ទើបតែ​បើកការដ្ឋាន ស្ពានឆ្លងកាត់ទន្លេបាសាក់នៅ​ព្រែកប្រា សាងសង់​សម្រេច​បានជាង ១០ ភាគរយ

ក្រោយប្រកាស​​បើកការដ្ឋាន​សាងសង់​ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) កាលពីថ្ងៃទី១៩ ខែកុម្ភៈ ឆ្នាំ២០២៤ ​​​ដំណើរការ​សាងសង់​ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) វ​ឌ្ឍនភាពមកដល់ពេលនេះ​សម្រេច​​បានប្រមាណ ១០%។

ស្ពានឆ្លង​កាត់​ទន្លេបាសាក់​​ (ចាក់អង្រែក្រោម-ព្រែកប្រា) មាន​ចំណុច​ចាប់ផ្ដើម​ពី​ត្រើយ​ខាងលិច​ទន្លេបាសាក់ ស្ថិតក្នុង​សង្កាត់​ចាក់អង្រែ​ក្រោម ខណ្ឌមានជ័យ និង​ចំណុច​បញ្ចប់​នៅ​ត្រើយ​ខាងកើត​ទន្លេបាសាក់ ស្ថិតក្នុង​សង្កាត់​​​​​ព្រែក​ប្រា ខណ្ឌ​ច្បារអំពៅ។ ក្រៅពី​សាងសង់ស្ពាន ក្នុង​គម្រោងមាន​ការ​សិក្សា​​បន្ថែម​លើការ​បង្កើតផ្លូវមួយខ្សែ​ថ្មី​តភ្ជាប់ពី​គល់ស្ពាន​ទៅ​ផ្លូវជាតិលេខ ១ កាត់តាមបុរី ប៉េង ហួត បឹងស្នោរ ដើម្បី​​ដោះស្រាយការកកស្ទះចរាចរណ៍លើកំណាត់ផ្លូវជាតិលេខ ១​។

ខណៈដឹកនាំមន្ត្រីជំនាញ និងតំណាងក្រសួងពាក់ព័ន្ធចុះពិនិត្យទីតាំងគម្រោងផ្លូវនិងស្ពានឆ្លងកាត់ទន្លេបាសាក់ ស្ថិតនៅក្នុងសង្កាត់ចាក់អង្រែក្រោម ខណ្ឌមានជ័យ និងសង្កាត់ព្រែកប្រា ខណ្ឌច្បារអំពៅ នារសៀល​នៅ​ថ្ងៃទី ៣០ ខែឧសភា ឆ្នាំ​២០២៤ លោក ឃួង ស្រេង អភិបាលរាជធានីភ្នំពេញបាន​បញ្ជាក់​ថា នៅពេល​ស្ពានឆ្លងកាត់ទន្លេបាសាក់ (ចាក់អង្រែក្រោម-​ព្រែកប្រា) សាងសង់​រួច រួម​ទាំងការ​​​ស្ថាបនា​បើក​ផ្លូវថ្មីកាត់តាមបុរី ប៉េង ហួត បឹងស្នោរ នឹងអាច​ដោះស្រាយ​ការកកស្ទះចរាចរណ៍លើកំណាត់ផ្លូវជាតិលេខ១។

លោកឃួន ស្រេង​ បាន​អះអាង​​ថា ​ខណៈ​ស្ពាន​កោះនរា​ដែល​ស្ថាបនា​និង​បាន​សម្ពោធ​ដាក់​ឲ្យ​ប្រើប្រាស់ អាចដោះស្រាយការកកស្ទះចរាចរណ៍លើកំណាត់ផ្លូវជាតិលេខ១ បានប្រមាណ ៣០ ភាគរយ ដោយឡែក​​ស្ពានឆ្លងកាត់ទន្លេ​បាសាក់ (ចាក់អង្រែក្រោម-ព្រែកប្រា)​ រួម​ទាំំង​ការ​សិក្សាបើក​​​ផ្លូវថ្មី​ពីផ្លូវជាតិលេខ ១ រហូតដល់គល់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) តភ្ជាប់​ទៅផ្លូវ ៦០ ម៉ែត្រក្នុង​ខណ្ឌមានជ័យ និងបន្តឆ្ពោះទៅ​ផ្លូវ ២១៧ (ផ្លូវចំការដូង) នឹង​ជួយ​​រំដោះ​ការ​កកស្ទះ​ចរាចរណ៍​លើ​កំណាត់ផ្លូវ​ជាតិមួយ ១ បានកាន់តែល្អ​មួយ​កម្រិត​ថែមទៀត​។

លោកចេង មុនីរ៉ា អភិបាលខណ្ឌច្បារអំពៅ បានបញ្ជាក់ថា ការ​សាងសង់​ផ្លូវ​តភ្ជាប់ពីផ្លូវជាតិលេខ១ កាត់តាមបុរី ប៉េង ហួត បឹងស្នោរ រហូតដល់គល់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) មានផលប៉ះពាក់ដីប្រជាពលរដ្ឋមួយចំនួន តែក្រុម​ការងារកំពុងខិតខំដោះស្រាយជាមួយប្រជាពលរដ្ឋ ដើម្បីធ្វើយ៉ាងណា​ឲ្យ​គម្រោងទទួលបានជោគជ័យ ដើម្បី​ដោះស្រាយបាននូវការកកស្ទះចរាចរណ៍ពីផ្លូវជាតិលេខ១។

ស្ពានចាក់អង្រែ ក្រោម-ព្រែកប្រា បានបើកការដ្ឋានសាងសង់កាលពីថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដោយ​ចាយថវិកាប្រមាណ ៦០ លានដុល្លារអាមេរិក និង ប្រើ​រយៈពេលសាងសង់ ៤២ ខែ ដោយឥណទានសម្បទានពីប្រទេសចិន។

ស្ពាន​នេះ​មានប្រវែងសរុប ១.៦៥០ម៉ែត្រ (ប្រវែងស្ពាន ៨៤៥,៧០ម៉ែត្រ, ទទឹងផ្លូវ ២៧ម៉ែត្រ, ផ្លូវតភ្ជាប់ក្បាលស្ពានប្រវែង ៨០៤,៣០ម៉ែត្រ, ទទឹងផ្លូវ ២៧ម៉ែត្រ)។ វឌ្ឍនភាព​សាងសង់​​សម្រេចបានជាង ១០% ដោយបច្ចុប្បន្នបានចាក់បេតុងសសរគ្រឹះចំនួន ២៤ ដើម រួចរាល់ ១០០% និង​កំពុងបន្តរៀបចំដំឡើងពុម្ពជើងតាង ព្រមទាំងការងារសំខាន់ៗមួយចំនួនទៀត៕