន ស្តីពីការគាំពារ និងអភិវឌ្ឍន៍កុមារតូច។

– បញ្ហាប្រឈមគន្លឹះ ពាក់ព័ន្ធការគាំពារ និងអភិវឌ្ឍកុមារតូច។

– វិធានការគន្លឹះពាក់ព័ន្ធការងារអភិបាលកិច្ច ធនធានហិរញ្ញវត្ថុ និងការពង្រឹងយន្តបែបពហុវិស័យ សម្រាប់ការគាំពារ និងអភិវឌ្ឍកុមារតូច។

គួរបញ្ជាក់ថា សន្និសីទថ្នាក់តំបន់ ឆ្នាំ២០២៤ ស្តីពី ការអភិវឌ្ឍកុមារតូច ប្រារព្ធពីថ្ងៃទី២៨ ដល់ ៣១ ខែឧសភា ឆ្នាំ២០២៤ តំណាងប្រតិភូកម្ពុជាចូលរួមជាវាគ្មិនតាមប្រធានបទមួយចំនួនពាក់ព័ន្ធ៖ ១. ការអនុវត្តការងារគាំពារ និងអភិវឌ្ឍកុមារតូចបែបពហុវិស័យ ២. ការអនុវត្កញ្ចប់អប់រំមាតាបិតាសម្រាប់ការគាំពារ និងអភិវឌ្ឍកុមារតូច និង៣. តួនាទីរបស់ភ្នាក់ងារសុខភាពក្នុងសហគមន៍ក្នុងការជួយកុមារតូចមានការអភិវឌ្ឍយឺតយ៉ាវ៕