ពងទាកូនស្រែរនោងនៅតែលក់ដាច់ទោះស្ថិតក្នុងបរិបទកូវីដ

ពងទាកូនស្រែរនោង នៅតែមានទីផ្សារលក់ចេញ ក្នុងមួយថ្ងៃៗ បើទោះបីជាស្ថិតក្នុងបរិបទនៃការរីករាលដាល នៃជំងឺកូវីដ១៩ យ៉ាងណាក៏ដោយ។

លោក សូត សុផល ប្រធានសមាគមអាជីវកម្មស្រែរនោង ស្រុកតាំ្រកក់ ខេត្តតាកែវ បានប្រាប់ថា   បើទោះជាមានការផ្ទុះរាលដាលពីវីរុសកូវីដ១៩ យ៉ាងណាក៏ដោយក៏អ្នកធ្វើអាជីវកម្មពងទាសាប ពងទាកូនក្នុងសមាគមអាជីវកម្មពងទាកូនស្រែរនោងនៅតែលក់ដាច់ដដែល តែមានការថយចុះបរិមាណនៅតម្លៃតិចតួច។

លោក សូត សុផល បន្តទៀតថាក្នុងឆ្នាំដែលកន្លងទៅពងទាកូនស្រែរនោងដែលល្បីល្បាញថាមានរសជាតិឆ្ងាញ់នោះអាចលក់ចេញបានក្នុង១ថ្ងៃចាប់ពី ៨ពាន់គ្រាប់ទៅដល់១ម៉ឺនគ្រាប់។ ក៏ប៉ុន្តែមកដល់ពេលនេះសមាគមអាជីវកម្មពងទាកូនស្រែរនោងអាចបញ្ចេញលក់បានចាប់ពី៥ពាន់ទៅ៧ពាន់គ្រាប់ប៉ុណ្ណោះក្នុងនោះពងទាសាបអាចលក់ចេញបានចាប់ពី៣ពាន់ទៅ៤ពាន់គ្រាប់ក្នុង១ថ្ងៃ។

ដោយឡែកបើប្រៀបធៀបនិយាយអំពីតម្លៃវិញលក់ចេញទន្ទឹមនឹងការផ្ទុះរាលដាលជំងឺកូវីដ១៩ ពងទាកូននិងពងទាសាបក៏មានតម្លៃខុសគ្នាតិចតួចប៉ុណ្ណោះដោយក្នុងនោះពងទាសាបលក់ចេញបាន៣៥០រៀលទៅ៣៦០រៀលក្នុង១គ្រាប់និងចំពោះពងទាកូនមកដល់ពេលនេះអាចលក់បាន៤៥០រៀលទៅ៥០០រៀលក្នុង១គ្រាប់ជាតម្លៃដែលកំពុងហក់ឡើងវិញ។

ប្រធានសមាគមអាជីវកម្មរូបនេះបន្តទៀតថាក្នុងខែធ្នូសម្បូរចំណីទាច្រើនអាចពងទាមានតម្លៃចុះបន្តិច។បច្ចុប្បន្នសមាគមមានសមាជិកផលិតពងទាកូនមានចំនួន២៧ឡស្មើនឹង២៧គ្រួសារបើសរុបទាំងអ្នកប្រមូលទិញផងមានរហូតដល់ជាង១០០នាក់៕

អត្ថបទ៖កញ្ញា វ៉ាត