ព័ត៌មានជាតិ

ជម្រះមន្ទិល! មាស ប៊ុនថេន ត្រូវប៉ះ Mario ម្តងទៀតខែធ្នូការពារខ្សែក្រវាត់

បានផុស

២ years មុន

នៅ

ថ្ងៃអង្គារ ៨ តុលា ២០២៤

ដោយ

កីឡាករវ័យក្មេង មាស ប៊ុនថេន ត្រូវជួបកីឡាករអេស្ប៉ាញ Mario Alvarez ម្តងទៀតនាខែធ្នូ ឆ្នាំ២០២៤ បន្ទាប់ពីអ្នកទាំងពីរបានជួបគ្នាកាលពីថ្ងៃទី៥ ខែតុលា ឆ្នាំ២០២៤ ដោយលទ្ធផលទទួលរងការរិះគន់ច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សឿ វណ្ណៈ ស្ថាបនិកក្លិប Kun Khmer Super Fight ដែលជាអ្នករៀបចំកម្មវិធីប្រកួតបានឲ្យដឹងថា ដោយសារការប្រកួតមិនដាច់ស្រេច ទាំងសាមីខ្លួនកីឡាករក៏មិនអស់ចិត្ត និងអ្នកគាំទ្រក៏មិនពេញចិត្តច្រើន ដូច្នេះកីឡាករ មាស ប៊ុនថេន ត្រូវប្រកួតជាមួយកីឡាករអេស្ប៉ាញ Mario Alvarez ម្តងទៀត។

លោកបានបញ្ជាក់ថា មាស ប៊ុនថេន ត្រូវការពារខ្សែក្រវាត់ម៉ារ៉ាតុងគុនខ្មែរជាមួយ Mario ដោយត្រូវប្រកួត៥ទឹក។ កាលពីជួបគ្នាពីថ្ងៃទី៥ ខែតុលា អ្នកទាំងពីរប្រកួតតែ៣ទឹក ក្នុងនោះចៅក្រមបានផ្តល់ពិន្ទុមិនឯកច្ឆន្ទឲ្យ មាស ប៊ុនថេន ឈ្នះ ប៉ុន្តែលទ្ធផលនេះត្រូវបានអ្នកគាំទ្រភាគច្រើនរិះគន់ដោយគិតថា កីឡាករអេស្ប៉ាញជាអ្នកឈ្នះ។

តាមការរៀបចំឲ្យជួបគ្នាសាថ្មី កីឡាករ Mario Alvarez មុនពេលឡើងយន្តហោះទៅប្រទេសអេស្ប៉ាញវិញបាននិយាយថា ល្អណាស់ដែលបានរៀបចំឲ្យប្រកួតឡើងវិញ ហើយរូបគេនឹងខិតខំប្រឹងប្រែងដើម្បីវិលត្រឡប់មកកម្ពុជាម្តងទៀត។

បន្ទាប់ពីប្រកួតជាមួយ មាស ប៊ុនថេន នៅខែធ្នូ ឆ្នាំ២០២៤ កីឡាករអេស្ប៉ាញ Mario អាចនឹងត្រូវជួបកីឡាករគុនខ្មែរផ្សេងទៀតនៅទីក្រុង Real Madrid ប្រទេសអេស្ប៉ាញ នៅខែកុម្ភៈ ឆ្នាំ២០២៥ ដែលកីឡាករគុនខ្មែរនឹងទៅប្រកួតនៅទីនោះ។

សូមបញ្ជាក់ថា មាស ប៊ុនថេន ត្រូវបានដាក់ជំនួស រិន ដេវីដ ដែលបានដកខ្លួនពីការប្រកួតខ្សែក្រវាត់ម៉ារ៉ាតុងគុនខ្មែរអន្តរជាតិ ដូច្នេះរូបគេមានពេលវេលាមិនច្រើនទេក្នុងការត្រៀមខ្លួន ប៉ុន្តែសម្រាប់ការជួបគ្នាសាជាថ្មីដែលមានពេលរហូតដល់ជាង២ខែទៀតគឺជាពេលវេលាដ៏សម្រាប់រូបគេក្នុងការត្រៀមខ្លួន៕