ព័ត៌មានជាតិ

ពលរដ្ឋភូមិប្រការ ស្នើអាជ្ញាធរចុះពិនិត្យតាមបណ្ដោយផ្លូវបេតុងព្រៃ.ស មានទឹកដក់ ក្លិនស្អុយ ពិបាករស់នៅ

បានផុស

៨ ខែ មុន

នៅ

ថ្ងៃអង្គារ ៧ តុលា ២០២៥

ដោយ

ប្រជាពលរដ្ឋរស់នៅភូមិប្រការ ស្នើអាជ្ញាធរចុះត្រួតពិនិត្យតាមបណ្ដោយផ្លូវបេតុងព្រៃ.ស ក្រោយមានភ្លៀងធ្លាក់ម្ដងៗ ទឹកតែងតែដក់នៅលើចិញ្ចើមផ្លូវ មានក្លិនស្អុយ ពិបាករស់នៅ ជាពិសេសដុះស្លែកាន់លើផ្លូវធ្វើឲ្យអ្នកដំណើរគេចពីរថយន្តអាចរអិលដួលផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងទឹកស្អុយដក់នៅលើចិញ្ចើមផ្លូវនេះ ស្ថិតតាមបណ្ដោយផ្លូវបេតុងព្រៃ.ស ភូមិប្រការ សង្កាត់ព្រៃ.ស ខណ្ឌដង្កោ រាជធានីភ្នំពេញ។

អ្នកស្រី លីណា ជាប្រជាពលរដ្ឋរស់នៅតំបន់ខាងលើ បានឲ្យដឹងថា ទឹកដែលដក់នៅលើចិញ្ចើមផ្លូវនេះ កើតចេញពីទឹកភ្លៀង។ មិនដឹងថាយ៉ាងម៉េចនោះទេបានជាទឹកនេះមិនហូរចូលប្រព័ន្ធលូបង្ហូរទឹក ដក់នៅចិញ្ចើមផ្លូវ ធ្វើឲ្យមានក្លិនស្អុយប៉ះពាល់ដល់អ្នកដែលមានផ្ទះក្បែរហ្នឹង រួមជាមួយអ្នកដំណើរផងដែរ។

ចំណែកប្រជាពលរដ្ឋម្នាក់ទៀត សុំមិនបញ្ចេញឈ្មោះ ក៏បានស្នើសុំឲ្យអាជ្ញាធរពាក់ព័ន្ធ ជាពិសេសអាជ្ញាធរមូលដ្ឋាន សូមមេត្តាជួយពិនិត្យមើលផង បើសិនជាទុកឲ្យទឹកនេះនៅដក់ស្អុយបន្តទៀត តើឲ្យប្រជាពលរដ្ឋរស់នៅយ៉ាងម៉េចកើត ព្រោះទឹកស្អុយនេះអាចធ្វើឲ្យប៉ះពាល់ដល់សុខភាពផ្លូវដង្ហើម ខណៈត្រូវចេញចូលផ្ទះស្រូបយកក្លិនស្អុយនេះរាល់ថ្ងៃ។

ពាក់ព័ន្ធបញ្ហានេះ លោក សួង សំអុល ចៅសង្កាត់ព្រៃ.ស បានបញ្ជាក់ឲ្យកម្ពុជាថ្មីដឹងថា ទីតាំងខាងលើនេះ អាជ្ញាធរសង្កាត់បានរាយការណ៍ទៅលោកស្រីអភិបាលខណ្ឌរួចហើយ។ ចំពោះបញ្ហាទឹកដក់ស្អុយនៅលើផ្លូវ អាជ្ញាធរនឹងធ្វើការកៀរទឹកសម្អាតស្លែចេញជាបណ្ដោះអាសន្ន ដើម្បីសម្រួលដល់ការធ្វើដំណើររបស់ប្រជាពលរដ្ឋ បញ្ចៀសគ្រោះថ្នាក់កើតឡើងជាយថាហេតុ។

លោកបន្តថា ទីតាំងនេះស្ថិតនៅក្នុងភូមិប្រការដែលលោកស្រីអភិបាលខណ្ឌបានលើកជាគម្រោងរួចហើយ ក្នុងការដាក់ប្រព័ន្ធលូរំដោះទឹកមានមុខកាត់ទំហំ ១ ម៉ែត្រ នាឆ្នាំក្រោយនេះ៕

អត្ថបទ ៖ ម៉េង

វីដេអូតាមបណ្ដោយផ្លូវបេតុងព្រៃ.ស ដែលមានទឹកដក់ ក្លិនស្អុយ