សម្ដេចតេជោប្រាប់ប្រធានព្រឹទ្ធសភាបារាំង ថា កម្ពុជាទុកចិត្តខ្លាំងលើការគាំទ្រពីបារាំងក្នុងសំណុំរឿងព្រំដែនជាមួយថៃ

ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានប្រាប់ទៅប្រធានព្រឹទ្ធសភាបារាំង ថា កម្ពុជាមានជំនឿទុកចិត្តខ្លាំងចំពោះការគាំទ្ររបស់ប្រទេសបារាំងក្នុងសំណុំរឿងព្រំដែនជាមួយប្រទេសថៃ ដែលកម្ពុជាកំពុងរងការឈ្លានពានពីប្រទេសជិតខាងមួយនេះ។

តាមរយៈសារលិខិតមួយច្បាប់ផ្ញើជូនលោក Gérard Larcher ប្រធានព្រឹទ្ធសភាបារាំង ក្នុងការអបអរសាទរទិវាបុណ្យជាតិបារាំង ថ្ងៃ១៤ ខែកក្កដា សម្ដេចតេជោ ហ៊ុន សែន បានគូសរំលេចពាក់ព័ន្ធនឹងបញ្ហាព្រំដែនរវាងកម្ពុជា និងថៃ ដែលកំពុងកើតមានដ៏តានតឹងនាពេលនេះ។

លិខិតរបស់សម្ដេចតេជោ បានបញ្ជាក់ទៅកាន់ប្រធានព្រឹទ្ធសភាបារាំងដូច្នេះថា«នៅខណៈពេលដែលកម្ពុជាកំពុងប្រឈមមុខនឹងការរំលោភបំពានលើបូរណភាពទឹកដីរបស់ខ្លួន ប្រទេសកម្ពុជាដឹងថាអាចទុកចិត្តលើការគាំទ្រពីប្រទេសបារាំង និងស្ថាប័នរបស់ខ្លួន ចំពោះបណ្ដឹងទៅស្ថាប័នតុលាការយុត្តិធម៌អន្តរជាតិខ្ពស់បំផុត ក្នុងការការពារសិទ្ធិ និងបូរណភាពទឹកដីរបស់ខ្លួន»។

កន្លងមក ជុំវិញបញ្ហាព្រំដែនកម្ពុជា-ថៃ ដែលមានភាពចម្រូងចម្រាស់នេះ ប្រធានាធិបតីបារាំង លោក អេម៉ានុយអែល ម៉ាក្រុង ធ្លាប់បានប្រាប់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងជំនួបនៅទីក្រុងនីស កាលពីខែមិថុនា ឆ្នាំ២០២៥ ថា បារាំងអាចជួយសម្របសម្រួលផ្តល់ឯកសារដល់កម្ពុជា និងថៃ ដើម្បីដោះស្រាយជម្លោះព្រំដែនរវាងប្រទេសទាំងពីរ ក្នុងករណីចាំបាច់។

ជាថ្មីម្ដងទៀត ឆ្លើយតបនឹងសំណើរបស់សម្ដេចតេជោ ហ៊ុន សែន លោក Jacques PELLET ឯកអគ្គរដ្ឋទូត​បារាំងប្រចាំ​កម្ពុជា បានបញ្ជាក់ប្រាប់ថា បារាំងត្រៀមផ្តល់​ឯកសារពាក់ព័ន្ធ​នឹងបញ្ហាព្រំដែនជូនកម្ពុជា រួម​ទាំងភាគីពាក់ព័ន្ធក្នុងការដោះស្រាយបញ្ហានេះដោយសន្តិវិធី ផ្អែកតាមច្បាប់អន្តរជាតិ។ ទន្ទឹមនឹងនេះ លោកទូតក៏អះអាងពីគោលជំហររបស់បារាំងចំពោះការគាំទ្រ​ជំហររបស់កម្ពុជាក្នុងការដោះស្រាយតាមច្បាប់អន្តរជាតិ ជាពិសេសតុលាការយុត្តិធម៌អន្តរជាតិ៕

ដោយ៖ ធឿន វ៉ាន់សុង