អ្នកតាមដាន៖ ការបង្កើតចលនាតស៊ូរបស់ទណ្ឌិត សម រង្ស៊ី មិនមែនជារឿងប្រជាធិបតេយ្យទេ តែជាអំពើវិទ្ធង្សនា និងជាឧក្រិដ្ឋ​កម្ម

បន្ទាប់ពីទណ្ឌិត សម រង្ស៊ី បានប្រកាសបង្កើតចលនាជាតិតស៊ូ និងបានខិតខំប្រកូកប្រកាសឱ្យពលរដ្ឋខ្មែរក្រៅប្រទេសចូលរួមនោះ អ្នកនាំពាក្យរាជរដ្ឋាភិបាល អ្នកវិភាគ និងអ្នកតាមដានស្ថានភាពនយោបាយនៅកម្ពុជា បានថ្កោលទោស ហើយអះអាងថា នេះ ជាទង្វើបង្កគ្រោះដល់ជាតិ និងប្រជាជនកម្ពុជា។ ក្នុងនោះ លោក យឿន យឿត អ្នកតាមដានការអភិវឌ្ឍសង្គម និងនយោបាយ បានគូសបញ្ជាក់ថា ការបង្កើតចលនាជាតិតស៊ូរបស់ទណ្ឌិត សម រង្ស៊ី ដែលជាចលនាខុសច្បាប់នេះ មិនមែនជារឿងប្រជាធិបតេយ្យទេ តែជាអំពើវិទ្ធង្សនា និងជាឧក្រិដ្ឋ​កម្ម។

តាមរយៈបណ្តាញសង្គមហ្វេសប៊ុក លោក យឿន យឿត បានសរសេរថា៖ «ខ្ញុំសូមថ្កោលទោសចំពោះទណ្ឌិត សម រង្ស៊ី ជនក្បត់ជាតិបីជំនាន់ ដែលបានប្រកាសបង្កើតចលនាជាតិតស៊ូខុស​ច្បាប់នៅក្រៅប្រទេស ដើម្បីផ្តួលរំលំរាជរដ្ឋាភិបាលស្របច្បាប់ ពីព្រោះចលនាដែលបង្កើតឡើងដោយទណ្ឌិត សម រង្ស៊ី ជនក្បត់​ជាតិបីជំនាន់នេះ ជាអំពើខុសច្បាប់ ដែលបានជំរុញឱ្យក្រុម​ប្រឆាំង បក្ខពួកជ្រុលនិយមរបស់ខ្លួនទៅបង្កើតព្រឹត្តិការណ៍ ដោយយកគំរូតាមប្រទេសបង់ក្លាដេស ក្នុងចេតនាធ្វើការផ្តួលរំលំ​រាជរដ្ឋាភិបាលស្របច្បាប់ ដែលកើតចេញពីការបោះឆ្នោតតាមឆន្ទៈ​របស់ប្រជាពលរដ្ឋកម្ពុជា»។  

សម្រាប់អ្នកតាមដានការអភិវឌ្ឍសង្គម និងនយោបាយរូបនេះ គឺការបង្កើតចលនាជាតិតស៊ូខុស​ច្បាប់នេះ មិនមែនជារឿងលទ្ធិប្រជាធិបតេយ្យ សេរីភាព ឬ សិទ្ធិមនុស្សនោះទេ ​ប៉ុន្តែបានឆ្លងផុតបន្ទាត់ក្រហម​ឈាន​ដល់ផែន​ការធ្វើរដ្ឋប្រហារ ដែល​ជាអំពើវិទ្ធង្សនា និងជាឧក្រិដ្ឋ​កម្មយ៉ាងធ្ងន់ធ្ងរ​បំផុត​ដែលប៉ះពាល់ដ​ល់សន្តិសុខជាតិ។ លោកសង្កត់ធ្ងន់ថា៖ «ដែលបង្កើតឡើងដោយក្រុមក្បត់ជាតិ ការកៀរគរពលករខ្មែរឱ្យគាំទ្រចលនាតស៊ូ ឬរដ្ឋាភិបាលបណ្ដោះអាសន្នខុសច្បាប់ គឺជាការបំផ្លាញពលករ និងលទ្ធិប្រជាធិបតេយ្យនៅកម្ពុជា»។

លោក សម រង្ស៊ី តាមរយៈបណ្តាញសង្គមហ្វេសប៊ុកផ្លូវការរបស់លោកបានប្រកាសបង្កើតចលនាខុសច្បាប់មួយនៅក្រៅប្រទេសឈ្មោះថា ចលនាជាតិខ្មែរតស៊ូ ដែលនឹងឈានទៅបង្កើតរដ្ឋាភិបាលមួយពេញលក្ខណៈ ស្ថិតនៅក្រៅប្រទេសជាបណ្តោះអាសន្ន ដើម្បីរៀបចំផែនការទម្លាក់រាជរដ្ឋាភិបាលស្របច្បាប់នៅក្នុងប្រទេសកម្ពុជា ក្រោមលេសទាមទារលទ្ធិប្រជាធិបតេយ្យ សិទ្ធិសេរីភាព និងយុត្តិធម៌សង្គម ជាដើម។ ថ្មីៗនេះ ទណ្ឌិតរត់ចោលស្រុករូបនេះ កំពុងតែខិតខំប្រកូកប្រកាស និងញុះញង់ឱ្យប្រជាពលរដ្ឋខ្មែរ និងពលករនៅក្រៅប្រទេសឱ្យចូលរួមនៅក្នុងចលនាខុសច្បាប់មួយនេះ។

ចំពោះចលនាខុសច្បាប់នេះ អ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា ធ្លាប់បានគូសបញ្ជាក់រួចមកហើយថា វា​ គឺជាអំពើប្រឆាំងនឹងប្រជាធិបតេយ្យផង ប្រឆាំងនឹងច្បាប់របស់កម្ពុជាផង​ ដែលសកម្មភាពនេះ នឹងត្រូវប្រឈមចាត់វិធានការច្បាប់ជាធរមាន។ លោក ប៉ែន បូណា ថែមទាំងចាត់ទុកបុគ្គលលោក សម រង្ស៊ី ជាមនុស្សប្រឆាំងនឹងប្រជាធិបតេយ្យ ត្រង់ថាលោកមិនដែលទទួលស្គាល់ការបោះឆ្នោត ដែលប្រទេសប្រជាធិបតេយ្យទូទៅនៅលើពិភពលោក បាន និងកំពុងអនុវត្ត ប៉ុន្តែ បែរជាជ្រើសរើសមធ្យោបាយតាមបែបមិនប្រជាធិបតេយ្យ។ ចំណែក ប្រឆាំងនឹងច្បាប់វិញ គឺដោយសាររដ្ឋធម្មនុញ្ញដែលជាច្បាប់កំពូលរបស់កម្ពុជា តម្រូវឱ្យមានការជ្រើសរើសមេដឹកនាំតាមរយៈការបោះឆ្នោត តែទណ្ឌិត សម​ រង្ស៊ី បែរជាចង់ផ្ដួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោតទៅវិញ៕