ត្រឹមមួយ​ថ្ងៃ ក្រុង​បាវិតផ្ទះ​​​ឆ្លង​បន្ត​គ្នា​ជិត ៣០ នាក់ សុទ្ធតែ​ខ្មែរ​ទាំង​អស់

ក្រុង​បាវិត​ ខេត្ត​ស្វាយរៀង​បាន​ផ្ទុះករណី​រាលដាល​​​យ៉ាងធ្ងន់ធ្ងរ មិន​ធ្លាប់​មាន​ត្រឹម​ ២៤ ម៉ោង​នេះ មាន​អ្នក​​ឆ្លងកូវីដ ២៦ នាក់។ ទូទាំង​ខេត្ត​ស្វាយរៀងដែល​មានអ្នក​ឆ្លង​សរុប ២៨ នាក់ គ្រាន់តែទីក្រុង​បាវិត​​ឆ្លង​​បន្ត​គ្នា​​រហូត​ដល់ ២៦ នាក់។

ការ​ឆ្លង​ទ្រង់ទ្រង​ធំ​នេះ ជា​កំណត់​ត្រា​អាក្រក់​បំផុត​សម្រាប់​ក្រុង​ជាប់​ព្រំដែន​វៀតណាម​នេះ។

រដ្ឋបាលខេត្តស្វាយរៀងនៅថ្ងៃទី ៣០ ខែមីនា បានស្នើទៅម្ចាស់កាស៊ីណូទាំងអស់នៅក្នុងខេត្តស្វាយរៀង ផ្អាកដំណើរការជាបណ្តោះអាសន្ន ដើម្បីការពារការឆ្លងរាលដាលជំងឺកូវីដ១៩ក្នុងខេត្ត ស្របពេលដែលតួលេខឆ្លងក្នុងខេត្តកំពុងហក់ឡើងរៀងរាល់ថ្ងៃ។

ដោយសារ​តែ​ស្ថានភាពនៃការរីករាលដាលជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ កំពុងបន្តកើតឡើង គួរឱ្យ​ព្រួយបារម្ភ ដូច្នេះអាជ្ញាធរខេត្តស្វាយរៀង សូមធ្វើការផ្អាកសកម្មភាពអាជីវកម្មគ្រប់ប្រភេទក្នុងកាស៊ីណូចាប់ពីថ្ងៃទី៣០ ខែមីនា ឆ្នាំ២០២១នេះ រហូតដល់មានការជូនដំណឹងសារជាថ្មី។

ដោយឡែក​ថ្មីៗនេះ ខេត្តស្វាយរៀងក៏​បាន​រកឃើញអ្នកពាក់ព័ន្ធ ១១១ នាក់ ជាមួយបុរសជនជាតិខ្មែរម្នាក់​ដែលឆ្លងជំងឺកូវីដ១៩ ​ស្នាក់នៅបន្ទប់ជួលមួយកន្លែងក្នុងក្រុងបាវិត។ បុរស​រងគ្រោះ ត្រូវបានបញ្ជូនទៅព្យាបាលនៅមន្ទីរពេទ្យបង្អែកស្វាយជ្រុំនៅយប់ថ្ងៃទី៣០ខែមីនា។ អ្នកប៉ះពាល់និងប្រយោលសរុបចំនួន១១១ នាក់ ដែល​មានទាំង​ប្រពន្ធ​និងម្តាយ​របស់​បុរស​រូប​នេះ ត្រូ​វ​យកទៅ​ធ្វើ​តេស្ត​សំណាក និង​ធ្វើចត្តាឡីស័ករយៈពេល១៤ថ្ងៃ។

គួរ​បញ្ជាក់ថ​ា គិត​ត្រឹមព្រឹកថ្ងៃ ០២ មេសានេះ នៅទូទាំង​ខេត្ត​ស្វាយរៀង​មាន​អ្នក​ជំងឺកូវីដ ៥៤ នាក់​ កំពុង​សម្រាក​ព្យាបាល៕